ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ވެރިކަމުގެ ފާއިތުވި 4 އަހަރުގެ ތެރޭގައި، އެމްޓީސީސީއިން ގެންދަނީ ކޮންމެ 11 ދުވަހުން ޕްރޮޖެކްޓެއް ނިންމަމުންކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެ އެވެ. 

ރާއްޖެ ޓީވީގެ ފަހަ ސުރުހީ ޕްރޮގްރާމުގައި ވާހަކަދައްކަވަމުން އާޒިމް ވިދާޅުވީ ރައީސް އިބްރާހިމް މުހައްމަދު ސޯލިހުގެ ވެރިކަމުގެ އަމާޒަށް ވާސިލްވުމަށް ސަރުކާރު ކުންފުންޏެއް ކަމަށްވާ އެމްޓީސީސީއިން ހުއްޓުމެއްނެތި މަސައްކަތްތައް ކުރަމުންދާ ކަމަށެވެ. 

އެގޮތުން މި ދައުރުގައި ކޮންމެ މަހަކު ބަނދަރެއްގެ ރޭޓުން މަސައްކަތް ނިންމާފައި ވާނެކަމަށް އޭނާ ވިދާޅުވި އެވެ. 

އާޒިމް ވިދާޅުވީ މިވަގުތު އެމްޓީސީސީއިން 132 ޕްރޮޖެކްޓު ހިންގަމުންދާ ކަމަށެވެ. އެއީ މީގެ ކުރީގެ އެއްވެސް ވެރިކަމެއްގައި އެއްފަހަރާ އެހާ ގިނަ އަދަދެއްގެ ޕްރޮޖެކްޓުތައް ހިންގާފައި ނުވާކަމަށް އޭނާ ވިދާޅުވި އެވެ. 

އާޒިމް ވަނީ ދަތުރުފަތުރުގެ ރޮނގުންނާއި ތަރައްގީގެ މަޝްރޫއުތަކަށް ބެލިޔަސް އެމްޓީސީސީގެ ހިއްސާ ވަރަށް ބޮޑު ކަން ފާހަގަ ކުރައްވާފައެވެ.

ރައީސް އިބްރާހިމް މުހައްމަދު ސޯލިހު މަސައްކަތްޕުޅު ކުރައްވަނީ ކުޑަ ރަށެއް ބޮޑު ރަށެއް ބެއްލެވުމެއް ނެތި ކޮންމެ ރަށަކަށްވެސް ބޭނުންވާ އަސާސީ ޚިދުމަތްތައް ފޯރުކޮށްދިނުމަށް ކަމަށް އާޒިމް ވަނީ ވިދާޅުވެފަ އެވެ.