އެމްޑީޕީގެ ރިޔާސީ ޕްރައިމަރީގެ ވޯޓުގެ ސައްހަކަން ކަށަވަރު ކުރުމަށްޓަކައި، އެ އިންތިހާބުގައި ވާދަކުރައްވާ އެމްޑީޕީގެ ރައީސް މުހައްމަދު ނަޝީދުގެ ފަރާތުން ރޭ ހުށަހެޅުއްވި ސިޓީއަކީ މީގެ ކުރިން ބޭއްވުނު ޗެއާޕާސަން އިންތިހާބުގައި، އެ އިންތިހާބުގައި ވާދަކުރެއްވި މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ގެ ފަރާތުން ވެސް ހުށަހެޅުއްވި ސިޓީ ކަމަށް އިންތިހާބު ކޮމިޓީން ބުނެފިއެވެ. 

ރިޔާސީ ޕްރައިމަރީގެ އިންތިޚާބާއި ގުޅިގެން މިއަދު އޮތް އިންތިހާބު ކޮމިޓީގެ ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ ކޮމިޓީގައި ހިމެނިވަޑައިގަންނަވާ އެމްޑީޕީގެ ޗެއާޕާސަން ގެ ނާއިބު، އިބްރާހީމް ވަހީދު (އިބުރޭ) ވިދާޅުވީ ރައީސް ނަޝީދުގެ އެ ސިޓީ އަކީ ޕްރައިމަރީ އާއި ގުޅިގެން ފޮނުވި ސިޓީއެއް ކަމަށް ނުބެލެވޭ ކަމަށެވެ. 

"އޭގައި ތާރީޚް އިނީ 2022 ވަނަ އަހަރުގެ އޭޕްރިލް މަސް ދެއްތޯ؟ އެއީ ޕްރައިމަރީ އާއި ގުޅިގެން ފޮނުވި ސިޓީއެއް ނޫން ކަންނޭނގެ. އެއީ ހަމަ ކުރީފަހަރު، އަޅުގަނޑު ކެންޑިޑޭޓެއްގެ މެނޭޖަރަކަށް އޭރު ހުރީމަ، ޗެއާޕާސަން އިންތިހާބުގައި ވެސް ހަމަ ތި ސިޓީ ތިގޮތަށް ހަމަ ފޮނުއްވާފައި އޮތީ. އެހެން ވީމާ އެއީ ކޮންމެ އިންތިހާބަކާ ގުޅިގެން އަންނަ ސިޓީ އެއް ކަންނޭނގެ އެ ސިޓީ އަކީ." އިބުރޭ ވިދާޅުވިއެވެ. 

Advertisement

އިބުރޭ ވިދާޅުވީ، ރައީސް ނަޝީދުގެ އެ ސިޓީގައި އެދިފައިިވާ ކަންކަނަ މިވަގުތު ކޮށް ދެވޭނެ ކަމަށް ހީނުވާކަމަށެވެ. 

އަދި އެ ސިޓީގައި އެމްޑީޕީގެ ކުރީގެ ޗެއާޕާސަން ހަސަން ލަތީފް ސޮއިކުރައްވާފައިވާކަން ފާހަގަކުރައްވަމުން އިބުރޭ ވިދާޅުވީ، ހަސަންގެ ޗެއާޕާސަން ކަމުގައިވެސް އަދި އޭގެ ފަހުންވެސް އަދި މިހާރުވެސް، އެ ސިޓީގައި އެދިފައިވާ ކަންކަން ކުރަމުން އަންނަ ކަމަށެވެ. 

އެހެންކަމުން ރައީސް ނަޝީދު ގެ ޓީމުން އެދެން ވާނީ އެސިޓީގައި އެދިފައި ހުރި ކަންކަމުގެ ތެރެއިން މިހާރު ނުކުރެވި ހުރި ކަންކަމަކީ ކޮބައިތޯ އެކަންކަން ކޮށްދެއްވުމަށް ކަމަށްވެސް އިބުރޭ ވިދާޅުވިއެވެ. 

"ދެން އޭގައި އެ އިންނަނީ ދެ ކެންޑިޑޭޓުން ސޮއި ކޮށްގެން ލިސްޓް ތައްޔާރު ކުރަން. އެ ސިޓީ އަޅުގަނޑުމެންނަށް ލިބުނީ ރޭ 9:43 ގައި. އެހާއިރު މިހާރު ހުރިހާ ލިސްޓު ތަކާއި އެއްޗެހި ޑިސްފެޗް ކޮށް ނިމިއްޖެއޭ. އެހެންވީމާ ކުރެވޭނެ ކަންތައް ތަކާއި ނޫނީ ކޮށް ނިމިފައިހުރި ކަންތައްތައް ވެސް ކުރަންވީ ކަންކަން ގޮތުގައި މި ލިޔަނީ. އެއީ 25 އޭޕްރިލް 2022 ގައި ލިޔެފައި އޮތް ސިޓީއެއް ވިއްޔާ ކޮންމެހެން ރޭގެ 9:43 ފޮނުވާނެވެސް ކަމެއް ނެތް ކަންނޭނގެ. އޮފީސް ބަންދު ގަޑިއެއްގައި." އިބުރޭ ވިދާޅުވިއެވެ.  

އިބުރޭ ވިދާޅުވީ، ރައީސް ނަޝީދު ގެ ކެންޕެއިން ޓީމުގައި ހިމެނިވަޑައިގަންނަވާ އެމްޑީޕީ މެންބަރުންނަށްވެސް ޕާޓީގެ ކަންކަން ކުރިއަށްދާ ގޮތް އެނގިލައްވާނެ ކަމަށާ، އަދި އެ ސިޓީގައި ލިޔެފައިވާ ގިނަ ކަންކަމަކީ މިހާރުވެސް ކުރަމުން އަންނަ ކަންކަން ކަމަށެވެ. އަދި އެ ސިޓީގައި އެދިފައިވާ ކަންކަމުގެ ތެރެއިން ޕާޓީގެ އުސޫލުތަކުގައި ހިމެނޭ ކަންކަން، އެފަދައިން ސިޓީ އެއް ނުފޮނުވި ނަމަވެސް ކުރައްވާނެ ކަމަށްވެސް އޭނާ ވިދާޅުވި އެވެ.