އިއްޔެ މޫދުގައި ހިނގި ހާދިސާ ގައި ދުނިޔެ ދޫކުރި ނިޝާހް އަބްދުލްޣަފޫރަކީ ހިތްވަރުގަދަ ކަމުގެ ލާމަސީލު ނަމޫނާއެއް ކަމަށް ރައީސުލް ޖުމްހޫރިއްޔާ އިބްރާހިމް މުޙައްމަދް ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ ނިޝާހް ގެ މަރާއި ގުޅިގެން އޭނަގެ އާއިލާއަށް ތައުޒިޔާ ކިޔުއްވައި ކުރެއްވެވި ޓްވީޓެއްގައެވެ.
" އިއްޔެ އަޅުގަނޑުމެންނާ ވަކިވެގެންދިޔަ ނިޝާހް ޢަބްދުލްޣަފޫރަކީ ހިތްވަރުގަދަކަމާއި އިންސާނިއްޔަތުކަމުގެ ލާމަސީލު މިސާލެއް، ސްކައުޓް އެސޯސިއޭޝަނަށް ރީތި ނަން ހޯދައިދިން ޒުވާނެއް، އެ މަރުޙޫމްގެ ފުރާނައަށް މާތް ﷲ ހެޔޮ ރަޙުމަތް ލައްވައި ޢާއިލާއަށް ކެތްތެރިކަން ދެއްވާށި" ރައީސްގެ ޓުވީޓްގައި ވެއެވެ.
އދ. އަތޮޅުގައި އޮންނަ މާފުށިވަރު ރިސޯޓު ކައިރިއަށް ސްނޯކްލިންއަށް ގޮސް އުޅެނިކޮށް އިއްޔެ ނިޔާވި ނިޝާހު އަބްދުލްޣަފޫރު ވަނީ 2018 ވަނަ އަހަރު އޭރު އުމުރުން 14 އަހަރުގެ ކުއްޖަކުގެ ފުރާނަ ސަލާމަތް ކޮށްދީފައެވެ.
ސްކައުޓެއް ކަމަށްވާ ނިޝާހު އާއި އިތުރު ސްކައުޓެއް ކަމަށްވާ އަލީ ފައުޒާންގެ މަސައްކަތުން ކުއްޖެއްގެ ފުރާނަ ސަލާމަތް ކޮށްދިނުމުން އެކަން ފާހަގަކޮށް 2019 ވަނަ އަހަރު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވަނީ އެދެކުދިންނަށް ހާއްސަ ހަނދާނީ ފިލައެއް ދެއްވާފައެވެ.
Advertisement
This content is created and paid for by advertisers and does not involve Voice Journalists
