ޤައުމީ ޝިޕިން ކުންފުނި، މޯލްޑިވްސް ސްޓޭޓް ޝިޕިން (އެމްއެސްއެސް)ގެ ބޯޓު އެމްވީ ގެލީނާ އަށް މިނިސްޓަރ ފޯ ޓްރާންސްޕޯޓް އެންޑް  ސިވިލް އޭވިއޭޝަން  އައިޝަތު ނަހުލާ ޒިޔާރަތް ކުރައްވައިފިއެވެ.

މިނިސްޓަރ ނަހުލާ އެ ބޯއްޓަން ވަޑައިގެން ބޯޓުގެ އޮންބޯޑުގެ މަސައްކަތްތައް ހިނގާ ނުހިގާގޮތް  ބައްލަވާލައްވައިފައިވެއެވެ. އެމްވީ ގެލީނާއަކީ އިންޑިޔާއާއި ލަންކާއާއި ރާއްޖެއާ ދެމެދު  މުދާ އުފުލުމަށް ބޭނުންކުރާ 680  ކޮންޓެއިނަރުގެ ބޯޓެކެވެ.

މިބޯޓަކީ އެމްއެސްއެސްގެ އަމިއްލަ ބޯޓެކެވެ. މިނިސްޓަރ، މި ބޯޓުގައި މަސައްކަތް ކުރައްވާ މުވައްޒަފުންނާއި އަދި އިސްވެރިނާއި ބައްދަލުކުރެއްވިއެވެ.

Advertisement

މި ބައްދަލުކުރެއްވުމުގައި، މިނިސްޓްރީގެ އިސްވެރިންނާއި އެމްއެސްއެސް ގެ  މެނޭޖިންގ ޑިރެކްޓަރ ކެޕްޓަން އަބްދުﷲ ސަޢީދާއި އެމްއެސްއެސްގެ އިސްވެރިންނާއި އެމްޕީއެލްގެ އިސްވެރިން ބައިވެރިވެ ވަޑައިގެންނެވިއެވެ.

މިނިސްޓަރ ދެއްކެވި ވާހަކަފުޅުގައި މިފަދަ ދިވެހިންގެ އަމިއްލަ ވަސީލަތްތައް އޮތުމުގެ ބޭނުންތެރިކަމާއި، ބޭނުންކުރުމާއި އަދި  ޚިދުމަތްތަކުގައި ވީހާވެސް ގިނަ ދިވެހިން ތިބުމުގެ މުހިއްމު ކަން  ފާހަގަކުރެއްވިއެވެ.

އަދި މިނިސްޓަރ އިތުރަށް ވިދާޅުވީ މިކަމުގައި ދިވެހިޒުވާނުން ބިނާކޮށް ބައިވެރިކުރުމަށްޓަކައި މިނިސްޓްރީ އިން ދެވެން އޮތް ފުރިހަމަ އެއްބާރުލުން ދެއްވާނެ ކަމަށާއި މިދާއިރާއަށް ސްކޫލް ކުދިން ޝައުގުވެރިކުރުވުމަށްޓަކައި މަދަރުސީ ދައުރުން ފެށިގެން ދަރިވަރުންނަށް މިފަދަ ކަންކަމާއި ގުޅޭ މަޢުލޫމާތު ދިނުމަކީ މުހިންމު ކަމެއް ކަމުގައެވެ.