ދިވެހިރާއްޖެއިން ބޭރުކުރާ މަހުން ނަގާ ޑިއުޓީ ވަރަށް އަވަހަށް ކަނޑާލާނެކަމުގެ ޔަގީންކަން ދެއްވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެ އެވެ. 

ބުރާސްފަތި ދުވަހުގެ ރޭ އައްޑޫ ސިޓީގައި އޮތް އެމަނިކުފާނުގެ ޖަލްސާއެއްގައި ވާހަކަދައްކަވަމުން ރައީސް ޞާލިހު ވިދާޅުވީ ރާއްޖެއިން ޔޫރަޕަށާއި އިނގިރޭސި ވިލާތަށް ބޭރުކުރާ މަހުން މިހާރު 24 ޕަސެންޓުގެ ޑިއުޓީއެއް ނަގަމުންދާ ކަމަށެވެ.

އިންޑިއާ ކަނޑުގެ ގިނަ ގައުމުތަކުން މި ޑިއުޓީ ދައްކަން ނުޖެހޭއިރު، ދިވެހިރާއްޖެއިން ބޭރު ކުރާ މަހުން ޑިއުޓީ ދައްކަން ޖެހުމަކީ މަސްވެރިކަމުގެ ސިނާއަތަށް އޮތް ގޮންޖެހުމެއްކަމަށް ރައީސް ޞާލިހު ވިދާޅުވިއެވެ. 

Advertisement

އެއާއެކު އެމަނިކުފާނު ވިދާޅުވީ ޔޫރަޕާއި އިނގިރޭސި ވިލާތަށް ބޭރުކުރާ މަހުން ނަގާ ޑިއުޓީ ކަނޑާލިކަމުގެ އިއުލާނު ވަރަށް އަވަހަށް ލިބިގެންދާނެ ކަމަށެވެ. 

އައްޑޫ ސިޓީގައި އޮތް ޖަލްސާގައި ވާހަކަދައްކަވަމުން ރައީސް ޞާލިހު ވިދާޅުވީ މީގެ ކުރިން އެއްވެސް ސަރުކާރަކުން ނުކުރާ ވަރަށް އެމަނިކުފާނުގެ ވެރިކަމުގައި މަސްވެރިކަމުގެ ސިނާއަތަށް އިންވެސްޓު ކުރެވިފައިވާކަމަށެވެ. 

މިހާރު ސަރުކާރުން މަސައްކަތް ކުރަމުންދަނީ މަސްވެރިން ބާނާ މަސް ގަނެ، ފިނިކޮށް، ރައްކާކުރުވެނޭ ގޮތަށް ކެޕޭސިޓީ 4 ގުނައަށް ބޮޑުކުރުމުގެ މަސައްކަތްކަން ރައީސް ޞާލިހު ފާހަގަކުރެއްވިއެވެ. އަދި ވިދާޅުވީ  ހުޅުމީދޫގެ މަސް ފެކްޓްރީގައިވެސް ޖާގަ ޑަބަލް ކުރެވެން ހުރިކަމަށެވެ. މަސްވެރިންނަށް ލުއި ފަސޭހަކޮށްދީ މަސްވެރިން ބާނާ މަސް ކިރުމަށް މިފްކޯއިން އާ 3 ބޯޓުވެސް ވަނީ ގަނެފައެވެ. އަދި އެ ބޯޓުތައް ރާއްޖެ ގެނައުމުގެ މަސައްކަތް މިހާރު ކުރެވެމުންދާކަމަށް ރައީސް ޞާލިހު ވަނީ ވިދާޅުވެފަ އެވެ.