ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހާއެކު އިއްތިހާދުވާނެ ބައެއް އަދިއެއް ފެންނާކަށް ނެތް ކަމަށް، ނިމިދިޔަ އެމްޑީޕީ ރިޔާސީ ޕްރައިމަރީގައި ވާދަކުރެއްވި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ނަޝީދު މިހެން ވިދާޅުވީ، ދިވެހިޗެނަލްގެ ޕްރޮގްރާމެއްގައި ވާހަކަ ދައްކަވަމުންނެވެ.

ނަޝީދު ވިދާޅުވީ ޕާޓީން ވަކިކުރެވުނު 39000 މީހުންގެ ވާހަކަ ކެމްޕޭން ތެރޭގަ ފާހަގައި ކުރަމުން ގެންދެވި ކަމަށާއި ގުނުންހުރި މީހުންނާއެކު ޖުމްލަ އަދަދު 70000ށް ވުރެ މައްޗަށް އަރާނެ ކަމަށެވެ.

Advertisement

"އެހެންވީމަ އެމްޑީޕީގެ ކެނޑިޑޭޓަށް ބޮޑު އަދަދެއްގެ ވޯޓު ނުލިބި ހުރެ އަދި ރުހުން ނެތި އިންތިހާބަށް ނިކުތުމަކީ ބުއްދިވެރިކަމެއް ނޫން. ޕާޓީ މިކަމާ ވަރަށް ބޮޑަށް ވިސްނަން ޖެހޭ،" ނަޝީދު ވިދާޅުވިއެވެ.

މީގެ އިތުރުން ނަޝީދު ވިދާޅުވީ އިިއްތިހާދު ޕާޓީތައް ރައީސް ޞާލިހަށް ތާއީދު ދެއްވާތަން ފެނިވަޑައި ނުގަންނަވާ ކަމަށާއި ރިޔާސީ އިންތިހާބުގައި ކޯލިޝަން އޮންނާނީ އެއްކޮށް ނޫން ކަމަށެވެ.

ސަބަބެއް ކަމަށް ނަޝީދު ފާހަގަ ކުރެއްވީ، 2018 ވަނަ އަހަރުގެ އިންތިހާބުގައި ހުރިހާ ސިޔާސީ ލީޑަރުން ތިއްބެވީ ހައްޔަރުގައި ކަމަށް ވުމުން، އެފަހަރު ހުރިހާ ސިޔާތީ ކެނޑިޑޭޓުންގެ ފަރާތުން އެއް ކެނޑިޑޭޓު ވާދަކުރީ ކަމަށާއި ނަމަވެސް މައުލޫމާތު ލިބިފަވާ ގޮތުގައި ކުރިއަށް އޮތް އިންތިހާބުގައި އެ ނިންމުން ދެމި ނޯންނާނެ ކަމަށެވެ.

"ރައީސް ޞާލިހާއެކު އިއްތިހާދު ވާނެ ބައެއް އަދިއެއް ފެންނާކަށެއް،" ނަޝީދު ވިދާޅުވިއެވެ.

އެމްޑީޕީގެ ތެރެއިން އެހާ ބޮޑުބައެއް އެއްކައިރިވެފައި ވަނިކޮށް އިއްތިހާދުގެ ޕާޓީތަކުގެ ތާއީދު ނެތި ރައީސް ޞާލިހު ރިޔާސީ އިންތިހާބަށް ކުރިމަތި ލައްވައިފިނަމަ އެމްޑީޕީން ވަރަށް ބޮޑު ދެރައަކާ ކުރިމަތިލާން ޖެހިދާނެ ކަމަށް ނަޝީދު ވިދާޅުވިއެވެ.