ވެރިކަމަކީ ގަދަބާރުން ހޯދޭނެ އެއްޗެއް ނޫން ކަމަަށް ވިދާޅުވެ ހޯމް މިނިސްޓަރު ޢިމްރާންގެ ނުސީދާ ބަހުގެ ހަމަލާތަކެއް ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ރައްދު ކުރައްވައިފި އެވެ.
އިމްރާން ކުރެއްވި ޓުވީޓެއްގައި ވަނީ، ދިވެހިރާއްޖޭގެ ރައީސުލްޖުމްހޫރިއްޔާ ކަމުގެ މަގާމު އަދާކުރައްވާ ހިތްވާ ކޮންމެ ބޭފުޅަކަށް އެ މަގާމު ލިބޭ ނަމަ މިގައުމުގައި މިހާރު ކިތައް ރައީސުން ތިއްބަވާނެތޯ ސުވާލު ކުރައްވާފަ އެވެ.
"ވެރިކަމަކީ ގަދަބާރުން ހޯދޭނެ އެއްޗެއް ނޫން" ޢިމްރާން ވިދާޅުވިއެވެ.
މިމަހު 28 ވަނަ ދުވަހު ބޭއްވި އެމްޑީޕީގެ ރިޔާސީ ޕްރައިމަރީން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހާއި ވާދަކުރައްވައި ރައީސް ނަޝީދު ވަނީ ބަލިވެފަ އެވެ. އެއާއެކު އެމްޑީޕީގެ ޓިކެޓްގައި ރައީސުލްޖުމްހޫރިއްޔާ ކަމުގެ މަގާމަށް ކުރިމަތި ލުމުގެ ފުރުސަތު ނަޝީދަށް ވަނީ ގެއްލިފަ އެވެ.
މިކަމާއި ގުޅިގެން ނަޝީދުގެ ސަޕޯޓަރުން ވެސް ނުހަނު ކަންބޮޑުވުން ފާޅުކުރަމުން އަންނަ އިރު، އެމަނިކުފާނުގެ ކެންޕެއިން ޓީމުން އަންނަނީ އިންތިޚާބު ގަޑު ބަޑު ކޮށްފައިވާ ކަމަށް ތުހުމަތު ކުރައްވަމުންނެވެ.
އަދި މީގެ އިތުރުން، ރައީސް ނަޝީދު އިސްވެ ހުންނަވައި އައު ޕާޓީއެއް އުފައްދައި އެ ޕާޓީގެ ކެންޑިޑޭޓެއްގެ ގޮތުގައި އިންތިޚާބު ގައި އެމަނިކުފާނު ވާދަކުރައްވާނެ ކަމުގެ އަޑުތައް މިހާރު ވަނީ އަރާފައެވެ.
Advertisement
This content is created and paid for by advertisers and does not involve Voice Journalists
