އައްޑޫސިޓީ ފޭދޫ، ހުޅުދޫ އަދި މީދޫ އިން ބަންޑާރަ ގޯތި ދޫކުރުމަށް އައްޑޫ ސިޓީ ކައުންސިލުން އިއުލާނުކޮށްފި އެވެ.

އައްޑޫ ސިޓީ ކައުންސިލުން ރޭ ކުރި އިއުލާނެއްގައި ވަނީ، ހުޅުދޫއިން 2،000 އަކަފޫޓުގެ 100 ގޯތި، މީދޫއިން 2،000 އަކަފޫޓުގެ 100 ގޯތި އަދި ފޭދޫއިން 1،500 އަކަފޫޓުގެ 300 ގޯތި ދޫކުރާ ކަން ހާމަކޮށްފައެވެ. 

މިއިން ކޮންމެ ރަށަކުންވެސް ގޯތިތައް ދޫކުރަނީ ދެ ކެޓަގަރީއަކުންނެވެ. އެއީ އެ ރަށެއްގެ ރައްޔިތުންގެ ކެޓަގަރީ އާއި އެހެން ރަށްތަކުގެ ރައްޔިތުންގެ ކެޓަގަރީ އެވެ.

އެގޮތުން، ފޭދޫއިން ދޫކުރާ 300 ގޯތީގެ ތެރެއިން 90 ޕަސެންޓް، 270 ގޯތި ފޭދޫގެ ރައްޔިތުންނަށް ދިނުމަށް ހަމަޖެހިފައިވާ އިރު، 30 ގޯތި ދޫކުރަނީ ފޭދޫ ފިޔަވައި އައްޑޫގެ އެހެން ރަށްތަކުގެ ރައްޔިތުންނަށެވެ.

މީދޫ އިން ދޫކުރާ 100 ގޯތީގެ ތެރެއިން 90 ގޯތި އަދި ހުޅުދޫއިން ދޫކުރާ 90 ގޯތި އެ ރަށްތަކުގެ ރައްޔިތުންނަށް ދޭއިރު މީދޫއިން 10 ގޯތި އަދި ހުޅުދޫއިން 10 ގޯތި ދެނީ އެހެން ރަށްތަކުގެ ރައްޔިތުންނަށެވެ.

ގޯއްޗަށް އެދޭ ފޯމު ބަލައިގަތުމަށް ހަމަޖެހިފައިވަނީ ފެބްރުއަރީ ދެވަނަ ދުވަހުން 16 ވަނަ ދުވަހުގެ ނިޔަލަށް ރަސްމީ ބަންދު ނޫން ކޮންމެ ދުވަހެއްގެ ހެނދުނު 9:00 އިން މެންދުރު 1:00 އަށް އެ އަވަށެއްގެ އަވަށު އޮފީހުންނެވެ.