ސަރުކާރުގެ މަގާމްތަކުގައި ތިބޭޭ ބޭފުޅުން ސަރުކާރުގެ ސިޔާސަތު ތަންފީޒު ނުކުރާނަމަ ފިޔަވަޅު އަޅާނެ ކަމަށް ރައީސް އޮފީހުގެ ތަރުޖަމާން މިއުވާން މުހައްމަދު ވިދާޅުވެއްޖެއެވެ.

މިއުވާން މިހެން ވިދާޅުވެފައިވަނީ މިއަދު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި "ވޮއިސް" އިން ކުރި ސުވާލަކަށް ޖަވާބު ދެއްވަމުންނެވެ.

އެގޮތުން "ވޮއިސް" އިން ސަރުކާރުގެ ސިޔާސީ މަގާމުގައި ތިއްބެވި ބޭފުޅުންގެ ތެރެއިން ސަރުކާރާއި ދެކޮޅަށް އަޑު އުފުލަމުންދާ ބޭފުޅުންނާއި ދޭތެރޭ ފިޔަވަޅު އެޅުމަށް ނިންމާފައިވޭތޯ ކުރި ސުވާލަށް ޖަވާބު ދެއްވަމުން މިއުވާން ވިދާޅުވެފައިވަނީ ސަރުކާރުގެ މުައްޒަފުންނަށްވެސް އަދި އެހެން ހުރިހާ ބޭފުޅުންވެސް ޚިޔާލު ފާޅުކުރުމާއި ސިޔާސީ ގޮތުން އެބޭފުޅެއްގެ ފިކުރު ފާޅު ކުރުމަކީ އެބެފުޅުންނަށް ލިިބިގެންވާ މިނިވަންކަމެއް ކަމަށެވެ.

Advertisement

އެހެންނަމަވެސް އެންމެންވެސް ގަބޫލް ކުރަން ޖެހޭ ހަގީގަތަކީ މި ސިޔާސީ މަގާމްތަކުގައި ތިއްބަވާ ބޭފުޅުންނަކީ ރައީސުލްޖުމްހޫރިއްޔާ އަށް ގާނޫނު އަސާސީގެ 115 ވަނަ މާއްދާގެ (ޅ) ގެ ދަށުން ލިބިވަޑައިގަންނަވާ ބާރުގެ ތެރެއިން އައްޔަން ކުރައްވާފައިވާ ބޭފުޅުން ކަމަށެވެ.

އަދި އައްޔަނު ކުރައްވާފައި މަޤާމްގައި އެބޭފުޅުން ތިއްބަވަނީ ރައިސުލްޖުމްހޫރިއްޔާ ނުވަތަ ސަރުކާރުގެ ސިޔާސަތު ތަންފީޒު ކުރުމަށް ކަމަށެވެ.

"ދެން އަޅުގަނޑަށް ހީވަނީ ކޮންމެސް ވަރަކަށް އަމިއްލަ ންފްސަށް ތެދުވެރިކަމެއްހެން އޮންނަން މި ޖެހެނީ. ގަބޫލް ނުކުރާ ސިޔާސަތު ތަންފީޒް ކުރަން މުސާރަ ނަގައިގެން އެބޭފުޅުން ތިއްބަވާނެ ހެނެއް އަޅުގަނޑަކަށް ހިޔެއް ނުވޭ. އެހެންވީމަ ސަރުކާރުގެ ސިޔާސީ މަގާމް ތަކުގަ ތިއްބަވާނި ސިޔާސަތުތައް ތަންފީޒު ކުރުމަށް ރުހި ވަޑައިިގަންނަވާ ބޭފުޅުން." މިއުވާން ވިދާޅުވިއެވެ.

މީގެ އިތުރުން މިއުވާން ވިދާޅުވީ ސަރުކާރުގެ ސިޔާސަތު ތަންފީޒު ކުރުމާ ދެކޮޅު ހައްދަވާ ބޭފުޅުން ވާނަމަ އަޅަންޖެހޭ ފިޔަވަޅުތައް ނުވަތަ ބަލަން ޖެހޭ ކަންކަން ބަލާނެ ކަމަށެވެ.