ކުރީގެ ރައީސް ޔާމީން އަބްދުލްގައްޔޫމް ގެ ވެރިކަމުގައި ދިވެހި ރައްޔިތުން ތިބީ ބިރުވެރި ކަމެއްގެ ތެރޭގައި ކަމަށާ، އަދި އެ ބިރުވެރިކަން އަލުން ދެކެން އެއްވެސް ދިވެހި ރައްޔިތަކު ބޭނުމެއް ނުވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ. 

އަންނަ ހޮނިހިރު ދުވަހު ބާއްވާ އެމްޑީޕީގެ ރިޔާސީ ޕްރައިމަރީގެ ކެމްޕެއިނަށް އދ. ދަނގެތި އަށް ވަޑައިގެން، އެރަށު އެމްޑީޕީ މެންބަރުންނާއި ބައްދަލު ކުރައްވައި ވާހަކަ ދައްކަވަމުން ރައީސް ވިދާޅުވީ، ކުރިއަށް އޮތް އެމްޑީޕީގެ ރިޔާސީ ޕްރައިމަރީ އަކީ 2018 ވަނަ ރާއްޖެއަށް ގެނައި ބަދަލާއި، އަމާން ކަމާއި، އަދި ތަރައްގީ ކުރިއަށް ގެންދަންވީތޯ ނުވަތަ "މަގުމަތިވެ މަޑުޖެހިފައި ތިބޭނީތޯ" ކަނޑައަޅަން ލިބޭ ފުރުސަތެއް ކަމަށެވެ. 

"މިވޭތުވެދިޔަ 4 އަހަރު ތެރޭގައި، މުޅި ރާއްޖެއަށް މި ގެނެވުނު ހަމަޖެހުމާއި، އާއްމު ރައްޔިތުންނަށް މި ގެނެސްދެވުނު ހިތްހަމަޖެހުމާއި، މިނިވަންކަން އެއީ އޭގެ ކުރީގެ 5 އަހަރު ތިޔަބޭފުޅުން ތަހަންމަލްކުރި ދަތި އުދަގޫ ތަކުން އަރައިގަތުމަށް ކުރެވުނު ކަމެއް."

"އެއްވެސް ރައްޔިތަކު، އަޅުގަނޑު ހިތުން ރާއްޖޭގެ އެއްވެސް ރައްޔިތަކު، އެނބުރި އެ ދުވަސް ދެކޭކަށް ދެނެއް ބޭނުމެއް ނުވާނެ. އެ ބިރުވެރިކަން ތަހައްމަލް ކުރާކަށެއް ދެނެއް ބޭނުމެއް ނުވާނެ."

ރައީސް ޞާލިހު ވިދާޅުވީ، ދިވެހި ރައްޔިތުން ބޭނުންވާނީ ރަނގަޅު ސިއްހީ ޚިދުމަތް ތަކާއި، ތައުލީމު ފަދަ އަސާސީ ޚިދުމަތްތައް ރަށުން ލިބުން ކަމަށާ، އެކަން ކަން ރަށް ރަށަށް ފޯރުކޮށްދެވެން ފެށި، ކުރެވެމުންދާ ތަން މިސަރުކާރުގައި ފެންނަމުންދާ ކަމަށެވެ. 

އެހެންކަމުން، އެމްޑީޕީ ނޫން މީހުންވެސް، އެމްޑީޕީގެ މެންބަރުންނަށް އެކަން ވިސްނައިދެއްވަން އެދިލައްވަމުން ރައީސް ޞާލިހު ވަނީ ޕްރައިމަރީ ނިމިގެންދާގޮތުން "އަނެއްކާވެސް މަގުމަތި ވެދާނެ" ކަމަށް ތަކުރާކޮށް ވިދާޅުވެފައެވެ. 

އެމްޑީޕީގެ އެތެރޭގެ އިންތިޚާބާއި ދިމާކޮށް ރައީސް ޞާލިހާއި އެމަނިކުފާނުގެ ކެންޕެއިން ޓީމުގެ އިތުރުން ކުރީގެ ރައީސް މުހައްމަދު ނަޝީދުވެސް އަންނަނީ އެކި ގޮތް ގޮތުން ރައީސް ޔާމީންގެ ނަން ބޭނުންކޮށްގެން ކެންޕެއިން ކުރަމުންނެވެ.

އެކަމާއި ގުޅިގެން އިދިކޮޅުން ދަނީ ނުރުހުން ފާޅުކުރަމުންނެވެ. އެގޮތުން އެމްޑީޕީގެ ދެ ރައީސުންގެ ދެމެދުގައި އޮތް ވާދަވެރިކަމެއްގައި، ދެ ރައީސުންވެސް ރައީސް ޔާމިންގެ ނަންފުޅު ބޭނުންކުރައްވަނީ ސިޔާސީ ތާއީދު ހޯއްދެވުމަށްކަމަށް އިދިކިޅުން ދަނީ ބުނަމުންނެވެ.