މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރިޔާސީ ޓިކެޓު ލިބޭނެ ބޭފުޅަކު ކަނޑައެޅުމަށް ބާއްވާ ރިޔާސީ ޕްރައިމަރީގެ ވޯޓުލާން ފަށައިފިއެވެ. 

ވޯޓުލާން ފަށާފައިވަނީ މިއަދު 9:00 އިން ފެށިގެންނެވެ. އަދި މި އިންތިޚާބުގައި ވޯޓުލުން މިއަދުގެ 5:00 އާއި ހަމަޔަށް ކުރިއަށް ދާނެއެވެ. 

މި އިންތިޚާބަށްޓަކައި އެމްޑީޕީ އޮތީ ވަރަށް ފުރިހަމައަށް ތައްޔާރުވެފައިކަން ފާހަގަކޮށްލެވެއެވެ. 

އެގޮތުން މީހުން ދިރިއުޅޭ ހުރިހާ ރަށެއްގައި ވޯޓު ފޮށިތައް ވަނީ ބަހައްޓާފައެވެ. އެމްޑީޕީގެ ރިޔާސީ ޕްރައިމަރީގައި 283 ވޯޓުފޮށި ބަހައްޓާފައި ވާއިރު އޭގެތެރެއިން 87 ވޯޓު ފޮށި ބަހައްޓާފައި ވަނީ މާލޭގައެވެ. އަދި 196 ވޯޓު ފޮށި އަތޮޅުތެރޭގެ ރަށްރަށުގައި ބަހައްޓާފައި ވެއެވެ. 

ވޯޓުފޮށިތައް ބަހައްޓާފައި ވަނީ މާލެއާއި އަތޮޅުތެރޭގެ ސުކޫލުތަކުގައެވެ. ވޯޓު ލުމުގެ ހައްގު ލިބޭ ފަރާތްތަކަށް އެމީހަކު ރަޖިސްޓްރީވެފައިވާ ވޯޓު ފޮށި އެސްއެމްއެސްއެއް ކޮށްލައިގެން ބަލާލެވޭނެ މަގު ވަނީ ފަހިކޮށްފަ އެވެ. 

އެމްޑީޕީގެ ރިޔާސީ ޕްރައިމަރީގެ ވޯޓުލުން ފެށިގެން ކުރިއަށްދާއިރު މި އިންތިޚާބުގައި ވާދަކުރައްވަނީ ޕާޓީގެ ދެ ލީޑަރުންނެވެ. އެއްކޮޅުގައި ރައީސުލްޖުމްހޫރިއްޔާ އަދި ޕާޓީގެ އެންމެ އިސް ލީޑަރު އިބްރާހިމް މުހައްމަދު ޞާލިހު ހުންނެވިއިރު، އަނެއްކޮޅުގައި ހުންނެވީ މަޖިލީހުގެ ރައީސް އަދި ޕާޓީގެ ރައީސް މުހައްމަދު ނަޝީދެވެ. 

އިންތިޚާބުގެ ވޯޓުލުން މިއަދު ފަށާފައިވަނީ ފޯރިގަދަ ކެމްޕޭނަކަށް ފަހުގައެވެ.

މި އިންތިޚާާބާއި ގުޅިގެން އެމްޑީޕީއަށް ބޮޑެތި ބަދަލުތަކެއް އަންނާނެކަމަށް ސިޔާސީ މަޝްރަހު ދިރާސާ ކުރައްވާ ފަރާތްތައް ގެންދަވަނީ ވިދާޅުވަމުންނެވެ. އަދި އެއާއެކު އެމްޑީޕީގެ ރިޔާސީ ޕްރައިމަރީއަށް ގިނަ ބައެއްގެ ޝައުގުވެރިކަން ވަނީ ހުއްޓިފައެވެ.