ޑިކޯ ވެގެން ތިނަދޫ ޢަބްދުޞަމަދު މެމޯރިއަލް ހޮސްޕިޓަލަށް ގެންދިޔަ އަހްމަދު ސަޢީދުގެ ޙާލު ގޯސްވީ އެހޮސްޕިޓަލުން ފަރުވާ ކުޑަ ކުރުމުން ކަމަށް ރައްޔިތުން މަޖިލީހުގެ މަޑަވެލި ދާއިރާގެ މެމްބަރ ހުސެއިން ފިރުޝާން ވިދާޅުވެއްޖެއެވެ.

ޑިކޯ ވެގެން ގެންދިޔަ ސަޢީދަކީ ގއ.ކޮނޑޭ މަސްވެރިއެކެވެ.

މި ކަމާއި ގުޅިގެން ފިރުޝާން ކުރެއްވެވި ޓްވީޓުގައި ވިދާޅުވީ ޑިކޯވެގެން ގެންދިޔަ ސަޢީދު ފެބްރުއަރީ 1ގައި ޑޮކްޓަރ އަށް ދެއްކުމުން އޭއެސްއެމްއެޗް އިން އެއްވެސް މައްސަލައެއް ނެތް ކަމަށް ނިންމައި ހަމަ އެދުވަހު ދޫކޮށްލިކަމަށެވެ.

Advertisement

އޭގެފަހުން ސަޢީދު އަމިއްލައަށް މާލެ އައިސް މިހާރު އޭޑީކޭއިން ފަރުވާ ހޯދަމުން ދާކަމަށެވެ.

އެއްދުވަސް ލަސްވުމާއި ފްލައި ކުރުމާއި ގުޅިގެން ލިބިފައިވާ ގެއްލުން މިހާރު ބޮޑުވެފައިވާ ކަމަށް އެޑީކޭގެ ޑޮކްޓަރުން ވިދާޅުވިކަމަށް ސައީދުގެ އާއިލާއާއި ހަވާލާދީ ފިރުޝާން ވިދާޅުވެފައިވެއެވެ.

މިވަރުވީއިރު އަޅައި ނުލައި ދޫކޮށްލުމަކީ ދެރަވަރު ކަމެއްކަމަށް ވެސް ފިރުޝާން  ވިދާޅުވިއެވެ.

އާއިލާއިން "ވޮއިސް" އަށް ކިޔައިދިންގޮތުގައި މި މައްސަލާގައި ހޮސްޕިޓަލްއިން އަމަލުކށްފައިވަނީ އާދައިގެ ހުމަކަށް ފަރުވާދޭ އުސޫލުންކަމަށާއި، ދޭންޖެހޭ އަވަސްފަރުވާ ނުދެވުމުގެ ސަބަބުން މިހާރު ދާއިމީ ނުކުޅެދުންތެރިކަމަކާއި ކުރިމަތިލާންޖެހިފައިވާކަމަށެވެ. 

"އޭޑީކޭގައި ޑީކޯ 2 ޝެޝަން ނަގައިފި. ކޮންމެ ސެޝަނެއް އެއީ 2 ގަޑިއިރާއި 30 މިނެޓު. އެއީ ޖުމްލަ 5 ގަޑިއިރުގެ ފަރުވާ. ކޮންމެ ގަޑިއިރަކަށް 1000-2000 ޑޮލަރު އަރާ، ބައްޕަގެ ހާލު ދެރަވުމުން އިތުރަށް އެޗްޑީޔޫގައިވެސް ފަރުވާދޭންޖެހިފައިވަނީ" ސައީދުގެ ދަރިއެއް ވޮއިސްއަށް މައުލޫމާތު ދިނެވެ.

ޑީކޯވުން ރާއްޖޭގައި މިހާރު ދަނީ އާންމުވަމުންނެވެ. ހާއްސަކޮށް ވައި ފުޅީގައި ޑައިވްކުރުމުގެ ތަމްރީނު ނެތި އެން ހިފުމަށާއި ފާނަ ހިފަން ފީނާ ބައެއް މަސްވެރިން މަރުވެ، އަނެއް ބަޔަކު ޕެރަލައިޒް ވުން ފަދަ ހާލަތާ ކުރިމަތިލާން ޖެހިފައިވެއެވެ.

ޑީކޯގެ ފަރުވާއަކީ އަގުބޮޑު ފަރުވާއެއްކަމަށްވާއިރު މިފަރުވާއަކީ އާސަންދަ ހަމަޖެހޭގޮތައް އޮންނަ ފަރުވާއެއްނޫނެވެ. ސަރުކާރުގެ ހޮސްޕިޓަލްތަކުން މި ފަރުވާ ނުދެވޭއިރު މިވަގުތު މާލެގައި މި ފަރުވާދެވެން ހުންނަނީ އޭޑީކޭ ހޮސްޕިޓަލްގައި އެކަނިއެވެ.