އިޓާލިއަން ކަޕްގެ ސެމީ ފައިނަލުގެ ފަހުޖާގަ ޔުވެންޓަސް އިން ހޯދައިފިއެވެ. މުބާރާތުގެ ކުއާޓާ ފައިނަލް ފަހު މެޗުގައި ރޭ ލާޒިއޯ އަތުން ޔުވެންޓަސް މޮޅުވީ 1-0 ގެ ނަތީއްޖާއަކުންނެވެ.

އިޓާލިއަން ކަޕްގެ ސެމީ ފައިނަލް ދެ ލެގަށް ކުޅޭއިރު، އަންނަ އޭޕްރީލް މަހުގެ ތެރޭގައި ކުޅޭ ސެމީގެ މެޗުތަކުގައި ޔުވެންޓަސް އިން ނުކުންނާނީ އިންޓަ މިލާނާ ދެކޮޅަށެވެ. ސެމީ ފައިނަލުގެ ދެވަނަ މެޗުގައި ވާދަކުރަނީ ފިއޮރެންޓީނާ އާއި ކްރެމޮނީސޭ އެވެ. އިޓާލިއަން ލީގުގެ ފުލުގައި އޮތް ކްރެމޮނީސޭ ސެމީ ފައިނަލުން ޖާގަހޯދީ ހޯސޭ މޮރީނިއޯ ކޯޗުކޮށްދޭ ރޯމާ އަތުން ކުއާޓާ ފައިނަލުގައި މޮޅުވެގެންނެވެ. އަދި އެޓީމު ވަނީ މުބާރާތުގެ ދެވަނަ ބުރުގައި މި ސީޒަނުގައި އަދަޔާ ޚިލާފު މޮޅުކުުމަކާއި އެކު އިޓާލިއަން ލީގުގެ އެއްވަނައިގައި އޮތް ނަޕޯލީ ވެސް ބަލިކޮށްފައެވެ.

ބްރެޒިލްގެ ޑިފެންޑަރު، ގްލެއިސަން ބްރެމާ ލަނޑުޖެހުމަށްފަހު އުފާ ފާޅުކުރަނީ

ޔުވެންޓަސް ދަނޑުގައި ރޭ ކުޅުނު ކުއާޓާ ފައިނަލްގެ ފަހު މެޗުގައި ފެނިގެންދިޔަ ހަމައެކަނި ގޯލު ފުރަތަމަ ހާފުގެ 44 ވަނަ މިނެޓުގައި ޔުވެންޓަސް އަށް ކާމިޔާބުކޮށްދިނީ އެޓީމުގެ ބްރެޒިލްގެ ޑިފެންޑަރު، ގްލެއިސަން ބްރެމާ އެވެ.

މި ގޯލަކީ ޔުވެންޓަސްގެ ސާބިއާ ވިންގް، ފިިލިޕް ކޮސްޓިޗް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ލީޑު ފުޅާކޮށްލުމަށް ލިބުނު ފުރުސަތުތަކުގެ ބޭނުން ޔުވެންޓަަސްގެ ކުޅުންތެރިންނަށް ނުހިފުނު އިރު ލާޒިއޯގެ ހަމަލާތައް ހުއްޓުވުމުގައި ޔުވެންޓަސްގެ ޑިފެންޑަރުން ވަނީ ރޭވުންތެރިކަމާއި އެކު މުޅި މެޗުގައިވެސް މޮޅުކުޅުމެއް ދައްކައިދީފައެވެ.

މި ފަހަރުގެ އިޓާލިއަން ކަޕްގެ ސެމީ ފައިނަލުގައި އިންޓަ އާއި ޔުވެންޓަސް ވާދަކުރަން ޖެހުނުއިރު، މިދިޔަ އަހަރުގެ މުބާރާތުގެ ފައިނަލުގައި ވާދަކުރީ ވެސް މި ދެޓީމެވެ. ފައިނަލުގައި ޕެނަލްޓީ ޖަހައިގެން ޔުވެންޓަސް ބަލިކޮށް އަށް ވަނަ ފަހަރަށް އިންޓަ މިލާނުން މުބާރާތް ކާމިޔާބުކުރި އިރު ޔުވެންޓަސް އިން ވަނި މި މުބާތާރުގެ ޗެންޕިއަންކަން 14 ފަހަރު ހޯދައިފައެވެ.