މަސްތުވާތަކެތި ބޭނުންކުރާ އެތައް ބަޔަކު އޯވަރޑޯޒްވެ މަރުވުމުގެ ސަބަބުން ކުށެއްނެތް އެތައް ކުދިންނެއް ވަނީ ޔަތީމުވެފައިވާ ކަމަށް މިއަދުގެ ހުކުރުޚުތުބާގައި ބުނެފިއެވެ. 

މިއަދުގެ ހުތުބާގައި އަލިއަޅުވާލާފައިވަނީ މަސްތުވާތަކެތީގެ ނުރައްކަލުގެ މައްޗަށެވެ. 

އެގޮތުން ޚުތުބާގައި ބުނީ، މަސްތުވާތަކެއްޗަކީ މުޅި އިންސާނިއްޔަތަށް ހުރި ބޮޑު ނުރައްކަލެއް ކަމަށާ، މިއަދު މި މުޖްތަމަޢުގައިވެސް ވަނީ މި ނުރައްކާތެރި ވަބާ ފެތުރި ޢާއްމުވެފައި ކަމަށެވެ.

Advertisement

އަދި ޤައުމުގެ ކުރިމަގު ކަމުގައިވާ ޒުވާނުންގެ ތެރެއިން ގިނަބަޔަކު މިވަނީ މިވަބާގައި ޖެހި، އެބައިމީހުންގެ އުއްމީދުތައް ވެއްޔާ މޮޑެވި މާޔޫސްވެފައިވާ ކަމަށްވެސް ޚުތުބާގައި ބުނެފައިވެއެވެ. 

"މި ވަބާގައި ޖެހިފައިވާ ފަރުދަކު ނުވާ ޢާއިލާއެއް މިއަދު އަޅުގަނޑުމެންގެ ތެރޭފައި މަދުވާނެއެވެ. މަސްތުވާތަކެތި ބޭނުންކުރާ އެތައް ބަޔަކު އޯވަރޑޯޒްވެ މަރުވުމުގެ ސަބަބުން ކުށެއްނެތް އެތައް ކުދިންނެއް ވަނީ ޔަތީމުވެފައެވެ. އެތައް އަންހެނުންނެއް ވަނީ ހުވަފެންވެފައެވެ. އެތައް ޢާއިލާތަކެއްގެ ދިރިއުޅުން ރޫޅި އެތައް ކުދިންނެއް ވަނީ ނިކަމެތިވެފައެވެ." ޚުތުބާގައި ބުނެފައިވެއެވެ. 

މީގެ އިތުރުން ޚުތުބާގައި ބުނީ، މަސްތުވާތަކެތިން ލިބޭ ގެއްލުން އެންމެ ރަނގަޅަށް އެނގޭނީ ހަމަ އެތަކެތި ބޭނުން ކުރާ މީހުންނަށް ކަމަށާ، އެމީހުން އެ ގެންދަނީ އެމީހުންގެ ހަށިގަޑު އަމިއްލައަތުން ހަލާކުކުރަމުން ކަމަށެވެ. އަދި އިސްލާމް ދީނުގައި އެހެން މީހުންނަށް ގެއްލުން ދިނުމާއި ގެއްލުން ލިބިގަތުންވެސް ވަނީ ޙަރާމް ކުރައްވާފައި ކަމަށް ޚުތުބާގައި ބުނެފައިވެއެވެ. 

މިއާއެކު ޚުތުބާގައި ވަނީ މަސްތުވާތަކެތީގެ ނުރައްކާ ބޮޑުކަމުން މިއާ ދެކޮޅަށް ދުނިޔޭގައި ހަނގުރާމަ ކުރަނީ މުސްލިމު ގައުމުތަކުން އެކަނި ނޫން ކަމަށާ، ވަރަށް ގިނަ ޣައިރު މުސްލިމު ގައުމުތަކުގައިވެސް މަސްތުވާތަކެތި އެތެރެކޮށް އޭގެ ވިޔަފާރި ކުރާ މީހުންނަށް މަރުގެ އަދަބުދޭ ކަމަށް ބުނެފައެވެ.

އެހެންކަމުން، މިރާއްޖޭގައިވެސް މަސްތުވާތަކެތި އެތެރެ ކުރާ މީހުންނާއި އޭގެ ވިޔަފާރި ކުރާމީހުންނަށް މިހާރު އޮންނަ އުގޫބާތަށްވުރެ ހަރުކަށި އުގޫބާތެއް ކަނޑައެޅުމަކީ ކޮންމެހެން ބޭނުންކަމެއް ކަމަށް ހުތުބާގައި ބުނެފައިވެއެވެ.