ރިޔާސީ އިންތިހާބުގައި އެމްޑީޕީގެ ޓިކެޓުގައި ވާދަކުރާ ކެންޑިޑޭޓުން ހޮވުމަށް އެމްޑީޕީން ބާއްވާ ޕްރައިމަރީގައި ކުރީގެ ރައީސް މުހައްމަދު ނަޝީދު ވޯޓު ލައްވައިފިއެވެ.

އެމްޑީޕީގެ ރިޔާސީ ޕްރައިމަރީގައި ނަޝީދުއާ ވާދަކުރައްވަނީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހެވެ.

އެމްޑީޕީގެ ރިޔާސީ ޕްރައިމަރީގެ ވޯޓުލާން ފަށާފައި ވަނީ ހެނދުނު 9:00ގައެވެ.  އަދި މި އިންތިޚާބުގައި ވޯޓުލުން މިއަދުގެ 5:00 އާއި ހަމަޔަށް ކުރިއަށް ދާނެއެވެ. 

Advertisement

މި ޕްރައިމަރީގައި މީހުން ދިރިއުޅޭ ހުރިހާ ރަށެއްގައި ވޯޓު ފޮށިތައް ވަނީ ބަހައްޓާފައެވެ.

ޖުމުލަ 283 ވޯޓުފޮށި ބަހައްޓާފައި ވާއިރު އޭގެތެރެއިން 87 ވޯޓު ފޮށި ބަހައްޓާފައި ވަނީ މާލޭގައެވެ. އަދި 196 ވޯޓު ފޮށި އަތޮޅުތެރޭގެ ރަށްރަށުގައި ބަހައްޓާފައި ވެއެވެ. 

އިންތިޚާބުގެ ވޯޓުލުން މިއަދު ފަށާފައިވަނީ ފޯރިގަދަ ކެމްޕޭނަކަށް ފަހުގައެވެ.

މި އިންތިޚާާބާއި ގުޅިގެން އެމްޑީޕީއަށް ބޮޑެތި ބަދަލުތަކެއް އަންނާނެކަމަށް ސިޔާސީ މަޝްރަހު ދިރާސާ ކުރައްވާ ފަރާތްތައް ގެންދަވަނީ ވިދާޅުވަމުންނެވެ. އަދި އެއާއެކު އެމްޑީޕީގެ ރިޔާސީ ޕްރައިމަރީއަށް ގިނަ ބައެއްގެ ޝައުގުވެރިކަން ވަނީ ހުއްޓިފައެވެ.