ވާދަވެރި ސިޔާސީ ލީޑަރު އަދި ކުރީގެ ރައީސް ޔާމީން އަބްދުލްގައްޔޫމުގެ މައްޗަށް ހުކުން ކުރާ ކޮންމެ ފަހަރަކު ކުރިމަތީގައި އިންތިޚާބެއް އޮތުމަކީ އިއްތިފާގެއް ނޫންކަމަށް އެމަނިކުފާނުގެ އިސް ގާނޫނީ ވަކީލު އަދި ޕީޕީއެމްގެ އެޑްވައިޒަރު ޑރ މުހައްމަދު ޖަމީލު އަހުމަދު ވިދާޅުވެއްޖެ އެވެ. 

އެމަނިކުފާނު މިފަދައިން ވިދާޅުވެފައިވަނީ ރައީސް ޔާމީންއަށް "ޓާގެޓު" ކޮށްގެން މި ސަރުކާރުން އަނިޔާކުރަމުންދާކަން ބައިނަލްއަގުވާމީ މުޖުތަމައުއާއި ހިއްސާކުރުމަށް ކުރެއްވި ދަތުރުފުޅާއި ގުޅޭގޮތުން ނޫސްވެރިންނަށް މައުލޫމާތުދެއްވުމަށް ބޭއްވި ޕްރެސް ކޮންފަރެންސްގައި ވާހަކަދައްކަވަމުން ނެވެ. 

މި ސަރުކާރު ވެރިކަމާއި ހަވާލުވިފަހުން އައި ހުރިހާ އިންތިޚާބެއް ބޭއްވީ ވާދަވެރި ސިޔާސީ ލީޑަރު ބަންދުގައި ބަހައްޓައިގެން ކަމަށާއި، އަދި އިންތިޚާބުތަކާއި ދިމާކޮށް ރައީސް ޔާމީންގެ މައްޗަށް ދައުވާ އުފުލަމުން ދިއުމަކީ ރޭވިގެން ހިންގާ ކަމެއްކަމަށް ޑރ ޖަމީލު ވިދާޅުވިއެވެ. 

Advertisement

ޑރ ޖަމީލު ވިދާޅުވީ އެފަހުން ވ އާރަށުގެ މުއާމަލާތާއި ގުޅިގެން ރައީސް ޔާމީންގެ މައްޗަށް ކުށް ސާބިތުވާކަމަށް ކަނޑައަޅާ ހުކުންކޮށްފައިވަނީ އެމްޑީީގެ އެތެރޭގެ އިންތިޚާބު ކުރިމަތީގައި އޮއްވާ ކަމަށެވެ. އެހުކުމާއި ހަމަޔަށް ދިއުމުގެ ކުރިން އެމަނިކުފާނު ޖަލަށް ލުމަށް ތައްޔާރީތައް ވާން ފެށުމުން، އެއީ ސީދާ އިންތިޚާބާއި ދިމާކޮށް ވާދަވެރި ސިޔާސީ ލީޑަރު އެއްފަރާތް ކުރުމުގެ ނިޔަތުގައި އިއްވި ހުކުމެއްކަން ހާމަވާކަމަށް ޑރ ޖަމީލު ވިދާޅުވިއެވެ. 

އާރަށު މައްސަލައިގެ ހުކުމަށްފަހު ރައީސް ޔާމީން މާފުށީ ޖަލަށް ވަޑައިގަންނަވަނީ 

ޑރ ޖަމީލު ވިދާޅުވީ ރައީސް ޔާމީނާއި ދޭތެރޭގައި މި ސަރުކާރުން އަމަލުކުރަމުންދާ ގޮތް ބައިނަލްއަގުވާމީ ފަރާތްތަކާއިވެސް ހިއްސާކުރެވިފައިވާކަމަށެވެ. އަދި އެމަނިކުފާނަށް މި ސަރުކާރުން އަނިޔާވެރިވަމުންދާކަން އެ ފަރާތްތައް ގަބޫލުކުރާ ކަމަށާއި، އެ ފަރާތްތަކުގެ ކަންބޮޑުވުން މި މައްސަލައިގައި އިންތިހާއަށް އޮތްކަމަށް ޑރ ޖަމީލު ވިދާޅުވި އެވެ.