ވާދަވެރި ސިޔާސީ ލީޑަރު އަދި ކުރީގެ ރައީސް ޔާމީން އަބްދުލްގައްޔޫމުގެ މައްޗަށް ހުކުން ކުރާ ކޮންމެ ފަހަރަކު ކުރިމަތީގައި އިންތިޚާބެއް އޮތުމަކީ އިއްތިފާގެއް ނޫންކަމަށް އެމަނިކުފާނުގެ އިސް ގާނޫނީ ވަކީލު އަދި ޕީޕީއެމްގެ އެޑްވައިޒަރު ޑރ މުހައްމަދު ޖަމީލު އަހުމަދު ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވެފައިވަނީ ރައީސް ޔާމީންއަށް "ޓާގެޓު" ކޮށްގެން މި ސަރުކާރުން އަނިޔާކުރަމުންދާކަން ބައިނަލްއަގުވާމީ މުޖުތަމައުއާއި ހިއްސާކުރުމަށް ކުރެއްވި ދަތުރުފުޅާއި ގުޅޭގޮތުން ނޫސްވެރިންނަށް މައުލޫމާތުދެއްވުމަށް ބޭއްވި ޕްރެސް ކޮންފަރެންސްގައި ވާހަކަދައްކަވަމުން ނެވެ.
މި ސަރުކާރު ވެރިކަމާއި ހަވާލުވިފަހުން އައި ހުރިހާ އިންތިޚާބެއް ބޭއްވީ ވާދަވެރި ސިޔާސީ ލީޑަރު ބަންދުގައި ބަހައްޓައިގެން ކަމަށާއި، އަދި އިންތިޚާބުތަކާއި ދިމާކޮށް ރައީސް ޔާމީންގެ މައްޗަށް ދައުވާ އުފުލަމުން ދިއުމަކީ ރޭވިގެން ހިންގާ ކަމެއްކަމަށް ޑރ ޖަމީލު ވިދާޅުވިއެވެ.
"2019 ގެ އިންތިޚާބު ކުރިމަތިވި ވަގުތުގައި ހަމަކުއްލިޔަކަށް ހަމަ މައްސަލަތަކެއް ކުރިމަތިކޮށްފަ އޭރުވެސް ހުކުމް ކުރި.. އަދި އެ ހުކުމްކުރި ހާލަތުގައި ހުކުމް ކުރުމަށްފަހު ކަންތައްތައް ވެގެންދިޔަ ގޮތާއި، އެ ހުކުންކުރި ފަނޑިޔާރުންގެ އޯޑިއޯތައް ލީކުވެ، އެ އޯޑިއޯތަކުގައި ހުރި ވާހަކަތަކުން މި ހުކުމަކީ ކަނޑައެޅިގެން ރައީސް ޔާމީނުގެ މައްޗަށް އިންތިޒާމީ ގޮތެއްގައި.. މި ކަންކަން ކުރަނީ ހަމަ ސީދާ ރައީސް އިބްރާހިމް މުހައްމަދު ޞާލިހު ފަހަތުގައި ހުންނަވައިގެން، ސަރުކާރުން އިސްވެ އޮވެ ކުރާކަމެއްކަން ސާބިތުވެގެން ދިޔަކަން ހާމަކޮށްދިނުން"
ރައީސް ޔާމީންގެ އިސް ގާނޫނީ ވަކީލު ޑރ މުހައްމަދު ޖަމީލު
ޑރ ޖަމީލު ވިދާޅުވީ އެފަހުން ވ އާރަށުގެ މުއާމަލާތާއި ގުޅިގެން ރައީސް ޔާމީންގެ މައްޗަށް ކުށް ސާބިތުވާކަމަށް ކަނޑައަޅާ ހުކުންކޮށްފައިވަނީ އެމްޑީީގެ އެތެރޭގެ އިންތިޚާބު ކުރިމަތީގައި އޮއްވާ ކަމަށެވެ. އެހުކުމާއި ހަމަޔަށް ދިއުމުގެ ކުރިން އެމަނިކުފާނު ޖަލަށް ލުމަށް ތައްޔާރީތައް ވާން ފެށުމުން، އެއީ ސީދާ އިންތިޚާބާއި ދިމާކޮށް ވާދަވެރި ސިޔާސީ ލީޑަރު އެއްފަރާތް ކުރުމުގެ ނިޔަތުގައި އިއްވި ހުކުމެއްކަން ހާމަވާކަމަށް ޑރ ޖަމީލު ވިދާޅުވިއެވެ.
އާރަށު މައްސަލައިގެ ހުކުމަށްފަހު ރައީސް ޔާމީން މާފުށީ ޖަލަށް ވަޑައިގަންނަވަނީ
"މިއީ ސަމާސާ ވާހަކައެއް ނޫން! އަޅުގަނޑުމެން މިއަދު ރާއްޖޭގައި މިތިބަ ހިސާބުގައި ތިބޭއިރުގައި ރާއްޖޭގެ އެއްވެސް ފަރާތަކުން އެއީ އަމުދުން ރާއްޖޭގެ ރައީސަކަށް ހުންނެވި ބޭފުޅަކު އިސްވެ ހުންނަވައިގެން ރައީސުލްޖުމްހޫރިއްޔާ ސީދާ ވަކި ފަރުދަކަށް އަމާޒުކޮށްގެން ކަންތައްތަކެއް އިންތިޒާމުކޮށް ތަހުގީގެއް ހިންގާ ކޯޓުތައް މެދުވެރިކޮށްގެން ހުކުމްތަކެއްކޮށް އެމީހަކާއި ސިޔާސީގޮތުން ވާދަކުރުން.. އެކަމުގެ ބިރު ނަގާ އެމީހަކު ސިޔާސީ މައިދާނުން އެއްފަރާތްކުރުމަށްޓަކައި ހުކުމް ޖަހައިގެން ޖަލަށްލާ ނިޒާމަށް އައުމަކީ އެއީ މިއަދު ރާއްޖެ އައިސްފައި އޮތް ހިސާބުން ބަލާކަމުގައި ވަންޏާ ގަބޫލުކުރެވޭނެ މިންގަނޑުތަކެއް ނޫން"
ރައީސް ޔާމީންގެ އިސް ގާނޫނީ ވަކީލު ޑރ މުހައްމަދު ޖަމީލު
ޑރ ޖަމީލު ވިދާޅުވީ ރައީސް ޔާމީނާއި ދޭތެރޭގައި މި ސަރުކާރުން އަމަލުކުރަމުންދާ ގޮތް ބައިނަލްއަގުވާމީ ފަރާތްތަކާއިވެސް ހިއްސާކުރެވިފައިވާކަމަށެވެ. އަދި އެމަނިކުފާނަށް މި ސަރުކާރުން އަނިޔާވެރިވަމުންދާކަން އެ ފަރާތްތައް ގަބޫލުކުރާ ކަމަށާއި، އެ ފަރާތްތަކުގެ ކަންބޮޑުވުން މި މައްސަލައިގައި އިންތިހާއަށް އޮތްކަމަށް ޑރ ޖަމީލު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
