الله ސުބުޙާނަހޫވަތަޢާލާ މީސްތަކުން މެދުގައި ރިޒުޤު ބައްސަވާފައިވަނީ، އެކަކުގެ އަތުގައިވާ އެއްޗަކަށް އަނެކަކު ބޭނުންވާނޭ ފަދަ ގޮތަކަށް ކަމަށް މިއަދުގެ ހުކުރުޚުތުބާގައި ބުނެފިއެވެ.
“ޒަކާތަކީ އިސްލާމްދީނުގެ ރުކުނެކެެވެ" މައުޟޫއަށް އަލިއަޅުވާލައި މިއަދު އިއްވި ހުކުރު ޚުތުބާގައި ބުނީ، ޒަކާތް ވާޖިބުވާވަރުގެ ތަނަވަސްކަން ހުރި ހަމަކޮންމެ މީހަކުމެ ތިމާގެ މުދަލުން ޒަކާތް ދައްކަން ޖެހޭނެ ކަމަށެވެ.
“ ތަނަވަސްކަން ދެއްވާފައިވާ މީހާ ތިމާގެ މުދަލުން ނެރެންޖެހޭ ޒަކާތް އަދާނުކޮށްފިނަމަ ގަދަފަދަވެގެންވާ އަޒާބު ގިޔާމަތް ދުވަހުން ލިބޭނެކަން ބަޔާންކުރައްވާ މާތްالله ވަހީ ކުރައްވާފައިވެއެވެ.އަދި ރަނާރިހި ހަޒާނާކޮށް الله ގެ މަގުގައި އެތަކެތި ހޭދަނުކޮށް ތިބޭ މީހުން ދަންނާށެވެ. ފަހެ ވޭންދެނިވި އަޒާބު ހުރި ކަމުގެ ހަބަރު އެއުރެންނަށް ކަލޭގެފާނު ދެއްވާށެވެ! ( އެގޮތުގެ މަތިން އެމީހުން އެއްކުޅަ ރަންރިހީގެ ހަޒާނާ) އެދުވަހުން ނަރަކައިގެ އަލިފާނުން ދޮންކުރައްވައި، އެތަކެތިން އެއުރެންގެ ނިތްކުރިތަކުގައްޔާއި، އަރިކަށިތަކުގައްޔާ، ބުރަކަށިތަކުގައި، ފާހަގަލައްވަމުން ގެންދަވާނެތެވެ. ( އަދި އަންގަވާނެތެވެ ) މިހިރީ، ތިޔަބާ މީހުންގެ އަމިއްލަ ނަފުސަށްޓަކައި ތިޔަބައިމީހުން އެއްކޮށް ހަޒާނާކުޅަ ތަކެއްޗެވެ! ފަހެ ތިޔަބައިމީހުން ހަޒާނާކޮށް އުޅުނު ތަކެތީގެ ރަހަދެކޭށެވެ”. ޚުތުބާގައި ބުނެފައިވެއެވެ.
މިއާއެކު ޚުތުބާގައި ބުނީ، ތަނަވަސްކަމާއި، ރޯދިބަރަކާތް މާތްالله ދެއްވާފައިވަނީ، އެކި މީހުންނަށް އެކި މިންވަރަށް ކަމަށެވެ. އަދި އެކަމުގައި މަތިވެރިގެންވާ އިލާޙީ ޙިކުމަތްތަކެއް ވާ ކަމަށާ الله އިރާދަކުރެއްވި ނަމަ އެންމެންނީ އެއްވަރެއްގައި ތަނަވަސް ބަޔަކު ކަމުގައި ލެއްވީސް ކަމަށެވެ.
އެހެން ނަމަވެސް އެކަލާނގެ މީސްތަކުން މެދުގައި ރިޒުޤު ބައްސަވާފައިވަނީ، އެކަކުގެ އަތުގައިވާ އެއްޗަކަށް އަނެކަކު ބޭނުންވާނޭ ފަދަ ގޮތަކަށް ކަން ފާހަގަކޮށް ޚުތުބާގައި ވަނީ، އެއްބަޔަކު އަނެއް ބަޔަކަށް އެހީތެރިވުމަށް މާތް الله އަމުރުކުރައްވާފައިވާކަން ހަނދުމަ ކޮށްދީފައެވެ.
"އަދި ތަނަވަސްކަމުގެ އަހުލުވެރިންގެ މުދަލުން ޒަކާތް ނެންގެވުމަށް އެކަލާނގެ ރަސޫލާ އަށްވަނީ އަމުރު ކުރައްވާފައެވެ. ވަހީ ކުރައްވާފައިވާ ބަސްފުޅެއްގެ މާނަގައިވެއެވެ. “އޭގެ ސަބަބުން ކަލޭގެފާނު އެއުރެން ތާޙިރު ކުރައްވާނޭ، އަދި އެއުރެންނަށް ހެޔޮކަން އިތުރުކޮށްދެއްވާނޭ ޞަދަގާތެއް އެއުރެންގެ މުދަލުން ކަލޭގެފާނު ނަންގަވާށެވެ.”" ޚުތުބާގައި ބުނެފައިވެއެވެ.
Advertisement
This content is created and paid for by advertisers and does not involve Voice Journalists
