ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ޖަލު ބަންދުގައި ހުންނެވި ނަމަވެސް އެމަނިކުފާނުގެ ރިޔާސީ ކެމްޕޭނުގެ މަސައްކަތް ހުއްޓުމެއް ނެތި ކުރިއަށް ގެންދާނެކަމަށް އިދިކޮޅުން ބުނެފިއެވެ.
ރައީސް ޔާމީންގެ ރިޔާސީ ކެންޕޭނުގެ މަސައްކަތް ފެށުމަށް އިދިކޮޅުން ގައުމީ ކޮންފަރެންސްއެއް ބޭއްވުމަށް ދަނީ ތައްޔާރުވަމުން ނެވެ. އެ ކޮންފަރެންސްއާއި ގުޅޭގޮތުން މައުލޫމާތު ދެއްވުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން، އިދިކޮޅު ކޯލިޝަންގެ ތަރުޖަމާނު ހީނާ ވަލީދު ވިދާޅުވީ އިދިކޮޅުގެ ރިޔާސީ ކެންޑިޑޭޓަކީ ރައީސް ޔާމީން ކަމަށެވެ.
އެކަން ބަދަލެއް ނުކުރާނެކަމަށާއި، އެމަނިކުފާނުގެ ކެމްޕޭނުގެ މަސައްކަތް މީގެ ކުރިންވެސް ރާވާފައި އޮތް ގޮތަށް ކުރިއަށް ގެންދާނެކަމަށް ހީނާ ވިދާޅުވި އެވެ.
"ރައީސް ޔާމީން ޖަލުގައި އޮންނެވިކަމަށް ވިޔަސް އެމަނިކުފާނުގެ މަސައްކަތްތައް، އެމަނިކުފާނުގެ އަޑު ކަނޑުވައެއް ނުލެވޭނެ. އަދި އެމަނިކުފާނުގެ މަސައްކަތްޕުޅު އެމަނިކުފާނު ރާވަވާފައި ހުރި ގޮތަށް އެކަން އެ ޝެޑިއުލާއި އެއްގޮތަށް ގެންދިއުމަށްޓަކައި އަޅުގަނޑުމެން ޕާޓީގެ ފަރާތުން މި ދަނީ ވަރަށް ގިނަ ގުނަ މަސައްކަތްތަކެއް ކުރަމުން"
އިދިކޮޅުގެ ތަރުޖަމާނު ހީނާ ވަލީދު
ހީނާ ވިދާޅުވީ ރިޔާސީ އިންތިޚާބަކީ މިނިވަން އިންސާފުވެރި އިންތިޚާބަކަށް ހެދުމަށް ވާދަވެރި ސިޔާސީ ލީޑަރަށް އިންތިޚާބުގައި ބައިވެރިވުމުގެ ފުރުސަތު ދޭން ޖެހޭ ކަމަށެވެ.
އެ ނޫންގޮތަކަށް އިންތިޚާބު ބޭއްވިދާނެ ކަމަށް އިދިކޮޅުން ނުދެކޭކަމަށާއި، ރައީސް ޔާމީނަށް އިންތިޚާބުގައި ބައިވެރިވުމުގެ ފުރުސަތު ހަނިކުރުމަށް ސަރުކާރުން ކުރަމުންދާ މަސައްކަތަކީ އިދިކޮޅުން ބަލައިގަންނާނެ މަސައްކަތެއް ނޫންކަމަށް ހީނާ ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
