ހަނިމާދޫގައި އިންޓާނޭޝަނަލް އެއަރޕޯޓު ތަރައްގީ ކުރުމުގެ މަޝްރޫއަކީ ޕޯޗުގީޒުންގެ އަތްދަށުން ދިވެހި ގައުމު މިނިވަންކުރުމުގެ މަސައްކަތަށް ނިކުމެވަޑައިގަތުމަށް އުތީމު މުހައްމަދު ތަކުރުފާނު ކަޅުއޮއްފުންމި ބެންނެވުން ފަދަ މަސައްކަތެއްކަމަށް އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެ އެވެ.
ހަނިމާދޫ އިންޓާނޭޝަނަލް އެއަރޕޯޓުގެ މަޝްރޫއު އިފްތިތާހުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން ފައްޔާޒު ވިދާޅުވީ ޒަމާނީ ފެންވަރުގެ އެއަރޕޯޓެއް ހަނިމާދޫގައި ތަރައްގީވެގެން ދިއުމަކީ ބޮޑުތިލަދުންމަތީގެ ރައްޔިތުން އެތައް އަހަރުތަކެއް ވަންދެން ދެކެމުން އައި ހުވަފެނެއް ކަމަށެވެ.
2 ބިލިއަން ރުފިޔާގެ އަގުބޮޑު އެ މަޝްރޫއު ސަރުކާރުން އިއުލާނު ކުރުމާއި ގުޅިގެން ބޮޑެތި ފާޑުކިޔުންތަކެއްވެސް އަމާޒުވަމުން އަންނަކަމަށް ފައްޔާޒު ވިދާޅުވިއެވެ. އެގޮތުން އެހާ ބޮޑު ޚަރަދެއް އެ އެއަރޯޓު ތަރައްގީ ކުރުމަށް ސަރުކާރުން ހޭދަކުރާ ސަބަބާއި ގުޅިގެން ގިނަ ސުވާލުތަކެއްވެސް އުފައްދަމުން އަންނަކަން ފައްޔާޒު ފާހަގަކުރެއްވިއެވެ.
ޚާއްސަކޮށް އެ މަޝްރޫއު ކުރިއަށް ގެންދިއުމަށް ލޯނު ނަގައިގެން ސަރުކާރަށް ދެކޮޅު ޖެއްސިދާނެ ކަމާމެދު އިގްތިސާދު ދިރާސާ ކުރައްވާ އެކި ފަރާތްތަކުންވެސް ސުވާލުތައް އަމާޒުކުރައްވަމުން ގެންދަވާކަމަށް ފައްޔާޒު ވިދާޅުވިއެވެ.
އެ ސުވާލުތަކަށް ޖަވާބުދެއްވަމުން ފައްޔާޒު ވިދާޅުވީ މީގެ އެތައް އަހަރުތަކެއް ކުރިން ދިވެހިރާއްޖެ މިނިވަންކުރުމަށް ބޮޑު ތިލަދުންމައްޗަށް ނިސްބަތްވާ އުތީމު މުހައްމަދު ތަކުރުފާނު ކަޅޯއްފުންމި ނަމަކަށް ކިޔާ އުޅަނދެއް ބަންނަވާ ކުރި މަސައްކަތުން ދިވެހިރާއްޖޭގެ މިނިވަންކަމާއި ސިޔާދަތު ދިފާއު ކުރެވިގެން ދިޔަ ފަދައިން ހަނިމާދޫގައި އަޅާ އެއަރޕޯޓަކީވެސް އެފަދަ މަސައްކަތަށް ވެގެންދާނެ ކަމަށެވެ.
"މީގެ 400 އެއްހާ އަހަރުކުރިން ކަޅުއޮއްފުންމި މި ސަރަހައްދުން އުފެދިގެން ނިކުމެ މުޅި ދިވެހިރާއްޖެއަށް އެ ގެނައި ބަދަލު.. އެއީ އަޅުގަނޑުމެންގެ މިނިވަންކަން ހޯދައިދީ މިއަދު އަޅުގަނޑުމެން މި ތިބި މިނިވަންކަން މަތީގައި ތިބެވުމަށް އެކުރި ކަމަށް ފަހުގައި މިއަދު މި ކުރެވޭ ކަމަކީ އޭގެ ފަހުން އެވަރުގެ ބޮޑުކަމެއް"
އިކޮނޮމިކް މިނިސްޓަރު ފއްޔާޒު އިސްމާއިލް
އިކޮނޮމިކް މިނިސްޓަރު ފައްޔާޒު އިތުރަށް ވިދާޅުވީ، ހަނިމާދޫގައި ތަރައްގީކުރާ އެއަރޕޯޓު ވެގެންދާނީ އުތުރުގެ ކުރިމަގަށް ކޮށައިދޭނެ މަގެއްކަމަށެވެ.
އެއަރޕޯޓުގެ ސަބަބުން ލިބިގެންދާނީ ހަމައެކަނި ދަތުރުފަތުރުގެ ފަސޭހަތައް އެކަނި ނޫންކަމަށާއި، އެ މަޝްރޫއާއެކު އިގްތިސާދީ އަދި އިޖްތިމާއީ ބޮޑެތި ކުރިއެރުންތައް ބޮޑުތިލަދުންމައްޗަށް ލިބިގެންދާނެކަމަށް މިނިސްޓަރު ވިދާޅުވިއެވެ.
ހަނިމާދޫ އިންޓާނޭޝަނަލް އެއާޕޯޓަކީ މާލެއިން ބޭރުގައި ހިންގާ އެފަދަ އެންމެ ބިޔަ މަޝްރޫއުއެވެ. އަދި މިއީ 21 ވަނަ ގަރުނުގެ އެހެން ގައުމުތަކާއި ފައިހަމަ ކުރުމަށް ކުރެވޭ މުހިންމު މަސައްކަތެއްގެ ގޮތުގައި ސަރުކާރުން ގެންދަނީ ސިފަކުރަމުންނެވެ.
Advertisement
This content is created and paid for by advertisers and does not involve Voice Journalists
