ޢުމުރުން ދުވަސްވެ، ލޯބޯ ކޮށިވެފައިވާ ޙާލުގައި މައިންބަފައިން ތިބޭއިރު، އެ މީހުންގެ ކިބައިން ދިމާވާ ކަންކަމަށް ކެތް ކުރާންވާނެ ކަމަށް މިއަދުގެ ހުކުރުޚުތުބާގައި ބުނެފިއެވެ. 

މައިންބަފައިންނަށް ކަމޭހިތުމުގެ މައްޗަށް އަލި އަޅުވާލާފައިވާ ޚުތުބާގައި ބުނީ، ކޮންމެ އިންސާނަކު ވެސް ދުނިޔޭގައި ލަހައްޓަވައިފި ނަމަ ޢުމުރުން ދުވަސްވެ، މުސްކުޅި ޢުމުރާ ކުރުމަތިލާން ޖެހޭނެކަން ހަނދާންކުރަން ޖެހޭނެ ކަމަށެވެ.

އަދި ތިމާގެ ޙަޔާތުގައި މަންމަ ނުވަތަ ބައްޕަ، ޢުމުރުން ދުވަސްވެ، ލޯބޯ ކޮށިވެފައިވާ ޙާލުގައި އެ މީހުންނަށް އެހީތެރިވެ އަޅައިލުމަކީ، ކޮންމެ ދަރިއެއްގެ ވާޖިބެއް ކަމަށް ޚުތުބާގައި ބުނެފައިވެއެވެ.

Advertisement

"އެ ޙާލުގައި، އެ މީހުންގެ ފުށުން ކުރިމަތިވާ އުނދަގޫތަކަށް ކެތްތެރިވާންވާނެއެވެ. އެބައިމީހުންނާ މުއާމަލާތްކުރަން ވާނީ، އޯގާތެރިކަމާއެކުގައެވެ. ތިބާގެ އެއްވެސް އާރެއް ބާރެއް ނެތް ދުވަހު މައިންބަފައިން އެބައިމީހުންގެ އުފަލާއި އަރާމު ޤުރުބާންކޮށް، ތިބާއަށް ކާންބޯންދީ ބަލަހައްޓައޮ އޯގާތެރިވީ ފަދައިންނެވެ." ޚުތުބާގައި ބުނެފައިވެއެވެ. 

ކަންމިހެން ހުރި ނަމަވެސް މިއަދު ދިވެހި މުޖުތަމައުއިން ފެންނަނީ މައިންބަފައިން އުމުރުން ދުވަސްވުމުން، އެމީހުންނަށް އަޅާނުލައި އިހާނަތިކޮށް ހިތާ މަންޒަރުކަން ހުތުބާގައިވަނީ ފާހަގަކޮށްފައެވެ. އެގޮތުން، އުމުރުން ދުވަސް ވުމުން އެމީހުންނަށް ކާން ނުދީ އަޅާނުލުމުގެ ސަބަބުން ސަލާމްޖަހައިގެން މައިންބަފައިން ކައިބޮޑި ހަދާއިރު، ދަރިން ގޭގައި އަރާމާއި އުފަލުގައި އުޅޭ ކަމަށް ފާހަގަކޮށް ޚުތުބާގައިވަނީ އެއީ ހިތާމަ ހުރި، އަދި ހަރާމް ކަމެއް ކަމަށް ބުނެފައިވެއެވެ. 

ވުމާއެކު މައިންބަފައިންނަށް ކަމޭހިތައި އަޅާލާ، ބަޔަކަށް އެންމެންވެސް ވުމަށް ޚުތުބާގައި ވަނީ ނަސޭހަތްތެރިވެފައެވެ.