ވާދަވެރި ސިޔާސީ ލީޑަރު އަދު ޕީޕީއެމްގެ ރިޔާސީ ކެންޑީޑޭޓް ރައީސް ޔާމީން އަބްދުލްގައްޔޫމު ޖަލުގައި ހުންނަވާ ރައްޔިތުންނަށް ދެއްވި ޚާއްސަ މެސެޖެއް އިދިކޮޅު އިއްތިހާދުގައި ހިމެނޭ ޕީއެންސީގެ ރައީސް އަބްދުއްރަހީމް (އަދުރޭ) ހިއްސާކުރައްވައިފި އެވެ.
ރޭ ޕީޕީއެމް އޮފީސް ދޮރުމަތީ އޮތް ޖަލްސާއެއްގައި ވާހަކަދައްކަވަމުން އަބްދުއްރަހީމް ވިދާޅުވީ ބުދަ ދުވަހުގެ މެންދުރުފަހުގެ ވަގުތެއްގައި އިދިކޮޅު ލީޑަރޝިޕްގެ ބޭފުޅުންނަށް ރައީސް ޔާމީންއާއި ބައްދަލުކުރުމުގެ ފުރުސަތު ލިބިފައިވާކަމަށެވެ.
އެމަނިކުފާނު ހުންނެވީ ކުރިއަށްވުރެވެސް ގަދަކޮށް ކަމަށާއި، އެއްވެސް ކަހަލަ ހާސްކަމެއް ކަންބޮޑުފުޅުވުމެއް ނެތްކަމަށް އަބްދުއްރަހީމް ވިދާޅުވިއެވެ.
"ރައީސް ޔާމީން ހުންނެވީ ޖަލުގައި. ހަރާން ހުކުމެއް ކޮށްގެން، އެހެން ނަމަވެސް އެމަނިކުފާނު ހުންނެވީ ވަރަށް ގަދަކޮށް.. ކުރީފަހަރު.. ފުރަތަމަ އަޅުގަނޑާއި ޖަލުން ބައްދަލުވި ދުވަހާއި މިއަދާއި ހާސްބައި ތަފާތު، އެއްވެސް ކަހަލަ ހާސްކަމެއް ކަންބޮޑުފުޅުވުމެއް މޫނުފުޅު މައްޗަކުން ނުފެނުނު"
ޕީއެންސީގެ ރައީސް އަބްދުއްރަހީމް
އަބްދުއްރަހީމް ވިދާޅުވީ އެމަނިކުފާނު ޖަލަށް ވަޑައިގަތީއްސުރެ ކެނޑިނޭޅި، އެމަނިކުފާނުގެ ހައްގުގައްި ރައްޔިތުން ކުރަމުންދާ މަސައްކަތަށް ރައީސް ޔާމީން ފަށްފަށުން ޝުކުރުއަދާކުރެއްވި ކަމަށެވެ.
އެއާއެކު ސަރުކާރު ޖަވާބުދާރީ ކުރުމުގެ މަސައްކަތްތައް ތަންފުކެއްވެސް ދޫނުކޮށް ކުރިއަށް ގެންދިއުމަށް އެމަނިކުފާނު އެދިވަޑައިގަންނަވާކަމަށް އަބްދުއްރަހީމް ވިދާޅުވި އެވެ.
ވަކިން ޚާއްސަކޮށް ރާއްޖޭގެ މިނިވަންކަމާއި ސިޔާދަތު ދިފާއުކުރުމަށް ކުރެވޭ މަސައްކަތްތައް ގަދަޔަށް ޖެއްސުމަށް އެމަނިކުފާނު އެދިވަޑައިގަންނަވާކަން އަބްދުއްރަހީމް ފާހަގަކުރެއްވި އެވެ.
"އެމަނިކުފާނު ވިދާޅުވީ ހަމަ އެންމެ ތަންފުކެއްވެސް ދޫކޮށްގެން ނުވާނެއޭ.. އިންޑިއާ އައުޓު ހަމަ ގަދަޔަށް ކިޔާށޭ.. ރައީސް ސޯލިހަށް ހަމަ ގަދަޔަށް ބަވާށޭ.. މި ސަރުކާރުގެ ވިޔާނުދާ ކަންތައްތަކުގެ ވާހަކަތައް ގަދަޔަށް ދައްކާށޭ.. ކޮންމެހެން ތިމަންނާއަށް (ރައީސް ޔާމީނަށް) ލުޔެއް ލިބިދާނެކަމަށް ހީކޮށް އެމީހުންނަށް (ސަރުކާރަށް) ދޫ ނުދޭށޭ"
ޕީއެންސީގެ ރައީސް އަބްދުއްރަހީމް
އަބްދުއްރަހީމް ވިދާޅުވީ ރައީސް ޔާމީން ޖަލުގައި ހުންނެވީ ވަރަށް ސާބިތުކަމާއި އެކީގައި ކަމަށެވެ. އަދި މާތް ރަސްކަލާނގެ ގެ ރަހުމަތްފުޅާއެކު ކުރިއަށް އޮތް ރިޔާސީ އިންތިޚާބު ކާމިޔާބު ކުރައްވާނެކަމުގެ ޔަގީންކަމާއިވެސް އެކުގައި ކަމަށެވެ.
އެމަނިކުފާނަށް ޖަލުގައި ހުންނަވަން ޖެހިވަޑައިގަތަސް ރައްޔިތުން މާޔޫސް ނުވުމަށް ރައީސް ޔާމީން އެދިވަޑައިގަންނަވާކަމަށް އަބްދުއްރަހީމް ވިދާޅުވިއެވެ. އަދި މިހާރަށްވުރެ ފުޅާކޮށް ސަރުކާރު ޖަވާބުދާރީ ކުރުމުގެ މަސައްކަތް ކޮށްދެއްވުމަށް އެދިވަޑައިގަންނަވާކަމަށް ވެސް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
