އިރާންގެ ތެހެރާންގައި ހުންނަ އަޒަރުބައިޖާންގެ އެމްބަސީގައި ދިން ހަމަލާއަކީ ދެ ޤައުމުގެ ގުޅުމަށް ބުރުއަރަންޖެހޭ ކަމެއް ނޫން ކަމަށް އިރާނުން ބުނެފިއެވެ.
ތެހެރާންގައި ހުންނަ އަޒަރުބައިޖާންގެ އެމްބަސީގެ ތެރެއަށް ރައިފަލްއެއް ހިފައިގެން ވަދެ ދިން ހަމަލާގައި އެ އެމްބަސީގެ ހެޑް އޮފް ސެކިޔުރިޓީ ވަނީ މަރުވެފައެވެ. އަދި އެ އެމްބަސީގެ ދެ ގާޑެއްވެސް ވަނީ މި ހަމަލާގައި މަރުވެފައެވެ. މި ހަމަލާދީފައިވަނީ ހުކުރުދުވަހުއެވެ.
އިރާންގެ ރައީސް އިބްރާހިމް ރައީސީ އަޒަރުބައިޖާންގެ ރައީސް އިލްހާމް އަލިޔެވް އަށް ފޯނުން ގުޅައި ދެއްކެވި ވާހަކަފުޅުގައި ވަނީ ތައުޒިޔާ ވިދާޅުވެފައެވެ. އަދި މި ހަމަލާގެ ފަހަތުގައި ތިބީ ކޮން ބައެއްކަން ދެނެގަތުމަށް މައްސަލަ ތަހުޤީޤް ކުރެވޭނެ ކަމަށް ވަނީ ވިދާޅުވެފައެވެ.
"މި ހަމަލާގެ ސަބަބުން މި ދެޤައުމަށް ހެޔެނޭދޭ ބައެއްގެ އެދުމާއި އެއްގޮތަށް، ދެ ޤައުމުގެ ދެމެދުގައި ޤާއިމްވެފައި އޮތް ގުޅުމަށް ހީނަރުކަން އައިސްގެން ނުވާނެ" ރައީސީ ގެ އޮފިޝަލް ވެބްސައިޓްގައި ވެއެވެ.
"މިއީ ބަލައިގަނެވޭ އަދި ޤަބޫލްނުކުރެވޭ ފަދަ ކުށެއް، ދެ ޤައުމުގެ ދެމެދުގައި އޮތް ގުޅުން ކުރިއަށް ގެންދަންވާނީ މިފަދަ ކަންތައްތަކުގެ ސަބަބުން އެހެން ފަރާތްތަކަށް ދެ ޤައުމުގެ ގުޅުމުގެ ތެރެއަށް ނުވަދެވޭނެ ފަދައިން" އަޒަރުބައިޖާންގެ ރައީސް އިލްހަމް ވިދާޅުވެފައިވެއެވެ.
ހަމަލާދިން ވަގުތުގެ ސީސީޓީވީ ފުޓޭޖްތަކުން ދައްކާގޮތުން ހަމަލާދިން މީހާ ބާރު ދުވެލީގައި ކާރެއްގައި އައިސް އެމްބަސީ ކުރިމަތީގައި ޕާކު ކޮށްފައި އޮތް ވެހިކަލްއެއްގައި ޖައްސައެވެ. އަދި ކާރުން ފައިބައި ރައިފަލް ހިފައިގެން އެމްބަސީގެ ތެރެއަށް ވަންނަން އުޅުމުން އެނޭ ހިފެހެއްޓި ހެޑް އޮފް ސެކިޔުރިޓީ އަށް ހަމަލާ ދެއެވެ. އަދި އެއަށް ފަހު ދެ ގާޑުންނަށް ވެސް ހަމަލާ ދޭ ތަން ފެނެއެވެ.
Advertisement
This content is created and paid for by advertisers and does not involve Voice Journalists
