ވިހެއުމުންދޭ ދެމަސް ދުވަހުގެ ޗުއްޓީ އާއި މެދު ވަޒީފާއާއި ބެހޭ ޓްރަބިއުނަލްގެ މެމްބަރ މަރިޔަމް ޝަމްޢާ އިބްރާހިމް ދެއްކެވި ވާހަކަތައް އެ ޓްރަބިޔުނަލް އިން ދޮގުކޮށްފިއެވެ.
ޝަމްޢާ ގެ ވާހަކައިގައި ވިދާޅުވެފައިވަނީ ދަރިފުޅުގެ ހާލު މި ވަގުތު ހުރި ގޮތުން އެންމެ ދެ މަހުގެ ޗުއްޓީއަކުން އޭނާ އަށް ނުވާނެތީ އެދިވަޑައިގަތީ ޗުއްޓީ އިތުރު ކޮށްދިނުމަށެވެ. އެކަމަކު، މަސައްކަތް ކުރާތާ ނުވަ އަހަރުވެފައިވާ ޓްރައިބިޔުނަލުން އޭނާ އަށް އެ ފުރުސަތު ދޭން ދެކޮޅު ހެދީ ކަމަށް ވިދާޅުވި އެވެ.
މިވާހަކައަށް ރައްދު ދެއްވައި ޓްރަބިޔުނަލުން ބުނެފައިވަނީ މެޓާނިޓީ ލީވް އިތުރުކޮށްދިނުމަށް އެދިވަޑައިގެންނެވި ނަމަވެސް، އެ މުއްދަތު އިތުރުކުރުމުގެ ބާރެއް ޓްރައިބިއުނަލްގެ ރައީސަށް ލިބިވަޑައި ނުގަންނަވާ ކަމަށެވެ. ނަމަވެސް، ދިމާވާ ކަންތައްތަކާ ގުޅިގެން އުސޫލުގެ ތެރެއިން ހާޒިރީއާ ގުޅިގެން ދެވެން ހުރި ލުއިތައް ދެވޭނެކަން ޝަމްއާ އަށް އަންގާފައިވާނެ ކަމަށާއި މީގެ ކުރިން ވެސް ދިމާވި އެކި ހާލަތްތަކާ ގުޅިގެން ހާޒިރީއާ ގުޅޭ ކަންކަމުގައި ލުއި ދީފައިވާނެ ކަމަށް އެ ބަޔާނުގައި ބުނެފައިވެއެވެ.
ވާހަކަ ދައްކައިގެން ހައްލެއް ނުލިބުމުން ކަމަށް ވިދާޅުވެ ޝަމްޢާ ވަނީ މިދިޔަ ބުރާސްފަތި ދުވަހު ދެ މަހުގެ ފިރިހެން ދަރިފުޅާ އެކު އޮފީހަށް ނުކުންނަވަން ފައްޓަވައިފަ އެވެ. ޓްރަބިޔުނަލްގެ ބަޔާނުގައި ބުނެފައިވަނީ ވިހެއުމުން ދޭ ދެ މަސް ދުވަހުގެ ޗުއްޓީގެ މައްސަލައިގައި، ދެވެން ހުރި ހުރިހާ ލުއިތަކެއް ދިނުމަށް މަސައްކަތް ކޮށްފައި ވާނެ ކަމަށެވެ.
އެބަޔާނުގައި ބުނެފައިވަނީ ޤާނޫނުތަކާއި އުސޫލުތަކާ އެއްގޮތަށް ޝަމްޢާ އަށް ދެވެން ހުރި ހުރިހާ ލުއިތަކެއް ދިނުމަށް މަސައްކަތް ކޮށްފައިވާ ކަމަށެވެ. އެއީ މެމްބަރެއްގެ ހައިސިއްޔަތުން ޝަމްޢާ އަށް އެނގިވަޑައިގަންނަވާނެ ކަންކަން ކަމަށް ވިޔަސް، ކަން ހިނގާފައިވާ ގޮތް އޮޅޭ ގޮތަށް އަދި ޓްރައިބިއުނަލްގެ ނަން ބަދުނާމުވާނެ ގޮތަށް ސޯޝަލް މީޑިއާ އާއި މީޑިއާ އަށް މައުލޫމާތު ދެއްވުމަކީ ވަރަށް ކަންބޮޑުވާ ކަމެއް ކަމަށެވެ.
ސިވިލް ސާވިސްގައި ވަޒީފާ އަދާކުރާ އަންހެން މުވައްޒަފުންނަށް މާޗު 2019 އިން ފެށިގެން އަންނަނީ މުސާރަ ލިބޭ ގޮތަށް ހަ މަސް ދުވަހުގެ މެޓާނިޓީ ލީވެއް ދެމުންނެވެ. ޓްރައިބިއުނަލަކީ މިނިވަން އިދާރާއަކަށް ވާތީ އެ ތަނުން އަމަލުކުރާނެ ގޮތެއް ވަނީ މެމްބަރުންގެ އިއްތިފާގުން ނިންމައިފަ އެވެ. އެ ކަން ނިންމީ ވެސް ޝަމްޢާގެ ވެސް ވޯޓާއެކު ކަމަށް ޓްރައިބިއުނަލްގެ ބަޔާނުގައި ވެ އެވެ.
ބަޔާނުގައި އިތުރަށް ބުނެފައިވަނީ ވަޒީފާގެ ގާނޫނަށް ހަ ވަނަ އިސްލާހު ގެނައުމުގެ ކުރިން، ޓްރައިބިއުނަލްގެ މެމްބަރުން ތަބާވާންޖެހޭ ސުލޫކީ މިންގަނޑެއް މެމްބަރުންގެ އަޣުލަބިއްޔަތުން ފާސްކޮށް، އޮގަސްޓް 25، 2021 ގައި ގެޒެޓުގައި ޝާއިއުކޮށްފައިވާ ކަމަށެވެ. އެ އުސޫލު ފާސްކުރިއިރު ޝަމްޢާ ހިމެނޭހެން ހުރިހާ މެމްބަރުން ތާއިދު ކުރެއްވި ކަމަށް ބަޔާނުގައި ބުންޏެވެ.
މީގެ ކުރިން އެ އޮފީހުގެ އެހެން ބައެއް މެމްބަރުން ދަރިން ގޮވައިގެން އޮފީހަށް ވަޑައިގަންނަވާ ކަމަށާއި އެކަމަކު ކުރިން އެކަން މަނާ ނުކުރާ ކަމަށާއި، އެ ތަނުގެ އެހެން މުވައްޒަފުންނަށް ވަޒީފާގެ ލުއިތައް ހަމަޖައްސައިދީފައި ހުއްޓަސް، އޭނާ އަށް އެ ފުރުސަތު ނެތް ކަމަށް ޝަމްޢާ ވަނީ ވިދާޅުވެފައެވެ.
ނަމަވެސް އެ ކަމަށް ރައްދު ދެމުން ޓްރައިބިއުނަލުން ބުނެފައިވަނީ، ދައުލަތުގެ އިދާރާތަކުން ކުޑަކުއްޖަކާ ގުޅޭ ކަންކަން ނިންމުމުގައި އެންމެ އިސްކަން ދޭންވާނީ އެ ކުއްޖާގެ މަސްލަހަތު ހިމާޔަތްކުރުމަށް ކަމަށް ބުނާއިރު، ތުއްތުކުދިން ގެންގުޅުމަށް އެއްވެސް ވަރަކަށް އެކަށީގެންވާ މާހައުލެއް ޓްރައިބިއުނަލްގައި މި ވަގުތު ނެތެވެ. އެހެންވެ، އެއްވެސް މެމްބަރަކު އަދި މުވައްޒަފަކު ވެސް ރަސްމީ ގަޑީގައި އޮފީހުގައި ބައިތިއްބާ ގޮތަށް ތުއްތުކުދިން އޮފީހަށް ނުގެންދިއުމަށް އިރުޝާދު ދީފައިވާނެ ކަމަށް ބުންޏެވެ.
Advertisement
This content is created and paid for by advertisers and does not involve Voice Journalists
