މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ރިޔާސީ ޕްރައިމަރީގެ ފޯރިގަދަ ކެމްޕޭނު ނިންމާލައިފިއެވެ. 

އެމްޑީޕީގެ ރިޔާސީ ޕްރައިމަރީގެ ވޯޓުލުން މާދަން އޮންނާނެއެވެ. މި އިންތިޚާބުގައި ވާދަކުރައްވަނީ ޕާޓީގެ ދެ ލީޑަރުންނެވެ. 

އެއްކޮޅުގައި ޕާޓީގެ އެންމެ އިސް ލީޑަރު، ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ހުންނެވިއިރު، އެމަނިކުފާނާއި ވާދަކުރައްވަނީ ޕާޓީގެ ރައީސް އަދި މަޖިލީހުގެ ރައީސް މުހައްމަދު ނަޝީދެވެ. 

Advertisement

އެމްޑީޕީގެ ރިޔާސީ ޕްރައިމަރީގައި ރާއްޖޭގެ ހުރިހާ ރަށެއްގައި ވޯޓު ފޮށިތައް ބެހެއްޓުމަށް ވަނީ ހަމަޖެހިފައެވެ. އަދި ވޯޓުލުމަށް ވާން ޖެހޭ ހުރިހާ ތައްޔާރީތަކެއް ވެފައިވާކަމަށް އެމްޑީޕީގެ އިންތިޚާބީ ކޮމެޓީއިން ވަނީ މައުލޫމާތު ދެއްވާފަ އެވެ. 

އެމްޑީޕީގެ ރިޔާސީ ޕްރައިމަރީގެ ކެމްޕޭނު މިއަދު ނިންމާލާފައިވާއިރު، މިއީ އާދަޔާއި ޚިލާފަށް ފޯރިގަދަ ކެމްޕޭނެއްކަން ފާހަގަކޮށްލެވެއެވެ. 

ރައީސް ނަޝީދު ގެ ކެންޕެއިން ނިންމާލުމުގެ ގޮތުން ބޭއްވި ހިނގާލުމުގެ ތެރެއިން--ފޮޓޯ: ވޮއިސް

ކެމްޕޭނުގައި ވާދަކުރައްވާ އެމްޑީޕީގެ ދެ ލީޑަރުންވެސް ވަނީ ރާއްޖޭގެ އެކި ހިސާބުތަކަށް ދަތުރުކުރައްވާފަ އެވެ. އަދި ފޯރިގަދަ ބޮޑެތި ކެމްޕޭނު ހަރަކާތްތަކެއް ދެ ރައީސުންވެސް ވަނީ ބާއްވާފައެވެ. 

މާދަމާ އޮންނަ ރިޔާސީ ޕްރައިމަރީއަށް ފަހު، ކުރިއަށް އޮތް ރިޔާސީ އިންތިޚާބުގައި އެމްޑީޕީއިން ނެރޭގެ ކެންޑިޑޭޓެއް ކަނޑައެޅިގެންދާނެއެވެ.

ރައީސް ޞާލިހު ގެ ކެންޕެއިން ނިންމާލުމުގެ ގޮތުން ބޭއްވި އެއްވުމުގެ ތެރެއިން--ފޮޓޯ: ވޮއިސް

އިންތިޚާބު ކާމިޔާބުކުރެވޭނެ ކަމުގެ ޔަގީންކަން ދެ ރައީސުންވެސް ދެއްވާއިރު، މާދަމާގައި ބާއްވާ އިންތިޚާބަށް ރާއްޖޭގެ ގިނަ ބައެއްގެ ސަމާލުކަން ވަނީ ހުއްޓިފައެވެ.

މާދަމާގެ އިންތިޚާބަކީ އެމްޑީޕީގެ ކުރިމަގު ކަނޑައަޅާނެ އިންތިޚާބަކަށް ވެގެންދާނެކަމަށް އިންތިޚާބުގައި ވާދަކުރައްވާ ދެ ރައީސުންވެސް ވަނީ ވިދާޅުވެފަ އެވެ.