ޕީޕީއެމްގެ ރައީސް ޔާމީން އަބްދުލްގައްޔޫމު މިނިވަންކުރުމަށް ގޮވާލާ އިދިކޮޅުން މާލޭގައި ސުލްހަވެރި ހިނގާލުމެއް ބޭއްވުމަށް ނިންމައިފި އެވެ. 

މި ހަރަކާތަށް އިދިކޮޅުން ދީފައިވާ ނަމަކީ "ބުންވަރު" އެވެ. 

އިދިކޮޅު ކޯލިޝަނުން މި ހަކަރާތް އިއުލާނުކޮށްފައިވަނީ އަންނަ ފެބުރުއަރީ މަހުގެ 2-4 އަށް އެ ކޯލިޝަނުން މާލޭގައި ބާއްވާ ގައުމީ ކޮންފަރެންސްގެ ތެރެއިން ކުރިއަށް ގެންދިއުމަށް ހަމަޖެހިފައިވާ ހަރަކާތްތައް އިއުލާނުކުރުމަށް ބޭއްވި ޕްރެސް ކޮންފަރެންސްގަ އެވެ. 

އެގޮތުން އިދިކޮޅު ކޯލިޝަންގައި ހިމެނޭ ޕީއެންސީގެ ނައިބުރައީސް އިބްރާހިމް ޝުޖާއު ވިދާޅުވީ 3 ފެބުރުއަރީވާ ހުކުރު ދުވަހުގެ ހަވީރު 4:00 ގައި މާލޭގައި މި ހިނގާލުން ކުރިއަށް ގެންދިއުމަށް ނިންމާފައިވާކަމަށެވެ.

މި ހިނގާލުމުގައި ޕީޕީއެމްގެ "ހޯޕް" ކޮންފަރެންސްގައި ބައިވެރިވާ ހުރިހާ ފަރާތްތަކުގެ އިތުރުން އާންމު ރައްޔިތުން ބައިވެރިވާނެކަމަށް ޝުޖާއު ވިދާޅުވިއެވެ. އަދި މާލެ ކައިރި ސަރަހައްދުތަކުން އާދެވެން ތިބި އެންމެން މި ހިނގާލުމުގައި ބައިވެރިވުމަށް ވަޑައިގަތުމަށް ޝުޖާއު ވަނީ އެދިލައްވާފަ އެވެ. 

މި ހިނގާލުމާއި ގުޅޭގޮތުން އިދިކޮޅު ކޯލިޝަންގެ އެކްޝަން ޑިޕާޓުމަންޓުގެ ޗެއާ މުހައްމަދު އިސްމާއިލް ވިދާޅުވީ ހިނގާލުން ކުރިއަށް ގެންދިއުމާއި ގުޅޭގޮތުން ފުލުހުންނާއި ބައްދަލުކޮށްފައިވާކަމަށެވެ. އަދި ފުލުހުންގެ އެއްބާރުލުން މި ހަރަކާތަށް ލިބޭނެކަމުގެ ޔަގީންކަން ދެއްވާފައިވާކަމަށް މުހައްމަދު އިސްމާއިލް ވިދާޅުވި އެވެ. 

މުހައްމަދު އިސްމާއިލްވެސް ވަނީ މި ހިނގާލުމުގައި ވީހާވެސް ގިނަ ބަޔަކު ވައިވެރިވެވަޑައިގަތުމަށް އެދިވަޑައިގެންފަ އެވެ. 

އިދިކޮޅު ކޯލިޝަން ވަނީ އެ ކޯލިޝަނުން ބާއްވާ ހޯޕް ކޮންފަރެންސް ނިންމުމަށް މާލޭގައި ބޮޑު ޖަލްސާއެއް ބޭއްވުމަށްވެސް އިއުލާނުކޮށްފައެވެ. 

އެގޮތުން 4 ފެބުރުއަރީވާ ހޮނިހިރު ދުވަހު މާލޭ ކާނިވާ ސަރަހައްދުގައި "ދުއްޕާން" މި ނަމުގައި ބޮޑު ޖަލްސާއެއް ބޭއްވުމަށް އެ ކޯލިޝަނުން ވަނީ އިއުލާނުކޮށްފަ އެވެ. 

އިދިކޮޅުން ބުނީ މިއީ ޕީޕީއެމްގެ ރިޔާސީ ހަރަކާތްތަކަށް ތައްޔާރުވުމަށް ބާއްވާ ހޯޕް ކޮންފަރެންސް ނިންމާލުމުގެ ގޮތުން ބާއްވާ ޖަލްސާއެއް ކަމަށެވެ. މި ޖަލްސާގައި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމަށް ކުރިއަށް އޮތް ރިޔާސީ އިންތިޚާބު ކާމިޔާބުކޮށްދިނުމަށް ޕާޓީއިން ނިންމާފައިވާ ނިންމުންތައް ހިއްސާ ކުރެވިގެންދާނެކަމަށް އިދިކޮޅުން ވަނީ ބުނެފައެވެ. 

އަދި މި ޖަލްސާގައި ވީހާވެސް ގިނަ ބަޔަކު ބައިވެރިވެވަޑައިގަތުމަކީ އިދިކޮޅުގެ ވަރަށް ބޮޑު އެދުމެއްކަމަށްވެސް އެ ކޯލިޝަނުން ވަނީ ބުނެފައެވެ. 

އިދިކޮޅު ކޯލިޝަނުން ބުނީ 2023 ވަނަ އަހަރުގެ ރިޔާސީ އިންތިޚާބު ރައީސް ޔާމީނަށް ކާމިޔާބުކޮށްދިނުމަށް އެ ކޯލިޝަނުން ކުރެވެން ހުރި ހުރިހާ މަސައްކަތެއް ކުރަމުން ދާނެ ކަމަށެވެ. އަދި އިދިކޮޅުގެ އެ މަސައްކަތުގައި އާންމުން ބައިވެރިވެދިނުމަކީ ކޯލީޝަންގެ ވަރަށް ބޮޑު އެދުމެއްކަމަށް އިދިކޮޅުން ވަނީ ބުނެފައެވެ.