"ނަޒަރް ބީޑް" ނުވަތަ އެވިލް އައި ބީޑް އަކީ ޘަޤާފީ އެންޓޯލިއަން މިނާ ބޭނުންކޮށްގެން ހަދާ، މީހުންގެ ނުބައި ނަޒަރުން ނުވަތަ މީހުންގެ ހަސަދައިން ރައްކާތެރިވާ ކަމަށް ބުނެ ބޭނުންކުރާ އެއްޗެކެވެ. ދުނިޔޭގެ އެކި ކަންކޮޅުތަކުގައި މީހުންގެ ނުބައި ނަޒަރާއި ހަސަދައިން ރައްކާތެރިވމަށް އެކި ތަފާތު ކަންކަން ކޮށް އުޅޭ ފަދައިން އެވިލް އައި ބީޑް އަކީ ތުރުކިޔޭ ގައި ބޭނުންކޮށް އުޅޭ އެއްޗެކެވެ.

"ނަޒަރް" މި ބަހަކީ ޢަރަބި ބަހުން ބެލުން ނުވަތަ ފެނުމަށް ބޭނުންކުރާ ބަހެކެވެ.

ތުރްކިޔޭއާއި އަވައްޓެރި އެހެން ޤައުމު ތަކުގައި ހަސަދައާއި ނުބައި ނަޒަރުން ސަލާމަތް ވުމަށް އެވިލް އައި ބީޑް ބޭނުންކޮށް ހަދައެވެ. އަލަށް އުފަންވާ ކުދިންނާއި ތުއްތު ކުދިންގެ ކައިރީގައި ވެސް ނަޒަރް ބީޑް ބޭނުން ކޮށްހަދައެވެ.

ޘަޤާފީ ގޮތުން ބައެއްގެ ތެރޭގައި ބޭނުން ކޮށްއުޅުނު ނަޒަރް ބީޑް މިހާރު މިވަނީ ފެޝަނެއްގެ ގޮތިގައި ބޭނުން ކުރަން ފަށައިފައެވެ. ބޭރުން އަންނަ ހުރިހާ އަސަރެއް ކުޑަ ކުޑަ ދިވެހި މުޖްތަމަޢަށް ފޯރާހެން ނަޒަރް ބީޑް ނުވަތަ އެވިލް އައި ބީޑް އަޅައި އެ ބޭނުންކުރުން ވެސް މިހާރު މިވަނީ ދިވެހިންގެ ތެރޭގައި ޢާންމުވެފައެވެ.

އެވިލް އައި ބީޑް އެކުލެވޭ ތަފާތު ބާވަތްތައް 

އިސްލާމް ދީނުގައި މީހުންގެ ސުލޫކާއި އަޚްލާޤް އަދި ޤަބޫލުކުރުން ތައް ﷲ ނޫން އެހެން ފަރާތަކަށް ވަކީލް ކުރުމުގެ ދިމާއަށް ގެންދާ ކަމަށް ވާނަމަ އެއެއްޗެއް ނުވަތަ ކަމެއް ހުއްދަވެގެންނުވެއެވެ. މި ސަބަބާއި ހުރެ އެވިލް އައި ބީޑްސް ކަރުގައި އަޅައިގެން ނުވަތަ އެހެން ގޮތަކަށް ވިޔަސް އެއިން ރައްކާތެރިކަން ލިބޭނެ ކަމަށް ޤަބޫލް ކޮށްގެން އެ ބޭނުން ކުރުން ހުއްދަވެގެން ނުވެއެވެ.

ދެން އޮތީ ފެޝަނުގެ ނަމުގައި ނުވަތަ ރީތިވެގެން ނަޒަރް ބީޑް ނުވަތަ އެވިލް އައި ބީޑް އެޅުމެވެ. ފެޝަނުގެ ގޮތުގައި ނުވަތަ އެ ރީތިވެގެން އެޅުންވެސް ހުއްދަ ވެގެން ނުވެއެވެ. ސަބަބަކީ އެ އެއްޗަކީ ނަޒަރުން ސަލާމަތް ވުމަށް ބަޔަކު ބޭނުން ކުރާ އެއްޗަކަށް ވެފައި އެ އަޅައިގެން ހުންނަ ވަގުތު ކަމެއް ދިމާވާ ހިނދު ތިމާއަށް އޭގެން ރައްކާތެރި ކަން ލިބޭނެ ކަމަށް ޤަބޫލް ކުރެވޭ ފަދަ ހާލަތެއް އައިސްފާނެތީއެވެ.

އެހެނީ އިންސާނާ އަކީ ހަނދާން ނެތުމާއި ކުށްތަކަށް އަރަގަނެވޭ ބަޔަކަށް ވެފައި، އެފަދަ ހާލަތެއްގައި، ނަޒަރް ބީޑުން އޭނާ އަށް ރައްކާތެރިކަން ލިބޭނެ ކަމަށް ޤަބޫލު ކުރެވުމަކީ ޝިރުކަކަށް ވެ ފާފަވެރި ވެދާނެކަމުގެ ބިރު އޮތުމުން އެކަމުން ދުރުވެގަތުމަކީ އެންމެ ހެޔޮ އަދި މޮޅު ގޮތެވެ.

"ތިމަންނާ އެއަޅަނީ ފެޝަނަކަށޭ، ފެޝަނަކަށް ބޭނުުން ކުރަމުން ދިޔަޔަސް އެފަދަ ހާލަތެއް ދިމާވާ ވަގުތު ކުއްލިއަކަށް
 ހިތަށް އަރާފާނެ ތިމަންނާ މީތި އޮތީމަ ރައްކާތެރިވާނޭ، އެހިސާބުން އަސްލު އެއީ ޝިރުކުގެ ބާވަތެކޭ އެއީ، ﷲ ނޫން އެހެން ފަރާތަކަށް މަދަދު އެދުމާއި ވާގިއެދުން އެއީ އަޅުގަނޑުމެން މުސްލިމުނަށް ވީތީ ކޮށްގެން ވާނެ ކަމެއް ނޫން، އެހެންވީމަ އެ އަޤީދާ ހިތުގައި އަށަަގަނެފާނެތީ އެކަމުން ދުރުވާން ޖެހެނީ" އައްޝައިހް މުހައްމަދް އަފްޒަލް މިކަމާއި ގުޅިގެން މައުލޫމާތު ދެއްވަމުން ވިދާޅުވިއެވެ. 

ޝެއިހް އިތުރަށް ވިދާޅުވީ ފެޝަނުގެ ނަމުގައިވެސް ނަޒަރް ބީޑް ބޭނުން ކުރުން ހުއްދަ ވެގެން ނުވާނެ ކަމަށާއި އެފަދަ ކަންކަމާއި ދުރުހެލި ވާން ޖެހޭ ކަމަށެވެ.