އެމްޑީޕީގެ ރިޔާސީ ޕްރައިމަރީގައި ބަހައްޓާފައި ހުރި ވޯޓު ފޮށިތަކަށް ގެއްލުންދޭ މީހުންނާއި ދޭތެރޭގައި އަޅަން ޖެހުނު ކޮންމެ ފިޔަވަޅެއް އަޅައިގެންވެސް މި އިންތިޚާބު ކުރިއަށް ގެންދާނެކަމަށް އެ ޕާޓީއިން ބުނެފިއެވެ.
އެމްޑީޕީގެ ރިޔާސީ ޕްރައިމަރީގެ ވޯޓުލުން މިއަދު ހެނދުނު ފަށާފައިވާއިރު، ވޯޓުގެ ނަތީޖާ ގަޑުބަޑުކުރުމަށް ގިނަ މަސައްކަތްތަކެއް ކުރަމުންދާކަމަށް މި އިންތިޚާބުގައި ވާދަކުރައްވާ މަޖިލީހުގެ ރައީސް މުހައްމަދު ނަޝީދުގެ ޓީމުތަކުން ގެންދަނީ ތުހުމަތުކުރަމުންނެވެ.
އަދި ވޯޓުލުމުގެ ތެރޭގައި ފެންމަތިވި އެފަދަ މައްސަލަތަކާއި ގުޅިގެން، ބައެއް ވޯޓު ފޮށިތައް ފަޅާލާ، ވޯޓުލުން ހުއްޓުވާފައިވާކަން ފާހަގަކޮށްލެވެއެވެ. ވޯޓު ފޮށިތަކަށް ގެއްލުން 3 މީހަކު މިހާރު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
އެތެރޭގެ އިންތިޚާބާއި ގުޅިގެން އުފެދެމުންދާ ހަމަނުޖެހުންތަކާއި ގުޅޭގޮތުން އެމްޑީޕީގެ ރަސްމީ އެކައުންޓުން ކުރި ޓްވީޓެއްގައި ބުނެފައިވަނީ މިއަދު ކުރިއަށްދާ މި ޕާޓީގެ ރިޔާސީ ޕްރައިމަރީގައި ވޯޓުލާ މަރުކަޒުތަކުގައި ހުރި ވޯޓު ފޮށިތައް ފަޅާ އެކި ވަރުގެ ގެއްލުންތައް ދިނުމުގެ އެއްވެސް ހަރަކާތެއް ނުހިންގުމަށް އިންތިހާބުގައި ވާދަކުރައްވާ ދެ ކެންޑިޑޭޓުންގެ ޓީމުތަކަށާއި އެންމެހާ މެމްބަރުންނަށް އެމްޑީޕީއިން އިލްތިމާސް ކުރާކަމަށެވެ.
އެފަދަ ގެއްލުންތަކަކީ ޕާޓީއަށް ދެވޭ ގެއްލުންތަކެއް ކަމަށްވާތީ، އެފަދަ ފަރާތްތަކަށް އަޅަން ޖެހުނު ކޮންމެ ފިޔަވަޅެއް ޕާޓީއިން އަޅާނެމަށް އެ ޓްވީޓުގައި ވަނީ ބުނެފައެވެ. އަދި އެފަދަ ގެއްލުންތައް ދޭ ފަރާތްތަކަށް ފިޔަވަޅު އަޅައިގެންވެސް އެމްޑީޕީގެ ރިޔާސީ ޕްރައިމަރީގެ ވޯޓުލުން ކުރިއަށް ގެންދާނެކަމުގެ ޔަގީންކަން އެމްޑީޕީއިން ވަނީ ފީދައެވެ.
Advertisement
This content is created and paid for by advertisers and does not involve Voice Journalists
