ވ. އާރަށުގެ މުއާމަލާތާއި ގުޅުވާ ކުރީގެ ރައީސް ޔާމީން އަބްދުލްގައްޔޫމުގެ މައްޗަށް 11 އަހަރުގެ ޖަލުހުކުމެއް ކްރިމިނަލް ކޯޓުގެ އިސް ފަނޑިޔާރު އަހުމަދު ޝަކީލު ކުރެއްވިއިރު އެ މައްސަލަ ދިރާސާ ކުރެއްވިކަމާމެދު ސުވާލު އުފެދޭކަމަށް ރައީސް ޔާމިންގެ ގާނޫނީ ޓީމުގައި ހިމެނިވަޑައިގަންނަވާ ޝިޔާޒު ވެދާޅުވެއްޖެ އެވެ. 

ވ. އާރަށުގެ މައްސަލައިގައި މި ދިޔަ ޑިސެމްބަރު މަހުގެ 25 ވަނަ ދުވަހު ރައީސް ޔާމީނުގެ މައްޗަށް ކޮށްފައިވާ ހުކުމާއި، އެ މައްސަލަ ނިންމިގޮތުގެ ރިޕޯޓުގައި ބޮޑެތި ފުށޫއެރުންތަކެއް ހުރިކަން ފާހަގަކޮށް ގާނޫނީ ވަކީލުން ގެންދަވަނީ ކަންބޮޑުވުން ފާޅުކުރައްވަމުން ނެވެ. 

އެކަމާއި ގުޅޭގޮތުން ރައީސް ޔާމީންގެ ގާނޫނީ ވަކީލު ޝިޔާޒު ކުރެއްވި ޓްވީޓެއްގައި ވިދާޅުވީ ޝަރީއަތެއްގައި ކަމެއް ސާބިތުވުމާއި ނުވުން ބިނާވެގެން ވަނީ މައްސަލައާއި ގުޅިގެން ހުށައަޅާ ހެކިތަކުގެ މައްޗަށް ކަމަށެވެ. ފަހަރެއްގައިވެސް އެއީ ހަރުދަނާ ހެއްކެއް ދަލީލެއް ނެތި ނިޔާވެރިޔާއަށް (މައްސަލަ ބައްލަވާ ފަނޑިޔާރަށް) ފެނިވަޑައިގަންނަވާ ގޮތަށް ނިންމާ ނިންމުމެއް ނޫންކަމަށް އޭނާ ވިދާޅުވިއެވެ. 

އެހެން ނަމަވެސް ވ އާރަށުގެ މައްސަލަ ނިންމި ގޮތުގެ ރިޕޯޓު ދިރާސާކުރައްވަމުން ދާއިރު، ހުކުމަށް ވާސިލުވި ސަބަބު ބަޔާންކޮށްފައި ނެތްކަން ފާހަގަކުރެވޭކަމަށް ޝިޔާޒު ވިދާޅުވިއެވެ. އިސްތިއުނާފުކުރުމަށްވެސް އެންމެ އުނދަގޫވަނީ ރިޕޯޓުގައި އެކަންކަން ބަޔާންކޮށްފައި ނުވާތީކަން އޭނާ ފާހަގަކުރެއްވިއެވެ. 

އެއާއެކު ޝިޔާޒު ވިދާޅުވީ ރައީސް ޔާމީނުގެ މައްސަލަ (ވ.އާރަށް މައްސަލަ) ނިންމި ގޮތުގެ ރިޕޯޓުގެ އެކިބައިތަކުގެ ޢިބާރާތްކުރުމާއި، ޖުމްލަތަކުގެ ކުރުދިގުމިނާއި، ޢަދަދު ލިޔާގޮތާއި، ޖުމްލަތައް ފެށުމާއި ނިންމުންތައް ގެނެސްފައި ހުރި ގޮތުން، ޢިބާރާތްކުރުމުގައި ތަފާތު އެކި ޝަޚްޞިއްޔަތު ފާހަގަކުރެވިގެން ދިޔަކަމަށެވެ. އަދި އެއީ ސަބަބުވެރި އިއްތިފާގުތަކެއް ނޫންކަމަށް އޭނާ ވިދާޅުވިއެވެ. 

ޝިޔާޒު އިތުރަށް ވިދާޅުވީ ވ އާރަށުގެ މުއާމަލާތާއި ގުޅުވާ ރައީސް ޔާމީނުގެ މައްޗަށް ދައުލަތުން ކޮށްފައިވާ ދައުވާތަކާއި، ފަނޑިޔާރު އިބާރާތްކުރުން ގެނެސްފައިވާ ގޮތް އަޅާކިޔުމުން ހަގީގަތުގައިވެސް އެ މައްސަލައިގައި ކުރެވިފައިވާ ދައުވާއާއި، ހުށައެޅިފައިވާ ހެކިތަކާއި ޝަރީއަތުގައި ހާމަވި ކަންތައްތައް ފަނޑިޔާރު ދިރާސާ ކުރައްވާފައިވޭތޯ ސުވާލު އުފެދޭކަމަށެވެ. 

ވ އާރަށުގެ މައްސަލަ މި ފެށޭ ހަފްތާގައި ހައިކޯޓުގައި އިސްތިއުނާފު ކުރާނެކަމަށް ރައީސް ޔާމީންގެ ގާނޫނީ ޓީމުން ވަނީ ވިދާޅުވެފައެވެ. އަދި އެ މައްސަލަ އިސްތިއުނާފު ކުރާއިރު، ކަފާލާތައްވެސް ހުށައަޅާނެކަމަށް ގާނޫނީ ޓީމުން ވިދާޅުވެފައިވެއެވެ. އޭގެ އިތުރުން ހައިކޯޓު މަރުހަލާއިން ރައީސް ޔާމީން މިނިވަންވެވަޑައިގަންނަވާނެ ކަމުގެ ޔަގީންކަން އޮތް ކަމަށްވެސް އެ ފަރާތްތައް ގެންދަވަނީ ވިދާޅުވަމުން ނެވެ.