ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ވެރިކަމުގައި ހިންގާފައިވާ ވައްކަމާއި ކޮރަޕްޝަނުގެ މައްސަލަތައް ބަލައި ދައުވާކޮށްފިނަމަ މަދުވެގެން 2000 އަހަރުގެ ޖަލުހުކުމެއް އަންނާނެކަމަށް ކުރީގެ ނައިބުރައީސް އަދި ރައީސް ޔާމީން އަބްދުލްގައްޔޫމުގެ އިސް ގާނޫނީ ވަކީލު ޑރ މުހައްމަދު ޖަމީލު އަހުމަދު ވިދާޅުވެއްޖެ އެވެ.
ޕްރޮގްރެސިވް ކޮންގްރެސް ކޯލިޝަނުން ކުރިއަށް ގެންދާ "ހޯޕް" ކޮންފަރެންސްގައި ރައީސް ޔާމީނުގެ ގާނޫނީ ޓީމުން ވަނީ އެމަނިކުފާނުގެ މައްޗަށް އުފުލަމުންދާ ދައުވާތަކާއި ގުޅޭގޮތުން މައުލޫމާތު ސެޝަނެއް ބާއްވާފައެވެ.
އެ ސެޝަންގައި ބައިވެރިޔަކު ވަނީ ރައީސް ޞާލިހުގެ ސަރުކާރުން ގިނަ ޖަރީމާތަކެއް ހިންގަމުންދާކަން ފާހަގަކުރައްވާއިރު، އެމަނިކުފާނު އަޒުލުކުރުމަށް ގާނޫނީ ޓީމުން އެއްވެސް މަސައްކަތްޕުޅެއް ކުރައްވަންތޯ އައްސަވާ ސުވާލުކުރައްވާފަ އެވެ.
އެ ސުވާލުގެ ޖަވާބުދެއްވަމުން ރައީސް ޔާމީނުގެ އިސް ގާނޫނީ ވަކީލު ޑރ މުހައްމަދު ޖަމީލު އަހުމަދު ވިދާޅުވީ ރައީސް ޞާލިހުގެ މައްސަލަ އިންސާފުވެރިކަމާއެކު ބަލައިފިކަމަށް ވާނަަމަ އެމަނިކުފާނުގެ މައްޗަށް 2000 އަހަރުގެ ހުކުމެއް ޔަގީނުންވެސް އަންނާނެ ކަމަށެވެ.
"ތެދުތެދަށް ދަންނަވާނަމަ މިހާރު ރާއްޖޭގައި ހެދިފައިހުރި ގާނޫނުތައް ރައީސް ޞާލިހުގެ މައްޗަށް ހިންގައިފިކަމަށް ވާނަމަ އަޅުގަނޑަކަށް ހިޔެއް ނުވޭ ކުރިއަށް އޮތް 2000 އަހަރުވެސް ޖަލުން ސަލާމަތްވާނެ ހެނެއް.. އުމުރެއް ދެން އިންސާނަކަށް ނުއެއް ލިބޭނެ"
ރައީސް ޔާމީންގެ އިސް ގާނޫނީ ވަކީލު ޑރ މުހައްމަދު ޖަމީލު އަހުމަދު
ޑރ ޖަމީލު ވިދާޅުވީ ރައީސް ޞާލިހުގެ ވެރިކަން ނިންމާނީ މި އަހަރުގައި އޮންނަ ރިޔާސީ އިންތިޚާބުން ބަލިކުރައްވާ ރައީސް ޔާމީން ކަމަށެވެ.
ރައީސް ޔާމީނަކީ މައުސޫމު ބޭފުޅެއްކަން ހައިކޯޓު މަރުހަލާއިން ސާބިތުވެގެންދާނެކަމަށް ގަބޫލުކުރައްވާ ކަމަށާއި، ދެން ވެސް އެމަނިކުފާނުގެ މައްޗަށް ކުރަމުންދަނީ އުފައްދާފައިވާ ދައުވާތަކެއްކަމަށް ޑރ ޖަމީލު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
