މިއަދު ކުރިއަށްދިޔަ އެމްޑީޕީގެ ރިޔާސީ ޕްރައިމަރީގެ ވޯޓުލުމުގައި ގިނަ ފޮށިތަކުން މަތީ އެމަނިކުފާނު ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ޕްރައިމަރީގެ ނަތީޖާއާ ގުޅޭ ގޮތުން އެމްޑީޕީގެ ގްރޫޕްތަކަށް ނަޝީދު ފޮނުއްވި މެސެޖެއްގައި ވިދާޅުވީ، ގިނަ ފޮށިތަކުގެ ނަތީޖާ އިން ކުރީގައި އުޅުއްވަނީ އެމަނިކުފާނު ކަމަށާއި ބޮޑު ފަރަގެއް އެ ދައްކަނީ މަދު ބައެއް ތަންތަނުން އާދަޔާ ޚިލާފަށް ގިނަ ވޯޓު ފޮށީގައި ހުރުމުން ކަމަށެވެ.

އެމްޑީޕީގެ އިންތިހާބާ ބެހޭ ކޮމިޓީން ބުނީ 132 ވޯޓު ފޮށި ގުނައި ނިމި ނަތީޖާ އިއުލާންކޮށްފައިވާ ކަމަށެވެ.

Advertisement

އެމްޑީޕީގެ ރިޔާސީ ޕްރައިމަރީގެ މިހާތަނަށް ގުނި ވޯޓު ފޮށިތަކުގެ ޖުމުލަ ނަތީޖާ ދައްކާގޮތުން ރައީސް ޞާލިހަށް ލިބިފައިވަނީ %63 ވޯޓެވެ. އަދި ރައީސް ނަޝީދަށް ލިބިފައިވަނީ %37 އިންސައްތަ ވޯޓެވެ. 

މިހާތަނަށް ނަތީޖާ އިއުލާން ކޮށްފައިވާ ދާއިރާ ތަކުގެ ތެރޭގައި އާބާދީ ބޮޑު ދާއިރާތައްވެސް ހިމެނެއެވެ. އެހެންކަމުން، މި ނަތީޖާއިން ރައީސް ޞާލިހަށް އިންތިހާބު ކާމިޔާބު ވިކަން މިވަނީ ޔަގީންވެފަ އެވެ. 

މި އިންތިޚާބުގައި ރާއްޖޭގައި މީހުން ދިރިއުޅޭ ހުރިހާ ރަށެއްގައި 286 ވޯޓު ފޮށި ވަނީ ބަހައްޓާފަ އެވެ.