މާލެ ސިޓީ ކައުންސިލް އޮތީ އެއްވެސް ކަމެއް ނުކުރެވޭ ގޮތަށް މަރުތަޅުއަޅުވާފައި ކަމަށް މާލެ ސިޓީ ކައުންސިލްގެ ގަލޮޅު އުތުރު ދާއިރާގެ މެމްބަރުމުހައްމަދު ސައިފް ފާތިހު ވިދާޅުވެއްޖެއެވެ.

ސައިފް މިހެން ވިދާޅުވީ، މިއަދު ކުރިއަށްދިޔަ މާލެ ސިޓީ ކައުންސިލްގެ ހަތަރު ވަނަ ދައުރުގެ 86 އަހަރީ އާއްމު ޖަލްސާގައި ވާހަކަ ދައްކަވަމުންނެވެ.

ސައިފް ވިދާޅުވީ، މާލޭގެ ޕާކިންގެ މައްސަލަ ހައްލު ކުރުމަށް ހައްލު ހޯދާފައިވާ ކަމަށާއި ނަމަވެސް އެ ހައްލު ހޯދައިނުދީ ސަރުކާރުން ހިފަހައްޓަނީ ކީއްވެކަމެއް ނޭނގޭ ކަމަށެވެ.

Advertisement

"ދައުލަތުގެ މަޖެޓަށް ބުރަވަނީކީ ނޫން. ދައުލަތުން އުފުލަން ޖެހޭ ތަކުލީފެއް އޮތީކީ ނޫން. އަޅުގަނޑުމެންނަށް މިއަދުވެސް އެބަ އޮތޭ މި މަސައްކަތް ފަށައިގަނެގެން މާލެއަށް ހައްލު ހޯދެން. އެހެން ނަމަވެސް މާލޭ ސިޓީ ކައުންސިލަކީ އޮޕޮޒިޝަން ޑޮމިނޭޓް ކުރާ، ނޫނީ މާލޭ ސިޓީ ކައުންސިލްގަ މިތަނަށް ހޮވިފަ ތިބި ގިނަ އެމްޑީޕީ މެމްބަރުންނަކީ މި ސަރުކާރު މި މާލެއަށް އަޅާނުލާ ނުލުމުގެ ވާހަކަ ދައްކާ ބަޔަކަށް ވާތީ، ޖެއްސުމަށް ކުރާ ކަމެއްގެ ގޮތުން މި ހުރިހާ ކަމެއް ހުއްޓުވާފަ މިއޮތީ،" ސައިފް ވިދާޅުވިއެވެ.

ސައިފް ވިދާޅުވީ މާލޭގެ ލޭންޑް ޔޫސް ޕްލޭންވެސް އޮތީ ފްރީޒްކޮށްފައި ކަމަށާއި މާލޭ ސިޓީ ކައުންސިލުން އެދުނު ގޮތަކަށް އެއްވެސް ކަމެއް ނުކުރެވޭ ކަމަށެވެ.

ޕާކިން ހެދުމުގެ މަސައްކަތާއި ލައިޓް އިންޑަސްޓްރިއަލް ޒޯނެއް ގާއިމު ކުރުމުން މަސައްކަތް ފަދަ ގިނަ މަޝްރޫއުތައް ނުހިންގޭ ގޮތަށް މާލެ ސިޓީ ކައުންސިލް އޮތީ މަރުތަޅުއަޅުވާފައި ކަމަށް ސައިފް ވިދާޅުވިއެވެ.