މިއަހަރުގެ ބަރަކާތްތެރި ރަމަޟާން މަހު 100 އާއިލާއަކަށް ކާބޯތަކެތި ފޯރުކޮށްދިނުމަށް ސަލަފް އެއިޑް އިން ފަށާފައިވާ ޕްރޮގްރާމްގައި ބައިވެރި ވުމުގެ ފުރުސަތު އާއްމުންނަށް ހުޅުވާލައިފިއެވެ. 

ޖަމިއްޔަތުއް ސަލަފުން "ވާބިލް 2023" ނަމުގައި ކުރިއަށް ގެންދާ މި ޕްރޮގްރާމް މެދުވެރިކޮށް 100 ޢާއިލާ އަކަށް ކާބޯތަކެތީގެ އެހީތެރިކަން ފޯރުކޮށްދިނުމަށް ހަމަޖެހިފައިވާއިރު، މި ޕްރޮގްރާމް ގައި ބައިވެރިވާން ބޭނުންވާ، އެހީތެރިކަމަށް ބޭނުންވެފައިވާ މާލޭގައި ދިރިއުޅެމުންދާ ޢާއިލާ ތަކުން، އަންނަނިވި ލިންކު މެދުވެރިކޮށް ފޯމު ފުރާލުމުން ބައިވެރި ވެވޭނެއެވެ. 

ފޯމް ގެ ލިންކު: https://forms.gle/RzskEzorPbNbbsNw6 

މީގެ އިތުރުން ސަލަފުގެ ޕޯސްޓަރުގައިވާ ކިޔުއާރް ކޯޑް ސްކޭން ކޮށްގެން ވެސް އެހީއަށް އެދޭ ފޯމު ލިބޭނެ ކަމަށް ސަލަފުން ބުނެއެވެ. 

އަދި އެ ފޯމުގައި، ޢާއިލާގއ ފަރާތުން ހާމަކުރާ މައުލޫމާތުތައް، ތިންވަނަ އެހެން އެއްވެސް ފަރާތަކަށް ހާމަ ނުކުރާނެ މައުލޫމާތު ކަމުގެ ޔަގީންކަން ސަލަފުން ދެއެވެ. 

މީގެ އިތުރުން، އެހީއަށް އެދި ފޯމު ފުރާ ފަރާތްތަކުގެ ތެރެއިން އެހީ ފޯރުކޮށްދޭ  100 ޢާއިލާ ކަނޑައަޅާނީ، ޢާއިލާ ތަކުގެ ހާލަތަށް ބަލައި ކަށަވަރު ކުރުމަށްފަހުގައި ކަމަށް ސަލަފުން ބުނެއެވެ. 

ފާއިތުވި އަހަރު ތަކުގެ ރޯދަމަހުގައި ވެސް އެހީތެރިކަމަށް ބޭނުންވާ އާއިލާތަކަށް ރޯދަ މަހު ކާބޯތަކެތި ފޯރުކޮށްދިނުމާއި، ރޯދަ ވީއްލޭނެ އިންތިޒާމްވެސް ސަލަފް އެއިޑުން ހަމަޖައްސައިދީފައިވެއެވެ.

ސަލަފް އެއިޑްގެ ފުރަތަމަ ހަރަކާތަކީ ކުރީ ސަރުކާރުގެ ދުވަސްވަރު ކުރިމަތިވި ފެނުގެ ކާރިސާއާއި ގުޅިގެން ސިފައިންނާ ފުލުހުންނަށް އެހީތެރިވުމަށް އެއާޕޯޓްގައި ކުރެވުނު މަސައްކަތެވެ. އެގޮތުން ރާއްޖެއިން ބޭރުން ގެނައި ފެން އާންމުންނާ ހަމައަށް ގެނެސްދިނުމަށް ކަމާބެހޭ އިދާރާތަކާއެކު ސަލަފް އެއިޑްގެ ވޮލަންޓިއަރުން ވަނީ ހަރަކާތްތެރިވެފައެވެ.