މިއަދު، އެންމެ ބިރު ހީވަނީ، އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް، މުހައްމަދު ނަޝީދު ވެރިކަމަށް ވަޑައިގަތުމަށްޓަކައި، އިދިކޮޅު ކޯލިޝަންގެ ރިޔާސީ ކެންޑިޑޭޓް ރައީސް ޔާމީނާއި އެކީގައި ކޯލިޝަން އެއް ހައްދަވާފާނެތީ ކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ. 

އާޓީފިޝަލް ބީޗު ސަރަހައްދުގައި މިހާރު ކުރިއަށްދާ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ޕްރައިމަރީ ކެންޕެއިން ޖަލްސާގައި ވާހަކަ ދައްކަވަމުން މާރިޔާ ވިދާޅުވީ، އެމްޑީޕީގެ ރައީސް، ރައީސް މުހައްމަދު ނަޝީދުގެ ވެރިކަން ވެއްޓި، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެރިކަމަށް ވަޑައިގެންނެވުމާއި ހަމައަށް އެމްޑީޕީއަށް ހިންގުނު ހަމައެކަނި ބޮޑު ހަރަކާތަކީ ރައީސް ނަޝީދު މިނިވަން ކުރުމަށް ގޮވި "ގޮވެލި ފަތި" ގޮވުން ކަމަށެވެ. 

އެހެނީ، އެދެމެދުގައި ހިނގައި ދިޔަ އަހަރު ތަކުގައި، ކުރީގެ ރައީސް، އަދި އިދިކޮޅު އިއްތިހާދުގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ވެރިކަމަށް ވަޑައިގެން، ސިޔާސީ ލީޑަރުންތައް ބަންދުކޮށް، ޚާއްސަކޮށް ރައީސް ނަޝީދުގެ ޝަރީއަތް "ފަޓާސް ބަރިއެއް ހެން" ހިންގަވައި، އެމަނިކުފާނު ޖަލަށް ލުމުގެ ކަންކަން ރައީސް ޔާމީން ކުރެއްވި ކަމަށެވެ. އަދި ރައީސް ޔާމީން ވެރިކަމަށް ވަޑައިގެން އެންމެ ފުރަތަަމަ ކުރެއްވި ކަމަކީވެސް ރައީސް ނަޝީދު ޖަލަށް ލެއްވުމުގެ މަސައްކަތް ކަމަށާ، އެމަނިކުފާނުގެ ވިޝަން އަކީވެސް އެއީ ކަމަށް މާރިޔާ ވިދާޅުވިއެވެ. 

Advertisement

"ނަމަވެސް މިހާރަކަށް އައިސް މި އިވެނީ، ރައީސް ނަޝީދު ވިދާޅުވާ އަޑު، ރައީސް ޔާމީނާއި އެމަނިކުފާނާ ވަރަށް އެއްގޮތޭ. އިންޑިއާ އައުޓް ފިޔަވައި އެހެން ހުރިހާ ކަމެއްގައި އެމަނިކުފާނާ، ރައީސް ޔާމީނާއި، އެއްގޮތޭ. ރައީސް ޔާމީންގެ ސިޔާސަތުތައް ކަމުދާ ވާހަކަ. އަޅުގަނޑުމެންނަށް މި އިވެނީ ރައީސް ޔާމީނަކީ ވިޝަނަރީ ލީޑަރެކޭ. ވިދާޅުވަމުން ރައީސް ނަޝީދު ވަޑައިގަންނަވާތަން." ރައީސް ޔާމީނަކީ ވިޝަނަރީ ބޭފުޅެއް ކަމަށް ރައީސް ނަޝީދު ވިދާޅުވުމާއި ގުޅިގެން އެކަމަށް ރައްދު ދެއްވައި ވާހަކަ ދައްކަވަމުން މާރިޔާ ވިދާޅުވި އެވެ. 

މާރިޔާ ވިދާޅުވީ، ރައީސް ނަޝީދު ރަށްރަށަށް ވަޑައިގެންނެވުމުން، އެމަނިކުފާނު ވަޑައިގަންނަވާ ތަން ތައްޔާރު ކުރުމަށް ޕީޕީއެމްގެ އެކްޓިވިސްޓުންވެސް ހަރަކާތްތެރިވަމުންދާ ކަމަށެވެ. އަދި ރައީސް ނަޝީދު ރަށްރަށަށް ވަޑައިގަންނަވާއިރުގައިވެސް، އެމަނިކުފާނުގެ އިސްތިގުބާލުގައި ޕީޕީއެމްގެ ހަރަކާތްތެރިން ތިއްބަވާ ވާހަކަ އަޑުއިވޭ ކަމަށް މާރިޔާ ވިދާޅުވިއެވެ. 

އެހެންކަމުން ޖަޒުބާތުގައި ޖެހިގެންވެސް ރައީސް ނަޝީދު ރައީސް ޔާމީނާއެކު ކޯލިޝަން ހެދުން ފަދަ "މޮޔަ ކަމެއް" ކުރުމުގެ ފުރުސަތު ނުދިނުމަށް މާރިޔާ ގޮވައިލެއްވި އެވެ.

"މިއަދު އަޅުގަނޑުމެންގެ ޕާޓީގެ، ނުހަނު ލޯބިވާ ރައީސް ނަޝީދު ނުކުމެވަޑައިގެން ރައީސް ޔާމީނަކީ ވިޝަނަރީ ލީޑަރެކޭ ވިދާޅުވީމަ އަޅުގަނޑުމެން ހިތަށް އުނދަގޫވޭ. އަޅުގަނޑުމެން ޖަޒުބާތުގައި ޖެހިގެންވެސް އެމަނިކުފާނު އެފަދަ މޮޔައެއް، އެފަދަ ކަމެއް ކުރެއްވިޔަ ދީގެން ނުވާނެ،" މާރިޔާ ވިދާޅުވި އެވެ.