އެމް.ޑީ.ޕީގެ ރިޔާސީ ޕްރައިމަރީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ކާމިޔާބު ކުރައްވައިފިކަމަށް ވިދާޅުވެ، މި ޕްރައިމަރީގައި ވާދަކުރެއްވި އެމް.ޑީ.ޕީގެ ރައީސް، ރައީސް މުޙައްމަދު ނަޝީދު ބަލި ޤަބޫލުކުރައްވައިފިއެވެ.

ރައީސް ނަޝީދު ބަލި ގަބޫލު ކުރައްވައި ރައީސް ޞާލިހަށް ތާއިދު ނުކުރައްވާކަން ހާމަކުރެއްވީ އެމްޑީޕީގެ ގައުމީ މަޖިލިސް ވަޓްސްއަޕް ގްރޫޕަށް މިއަދު ހެނދުނު ފޮނުއްވި މެސެޖެއްގައެވެ.

ރައީސް ނަޝީދު ގެ މެސެޖުގައި އެމަނިކުފާނު ވަނީ، ޕްރައިމަރީގެ ވޯޓުލުމުގައި ހިނގާފައިވާ އޮޅުވައިލުންތައް އެއްކިބާކޮށްފިނަމަ ރައީސް ޞާލިހަށް ލިބުނުކަމަށް ބުނާ ވަރަށް ގިނަ ވޯޓުތައް އުނިވާނެ ކަމަށެވެ.

Advertisement

"އެހެނަސް އަޅުގަނޑު ލަފާ ކުރަނީ ވޯޓް ލީ ވޯޓާސް ލިސްޓަށް ބަލައިފިނަމަ ކުޑަ ފަރަގަކުން ރައީސް ޞާލިޙް މޮޅުވާނެ ކަމަށް.،" ރައީސް ނަޝީދު ވިދާޅުވިއެވެ.

މިއާއެކު އެމަނިކުފާނު ވަނީ، ރައީސް ޞާލިހާއިއެކު ގޮސް އެމްޑީޕީއަށް 2023 ވަނަ އަހަރުގެ ރިޔާސީ އިންތިހާބު ކާމިޔާބު ނުވާނެ ކަމަށްވެސް ވިދާޅުވެފައެވެ. 

މީގެ އިތުރުން، އަންނަ ރިޔާސީ އިންތިހާބުގައި ރައީސް ޞާލިހަށް ތާއީދު ކުރައްވަން އަދި ނުވިސްނަވާކަން ހާމަކުރައްވައި ނަޝީދު ފޮނުއްވި މެސެޖުގައި ވިދާޅުވީ އެމަނިކުފާނު ހުށަހަޅުއްވަނީ "ފިކުރެއްގެ ދިރުން" ނަމުގައި އެންޑީޕީގެ ގޮފިތައް ހުރިހާ ރަށެއްގައިވެސް އަލުން ހަދާ އެޕާޓީން ވަކި ކުރި 39،000 އަށް ވުރެ ގިނަ މީހުން އަލުން އެމްޑީޕީއާ ގުޅި އެމީހުންނާއެކު އެ ޓީމަށް ފެންނަ ގޮތް ނިންމުމަށްކަމަށެވެ.

އަދި 'ފިކުރެއްގެ ދިރުން'ގެ ފަރާތުން ތާއީދު ކުރާ ރިޔާސީ ކެނޑިޑޭޓެއް ކަނޑައަޅާނީ ފަހުންކަން ފާހަގަ ކުރައްވައި ރައީސް ނަޝީދު ވިދާޅުވީ ރިޔާސީ އިންތިޚާބުގެ ކުރިއަށް ޕާލިމަންޓަރީ ނިޒާމަށް ބަދަލުކުރުމަށް އެއްބަސްވާ ކެނޑިޑޭޓަކީ ތާއީދުކުރަން ފަސޭހަވާނެ ކެނޑިޑޭޓެއްކަމަށެވެ.

ރައީސް ނަޝީދު މިހެން ވިދާޅުވެފައިވާއިރު، ޕްރައިމަރީގެ ކެމްޕެއިންގައި ރައީސް ޞާލިޙް ވިދާޅުވެފައިވަނީ އެމަނިކުފާނު ތާޢީދު ކުރައްވަނީ ރިޔާސީ ނިޒާމަށްކަމަށެވެ.

ކުރިއަށްއޮތް ރިޔާސީ އިންތިޚާބުގައި އެމް.ޑީ.ޕީގެ ފަރާތުން ވާދަކުރައްވާނެ ރިޔާސީ ކެނޑިޑޭޓަކު ހޮވުމަށް މިދިޔަ ހޮނިހިރު ދުވަހު ބޭއްވި ރިޔާސީ ޕްރައިމަރީ އިންތިޚާބުގެ ވަގުތީ ނަތީޖާ ދައްކާގޮތުން، މި އިންތިޚާބު ކާމިޔާބުކުރައްވާފައިވަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ. އެމަނިކުފާނު ރިޔާސީ ޓިކެޓް ކަށަވަރުކުރައްވާފައިވަނީ ވޯޓުލީ މީހުންގެ %61 ވޯޓާއެކުއެވެ. އެއީ 24،572 ވޯޓެވެ. ރައީސް ނަޝީދަށް ލިބިވަޑައިގަތީ %39 ވޯޓެވެ.