5 އަހަރު ބޭކާރުވެގެން ގޮސްފައިވާ ކަމަށާ، އެހެންކަމުން ދަރިންގެ މުސްތަގުބަލަށްޓަކައި ނަމަވެސް ކުރިއަށް އޮތް ފަސް އަހަރަށް ރައީސް ޔާމިން ވެރިކަމަށް އިންތިހާބު ކުރަންޖެހޭ ކަމަށް ޕީޕީއެމްގެ ނައިބުރައީސް އަދި މާލެ ސިޓީގެ މޭޔަރު ޑރ.މުޙައްމަދު މުޢިއްޒު ވިދާޅުވެއްޖެއެވެ.

‏މި އަހަރު އޮންނަ ރިޔާސީ އިންތިޚާބަށް ތައްޔާރުވުމަށް އިދިކޮޅު ޕްރޮގްރެސިވް ކޮންގުރެސް ކޯލިޝަނުން ދަރުބާރުގޭގައި ބާއްވަމުންދާ "ހޯޕް ކޮންފަރެންސް"ގެ ފުރަތަމަ ސެޝަނުގައި  މޭޔަރު ޑރ.މުޙައްމަދު މުޢިއްޒު ވަނީ، ރައީސް ޔާމީނުގެ ވެރިކަމުގައި ހަލުއިކަމާއެކު ތަރައްޤީ ގެނެވުނު ސަބަބުތައް ތަފްސީލް ކޮށްދެއްވާފައެވެ.

އެގޮތުން، ރައީސް ޔާމީނުގެ ވެރިކަމުގައި ހައުސިން މިނިސްޓަރުގެ މަގާމުގައި ހުންނެވި ޑރ.މުޢިއްޒު ވިދާޅުވީ ރައީސް ޔާމީނުގެ ވެރިކަމުގައި އެމަނިކުފާނަކީ މަސައްކަތްތައް ކުރިއަށްދާ ގޮތް ކޮންމެ ދުވަހަކުވެސް ބެއްލެވި ބޭފުޅެއް ކަމަށެވެ. ކޮންމެ ދުވަހަކުވެސް ވުޒާރާތަކައި ކުންފުނިތަކުގެ ވެރިންނަށް ގުޅުއްވައި މަސައްކަތްކުރިއަށްދާ ގޮތް ބެއްލެވުމުގެ އިތުރަށް ބޭނުންފުޅުވާ ވަގުތެއްގައި އެ ބޭފުޅުން އޮފީހަށް ގެންދަވައިގެން ވަކިންނާއި އެކީގައި ބައްދަލުކުރައްވައި މަސައްކަތުގެ އަދާހަމަ މައުލޫމާތު އޮޅުންފިލުއްވައި އިރުޝާދު ދެއްވާ ކަމަށެވެ. 

މިއާއެކު މުއިއްޒު ވަނީ ރައީސް ޔާމީންގެ ވެރިކަމުގައި 4 މަސް ދުވަހުގެ ތެރޭގައި ރަސްފަންނު ހަދައި ނިންމެވި ގޮތަށް އަލިއަޅުވާލައްވައި، އެމަނިކުފާނުގެ ރޭވުންތެރިކަމާއި، މަސައްކަތުގެ ހަލުވި ކަމަށް ތައުރީފް ކުރައްވާފައެވެ. އެގޮތުން އެ މަޝްރޫޢު ނިންމެވުމަށް 4 މަސް ދުވަސް ދެއްވައި، އެކަމަށް ބޭނުންވާ ހުރިހާ ކުންފުނިތަކާއި އިދާރާތައް އެއްކުރައްވައި މަސައްކަތްކުރަން އިރުޝާދުދެއްވައި ވަރަށް ގާތުން މަސައްކަތް ބައްލަވައި ދަތިވާ ކޮންމެ ކަމެއް ހައްލުކޮށްދެއްވިކަމަށް ޑރ.މުއިއްޒު ވިދާޅުވިއެވެ.

ރައީސް ޔާމީންގެ ވެރިކަމުގައި އެމަނިކުފާނު ކުރެއްވި ތަރައްޤީގެ އެންމެހައި ބޮޑެތި މަޝްރޫއުތަކަށް އަލިއަޅުވާލައްވައި ޑރ.މުއިއްޒު ވަނީ އެ މަނިކުފާނުގެ ސަރުކާރާއި މި ސަރުކާރުގެ ތަފާތާއި މެދުވެސް އަޅައި ކިޔުއްވާފައެވެ. އަދި އެފަދަ ސަބަބުތަކާހުރެ ޕީޕީއެމުން މިހާރު މަސައްކަތްކުރަންވީ ރައީސް ޔާމީން މިނިވަންކޮށް ދިވެހިރާއްޖޭގެ ވެރިކަމަށް ގެނައުމަށް ކަމަށްވެސް އޭނާ ވިދާޅުވި އެވެ.

"ހުރިހާ ރައްޔިތުންވެސް ވިސްނަންވީ ކަމަކީ މިގައުމަށް ގެއްލިގެން މިދިޔައީ 5 އަހަރޭ. އެތައް ގޮތަކުން. އެއްބައި ގޮތް ގޮތުން ބަލައިފިއްޔާ އިއާދަ ނުކުރެވޭނެހެން ހީވާ ކަންކަންވެސް އެބަހުރި. އެހެންވީމަ މިގައުމު އެދި ގޮވަނީ ރައީސް ޔާމީންގެ 2 ވަނަ ދައުރަކަށޭ. އެހެންވީމަ މިކަން ކުރަން އަތުކުރިއޮޅާލަން ހިނގާށޭ މަސައްކަތް ކުރަން."

"އަޅުގަނޑުމެން އެކީގައި މަސައްކަތް ކޮށް ގައުމުގެ ރައްޔިތުންނަށް މިކަން ވިސްނައިދީގެން، ގައުމުގެ މުސްތަގުބަލަށްޓަކައި، އަޅުގަނޑުމެންގެ ދަރިންގެ މުސްތަގުބަލަށްޓަކައި، މި ގައުމުގެ ސަލާމަތަށްޓަކައި، މިނިވަންކަމަށްޓަކައި، އަޅުގަނޑުމެން އަތުކުރި އޮޅާލައިގެން އެމަނިކުފާނަށް ވާދަކުރެވޭނެ ގޮތަށް މަސައްކަތް ކޮށް، އެމަނިކުފާނަށް އެފުރުސަތު ހޯދައިދީ، އެމަނިކުފާނަށް ދެވަނަ ދައުރެއް ގެނައިމުގެ މަސައްކަތުގައި އަޒުމް ކަނޑައަޅަން." ޑރ. މުއިއްޒު ވިދާޅުވި އެވެ.