ކުރީގެ ރައީސް މައުމޫން އަބްދުލް ޤައްޔޫމުގެ ވެރިކަމުގައި ބާއްވަމުން އައި އިންތިހާބެއްގައި އެމަނިކުފާނު 93 އިންސައްތަ ހޯއްދެވީ މާ މަދު ސިޔާސީ މަގާމުތައް އުފައްދަވައިގެން ކަމަށް ވިދާޅުވެ، ރ.އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ)، އިއްޔެ ބޭއްވި އެމްޑީޕީގެ ރިޔާސީ ޕްރައިމަރީ އާއި އެ އިންތިޚާބާއި، އަޅައިކިޔުއްވައިފިއެވެ. 

ރައީސް އިބްރާހީމް މުހައްމަދު ޞާލިހާއި ރައީސް މައުމޫނު އެކުގައި ތިއްބެވި ފޮޓޯއަކާއި އެކު ވައްޑެ މިއަދު ކުރެއްވި ޓުވީޓެއްގައި ވިދާޅުވީ، ރައީސް މައުމޫން މާ މަދު ސިޔާސީ މަޤާމުތަކަކާ، މާ މަދު ކުންފުނިތަކަކާ، މާ ކުޑަ ބަޖެޓަކާ، މާ މަދު މީޑިޔާގެ ވަސީލަތްތައް ބޭނުންކުރައްވައިފެން އިންތިހާބުތަކުގައި 93 އިންސައްތަ ނެންގެވިކަމަށެވެ.

އެކަމަކު އެއީ އިންސާފުވެރި އިންތިހާބުކަމަށާ ޑިމޮކްރެސީ ކަމަށް އެކަކުވެސް ގަބޫނުކުރާ ކަމަށް ވައްޑެ ވިދާޅުވިއެވެ.

Advertisement

އިއްޔެ ބޭއްވި އިންތިހާބުގައި ރައީސް ޞާލިހަށް 61 އިންސައްތަ ވޯޓު ލިބިލެއްވި އިރު އެމަނިކުފާނާއި ވާދަކުރެއްވި އެމްޑީޕީގެ ރައީސް މުހައްމަދު ނަޝީދަށް ލިބިވަޑައިގަތީ 39 އިންސައްތައެވެ.

އިންތިހާބުގެ ކެމްޕެއިން ފެށުނީއްސުރެ ވެސް ނަޝީދުގޭ ފެކްޝަނުން ވަނީ، ރައީސް ޞާލިހު ބާރުގެ ބޭނުން ނާޖާއިޒު ގޮތުގައި ކުރައްވަމުން ގެންދަވާކަމަށް ތުހުމަތު ކުރައްވާފައެވެ.

އެގޮތުން، ދައުލަތުގެ މީޑިއާ ބޭނުން ކޮށްގެން ކެންޕެއިން ކުރެއްވުމާއި، ސަރުކާރުގެ ކުންފުނިތަކުން އިއުލާން ނުކޮށް މީހުންނަށް ވަޒީފާތައް ދިނުމާއި އަދި ސިޔާސީ މަގާމުތައް އުފެއްދުން ފަދަ ކަންކަން ކުރައްވަމުންދާ ކަމަށް ތުހުމަތު ކޮށްފައިވެއެވެ.

އަދި އިއްޔެގެ އިންތިހާބުވެސް ގަޑުބަޑުކޮށް، ބައެއް ވޯޓު ފޮށިތަކުގެ ނަތީޖާ ޝީޓުތަކުގައި ވޯޓުލީ މީހުންގެ ޖުމްލަ އަދަދާއި ފޮއްޓަށް ވޯޓުލެވޭނެ މީހުންގެ އަދަދު ދިމާނުވާކަން ނަޝީދުގެ ޓީމުން ވަނީ ފާހަގަކޮށްފައެވެ. އެކަންތައްތަކަށް ރިއާޔަތްކުރައްވައި ރައީސް ނަޝީދު ވަނީ ވަރަށް ގިނަ ފޮށިތަކުގެ ނަތީޖާ އެހެން ކަމުން ބާތިލުވާނެ ކަމަށް ވިދާޅުވެފައެވެ.