އިގިރޭސި ޕްރެމިއާ ލީގުގައި މިއަދު ހަވީރު ރަށުން ބޭރުގައި ތާަވަލުގެ ފުލުގައި އޮތް އެވަޓަން އާއި ވާދަކޮށް 1-0 ގެ ނަތީއްޖާއަކުން އާސެނަލް ބަލިވެއްޖެއެވެ.

އެވަޓަންގެ ގުޑިސަން ޕާކްގައި މިއަދު ހަވީރު ކުޅެވުނު މެޗުގެ ފުރަތަމަ ހާފުގައި ގިނަވަގުތު ބޯޅަ ގެންގުޅެ މެޗު ޑޮމިނޭޓުކުރީ މިވަގުތު ފަސް ޕޮއިންޓްގެ ލީޑަކާއި އެކު ތާވަލުގެ އެއްވަނާގައި އޮތް އާސެނަލް އިންނެވެ. ނަމަވެސް މިހާފުގައި ލަނޑުޖަހާނެ ރަގަޅު ފުރުސަތުތަކެއް ތަނަވަސްކުރީ އެވަޓަން އިންނެވެ. މިގޮތުން އެޓީމު ޑޮމިނިކް ކަލްވާޓް-ލެވިން އާއި އަބްދޫލަޔޭ ޑޫކޫރޭއަށް ވަނީ ހުސް ދެ ފުރުސަތުލިބި ބޭނުންހިފޭގޮތް ނުވެފައެވެ.

ފުރަތަމަ ހާފުގައި އާސެނަލް ޓީމުން އެންމެ ރަގަޅު ފުރުސަތެއް ލިބުނީ އެޓީމުގެ އިގިރޭސި ފޯވާޑް ބުކަޔޯ ސަކާ އަށެވެ. އެވަޓަންގެ ޕެނަލްޓީ އޭރިއާ ތެރެއިން ސަކާ ފޮނުވާލި ހަމަލާ އެޓީމުގެ ޑިފެންޑަރަކު ވަނީ ބްލޮކުކޮއްފައެވެ.

Advertisement

އާސެނަލް އާއި އެވަޓަން ވާދަކުރި މެޗުގެ ތެރެއިން

މެޗުގެ ދެވަނަ ހާފުގައި އާސެނަލް އިން ކުޅުން ރަގަޅު ކުރިއެވެ. އަދި ދެވަނަ ހާފުގެ 59 ވަނަ މިނެޓުގައި ނިމިދިޔަ ޖެނުއަރީ ޓްރާންސްފާގައި އެޓީމާއި ގުޅުނު ދެ ކުޅުންތެރިންކަމަށްވާ ޖޯޖީނިއޯ އާއި ލިއަންޑްރޯ ޓްރޮސާޑް ކުޅެން ނުކުތެވެ. އޭގެ މިނެޓެއްފަހުން އެވަޓަންގެ އިންގްލެންޑް ޑިފެންޑަރ ޖޭމްސް ޓާކޮވްސްކީ ވަނީ ލަނޑެއް ކާމިޔާބުކޮށް އެޓީމަށް މެޗުގެ ލީޑު ހޯދައި ދީފައެވެ. މިއީ އެޓީމުގެ ޑްވައިޓް މެކްނީލް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

އެވަޓަންގެ ލަނޑައްފަހު އާސެނަލް އިން ކުރިއައްޖެހި ލަނޑެއްޖެހޭތޯ ވަރަށް މަސައްކަތްކުރިއެވެ. ނަމަވެސް އެވަޓަންގެ ޑިފެންޑަރުން ވަނީ އާސެނަލްގެ ކުޅުންތެރިން ހުއްޓުވުމުގައި ކާމިޔާބު ހޯދާފައެވެ. މި ހާފުގައި އާސެނަލް ޓީމުން އެންމެ ހުސް ފުރުސަތެއް ލިބުނީ އެޓީމުގެ ޔުކުރޭން ޑިފެންޑަރ  ޒިންޗެންކޯއަށެވެ. ނަމަވެސް އޭނާ ފޮނުވާލި ހަމަލާ ގޯލާއި އަމާޒުނުވެ ހުރަސް ދަނޑިމަތިން ދިޔައީ ބޭރަށެވެ.

މިއީ 2022 ސެޕްޓެންބަރު މަހު ލީގު މެޗެއްގައި އާސެނަލް ބަލިވި ފަހުން ޕްރެމިއާ ލީގު މެޗެއްގައި އެޓީމު ބަލިވި ފުރަތަމަ މެޗެވެ. މި މެޗުން ބަލިވި ނަމަވެސް ލީގު ތާވަލުގެ އެއްވަނާގައި ފަސް ޕޮއިންޓްގެ ލީޑަކާއި އެކު އަދިވެސް އޮތީ އާސެނަލް އެވެ. 20 މެޗު ކުޅެގެން އެޓީމަށް 50 ޕޮއިންޓް ލިބިފައިވާއިރު މި މެޗުން ލިބުނު ތިން ޕޮއިންޓައި އެކު އެވަޓަން އިން ވަނީ 21 މެޗުން 18 ޕޮއިންޓް ހަމަކޮށް ލީގު ތާވަލުގެ 18 ވަނައަށް ކުރިއަށްޖެހިލާފައެވެ.