ރާއްޖޭގެ އެންމެ ދެކުނު ސަރަހައްދަށް އަމާޒުކޮށްގެން އެންވަޔަރުމަންޓު މިނިސްޓްރީއިން ކުރިއަށް ގެންދާ އައްޑޫ ސިޓީ ރީޖަނަލް ވޭސްޓު މެނޭޖުމަންޓު ފެސެލިޓީގައި ގާއިމްކުރުމަށް ހަމަޖެހިފައިވާ "ވޭސްޓް ޓު އެނާޖީ" ޕްލާންޓު އިންސްޓޯލް ކުރުމުގެ މަސައްކަތް ގާތްގަނޑަށް ނިމުމަކަށް އައިސްފައިވާކަމަށް ތިމާވެއްޓާއި ބެހޭ ވުޒާރާއިން ހާމަކޮށްފިއެވެ.
އެ ވުޒާރާއިން ހާމަކުރި ގޮތުގައި ކުނިން ހަކަތަ އުފައްދާ މި ޕްލާންޓް ރާއްޖެ ގެނެސް، އެ އިންސްޓޯލް ކުރުމުގެ 95 އިންސައްތަ މަސައްކަތް ވަނީ ނިމިފައެވެ. އަދި މިހާރު ކުރިއަށް ދަނީ އެ ޕްލާންޓު ހިންގުމަށްޓަކައި ހަދަން ޖެހޭ އިމާރާތާއި، ކުނި ރައްކާކުރާނެ އިމާރާތުގެ މަސައްކަތްތައް ކަމަށް އެ ވުޒާރާއިން ވަނީ ބުނެފައެވެ.
"ވޭސްޓް ޓު އެނާޖީ" ޕްލާންޓު އިންސްޓޯލް ކުރުމުގެ މަސައްކަތުގެ ތެރެއިން
އައްޑޫ ސިޓީގައި ގާއިމް ކުރާ ކުނިން ހަކަތަ އުފައްދާ މި ޕްލާންޓަކީ 50 ޓަނުގެ ކުނި އަންދައިގެން 1.5 މެގަ ވޯޓުގެ ކަރަންޓު އުފެއްދުމުގެ ގާބިލްކަން ލިބިފައިވާ ޕްލާންޓެކެވެ.
ތިމާވެއްޓާއި ބެހޭ ވުޒާރާއިން ބުނި ގޮތުގައި މި ޕްލާންޓުން އުފައްދާ 1.5 މެގަ ވޯޓު ކަރަންޓުގެ ތެރެއިން 1 މެގަ ވޯޓު ކަރަންޓުން އައްޑޫ ސެންޓަރަލް ގްރިޑަށް ފީޑު ކުރެވޭނެއެވެ. އަދި ބާކީ 500 ކޮލީ ވޯޓުގެ ކަރަންޓު ބޭނުންކުރާނީ އެ ފެސެލިޓީ ހިންގުމަށެވެ.
އައްޑޫ ސިޓީގައި ގާއިމްކުރާ މި ފެސެލިޓީ އަންނަ ޖުލައި މަހަށް ނިންމާލުމަށް މަސައްކަތް ކުރަމުންދާކަމަށް ތިމާވެއްޓާއި ބެހޭ ވުޒާރާއިން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
