އައްޑޫ ސިޓީ ފޭދޫ އިން ގޯތި ދޫކުރުން ކެންސަލް ކުރި ކަމަށް ދެކެވޭ ވާހަކަ އެކައުންސިލުން ދޮގުކޮށްފިއެވެ. 

އައްޑޫ ސިޓީ ފޭދޫއިން 1،500 އަކަފޫޓުގެ 300 ގޯތި ދޫކުރާ ކަން އެ ސިޓީ ކައުންސިލުން އިއުލާން ކުރީ މި ދިޔަ ޖަނަވަރީ މަހުގެ 24 ވަނަ ދުވަހު އެވެ. 

އެގޮތުން، ފޭދޫއިން ދޫކުރާ 300 ގޯތީގެ ތެރެއިން 90 ޕަސެންޓް، 270 ގޯތި ފޭދޫގެ ރައްޔިތުންނަށް ދިނުމަށް އިއުލާން ކޮށްފައިވާ އިރު، 30 ގޯތި ދޫކުރަނީ ފޭދޫ ފިޔަވައި އައްޑޫގެ އެހެން ރަށްތަކުގެ ރައްޔިތުންނަށެވެ.

އަދި ގޯއްޗަށް އެދޭ ފޯމު ބަލައިގަތުމަށް ހަމަޖެހިފައިވަނީ ފެބްރުއަރީ ދެވަނަ ދުވަހު (މާދަމާ) އިން 16 ވަނަ ދުވަހުގެ ނިޔަލަށް ރަސްމީ ބަންދު ނޫން ކޮންމެ ދުވަހެއްގެ ހެނދުނު 9:00 އިން މެންދުރު 1:00 އަށް އެ އަވަށެއްގެ އަވަށު އޮފީހުން ކަމަށް ވެސް ސިޓީ ކައުންސިލުން ބުނެފައިވެއެވެ. 

އެގޮތަށް އިއުލާން ގައި ވަނިކޮށް ބައެއް މީޑިއާ ތަކުން ފޭދޫ އިން ގޯތި ދޫކުރުން ކެންސަލް ކޮށްފައިވާ ކަމަށް ވަނީ ރިޕޯޓް ކޮށްފައެވެ. 

އެކަމާއި ގުޅިގެން އައްޑޫ ސިޓީ ކައުންސިލްގެ ފޭދޫ ދާއިރާ މެންބަރު އައިމިނަތު ސަލްމާ "ވޮއިސް" އަށް މައުލޫމާތު ދެއްވަމުން ވިދާޅުވީ އިއުލާނުގައިވާފަދައިން ފޭދޫއިން ގޯތި ދިނުމަށް ފޯމު ދޫކުރުން މާދަމާއިން ފެށިގެން ކުރިއަށް ދާނެ ކަމަށެވެ. 

"ގޯތި ދޫކުރުން ކެންސަލް އެއް ނުވޭ. އަޅުގަނޑުމެން ތައްޔާރުވަމުން މިދަނީ މާދަމާ ފޯމު ދޫކުރަން ފެށުމުގެ މަސައްކަތައް. އިއުލާނުގައިވެސް ވާނީ އެފަދައިން" ސަލްމާ ވިދާޅުވި އެވެ.