މި ޤައުމު މިއަދު ވެއްޓިފައިވާ ނިކަމެތި ހާލަތުން ސަލާމަތްކޮށްދެވޭނީ އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްޤައްޔޫމަށް ކަމަށް ޕީޕީއެމްގެ ނައިބު ރައީސް، އަދި ރައްޔިތުންގެ މަޖިލީހުގެ ތ.ގުރައިދޫ ދާއިރާގެ މެމްބަރު މުޙައްމަދު ޣައްސާން މައުމޫން ވިދާޅުވެއްޖެއެވެ.
ރައީސް ޔާމީން މިނިވަން ކުރުމަށް ގޮވާލާއި، އަންނަ ހުކުރު ދުވަހުގެ ހަވީރު، ޕީޕީއެމްގެ އޮފީސް ކުރިމަތިން ފެށުމަށް ހަމަޖެހިފައިވާ "ބުންވަރު" ހިނގާލުމަށް ދަޢުވަތު އަރުވައި ކުރެއްވި ޓްވީޓެއްގައި ޣައްސާން ވިދާޅުވެފައިވަނީ ރައީސް ޔާމީން މިނިވަން ކޮށް ވެރިކަމަށް އިންތިޚާބު ކުރުމަށް މަސައްކަތް ކުރުމުގެ ހިތްވަރު، ޕީޕީއެމްގެ ކިބައިގައި އެބަހުރި ކަމަށެވެ.
"ރައީސް ޔާމީން މިނިވަންކޮށް، ވެރިކަަމަށް އިންތިޚާބު ކުރުމުގެ މަސައްކަތުގައި ބައިވެރިވެވަޑައިގަތުމުގެ ދަޢުވަތު އެންމެހާ ރައްޔިތުންނަށް އަރުވަން." ޣައްސާން ވިދާޅުވި އެވެ.
ވ. އާރަށުގެ މުއާމަލާތާއި ގުޅުވާ ރައީސް ޔާމީންގެ މައްޗަށް އުފުލާފައިވާ ދައުވާތައް ސާބިތުވާކަމަށް ކަނޑައަޅާ އެމަނިކުފާނުގެ މައްޗަށް 11 އަހަރުގެ ޖަލުހުކުމެއް ކްރިމިނަލް ކޯޓުން ކުރުމާއި ގުޅިގެން އެއީ ހަރާމް ހުކުމެއް ކަމަށް ބުނެ އިދިކޮޅުން މިހާރުވެސް އަންނަނީ ސިލްސިލާ ކޮށް، ކޮންމެ ރެއަކު މާލޭގައި މުޒާހަރާ ކުރަމުންނެވެ.
އަދި ރައީސް ޔާމީނަށް ކޮށްފައިވަނީ ސިޔާސީ ހުކުމެއް ކަމަށާ، އެމަނިކުފާނު ވަރަށް އަވަހަށް މިނިވަންވެ ވަޑައިގަންނަވާނެ ކަމަށްވެސް އިދިކޮޅު ވަކީލުންގެ ޓީމުން ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
