އިގިރޭސި ޕްރެމިއާ ލީގުގައި މިރޭ އަމިއްލަ ދަނޑުގައި ކްރިސްޓަލް ޕެލަސް އާއި ވަދަކޮށް 2-1 ގެ ނަތީއްޖާއަކުން މޮޅުވެ މެންޗެސްޓަރ ޔުނައިޓެޑު ވަގުތީ ގޮތުން ޕްރެމިއާ ލީގު ތާވަލުގެ ތިން ވަނައަށް ޖެހިލައިފިއެވެ.

މިރޭގެ މެޗުގެ ފުރަތަމަ ހާފުގެ ވަރަށް ކުރީކޮޅު އެޓީމަށް ލިބުނު ޕެނަލްޓީއަކުން އެޓީމުގެ ޕޯޗުގަލް މިޑްފީލްޑަރ ބުރޫނޯ ފެނާންޑޭޒް ވަނީ އެޓީމަށް ލީޑު ހޯދައިދީފައެވެ. މިއީ ޕެލަސްގެ ޕެނަލްޓީ އޭރިއާތެރެއިން އެޓީމުގެ ކުޅުންތެރިއެއްގެ އަތުގައި ބޯޅަޖެހުމުން ވީއޭއާރުން ބެލުމަށް ފަހު ރެފްރީ ދިން ޕެނަލްޓީއެެކެވެ.

ރަޝްފޯޑް ޔުނައިޓެޑުގެ ދެވަނަ ލަނޑު ކާމިޔާބުކުރުމަށް ފަހު އުފާ ފާޅުކުރަނި

ފުރަތަމަ ހާފުގައި ޔުނައިޓެޑުން ގިނަވަގުތު ބޯޅަގެންގުޅެ މެޗުޑޮމިނޭޓުކުރި އިރު މިހާފުގައި އެޓީމުގެ ފޯވާޑް ވޯޓް ވެގްހޯސްޓްގެ އިތުރުން ރަޝްފޯޑް އަދި ބްރެޒިލްގެ މިޑްފީލްޑަރ ފުރެޑްއަށް ވަނީ އެޓީމުގެ ލީޑު ފުޅާކުރުމަށް ރަގަޅު ހުސް ފުރުސަތުތަކެއްލިބި ބޭނުން ނުކުރެވިފައެވެ. މި ހާފުގައި ޕެލަސް އިން އެންމެ ރަގަޅު ފުރުސަތެއް ލިބުނީ އެޓީމުގެ ގާނާ މިޑްފީލްޑަރ ޖެފްރީ ޝްލޫޕް އަށެވެ. ނަމަވެސް އޭނާ ފޮނުުވާލި ހަމަލާ މެންޗެސްޓަރ ޔުނައިޓެޑުގެ ގޯލްކީއްޕަރު ވަނީ ހުޝިއާރުކާމާއި އެކު ދިފާއުކޮށްފައެވެ.

ދެވަނާ ހާފު ފެށިގެން 62 ވަނަ މިނެޓުގައި ޔުނައިޓެޑުގެ ލީޑު ފުޅަކޮށްދިނީ މިސީޒަނުގައި މޮޅުކުޅުމެއް ދައްކަމުން އަންނަ އިގިރޭސި ފޯވާޑް މާކަސް ރަޝްފޯޑުއެވެ. މިއީ މިސީޒަނުގައި، ލީގުގައި އޭނާ ކާމިޔާބުކޮށްދިން 10 ވަނަ ލަނޑެވެ. މެންޗެސްޓަރ އިން ދެ ލަނޑުގެ ލީޑެއް ނެގިތާ މާގިނައިރު ނުވަނީސް ދެވަނަ ހާފުގެ 70 ވަނަ މިނެޓުގައި އެޓީމުގެ ބްރެޒިލް މިޑްފީލްޑަރ ކަސަމީރޯ ކްރިސްޓަލް ޕެލަސްގެ ކުޅުންތެރިއަކަށް ކުރި ނުރައްކާތެރި ފައުލަކާއި ގުޅިގެން ރެފްރީ ވަނީ އޭނާ އަށް ސީދާ ރަތް ކާޑޭއް ދައްކާ ދަނޑުފޮނުވާލާފައެވެ.

މެޗުގެ ފަހު 20 މިނެޓުގަައި ޔުނައިޓެޑުން އެއްކުޅުންތެރިއެއް މަދުކޮށް ކުޅެންޖެހުމުގެ ފައިދާނަގައި ފެލަސް އިން ކުރިއަށްޖެހި މެންޗެސްޓާގެ ގޯލަށް ނުރައްކާކުރަންފެށުުގެ ނަތީއްޖާއެއްގެ ގޮތުން ދެވަނަ ހާފުގެ 76 ވަނަ މިނެޓުގައި އެޓީމުން ލަނޑެއް ކާމިޔާބުކުރިއެވެ. މިލަނޑު އެޓީމަށް ކާމިޔާބުކޮށްދިނީ ގާނާގެ މިޑްފީލްޑަރ ޖެފްރީ ޝްލޫޕް އެވެ. މިއީ އެޓީމުގެ މާލީ މިޑްފީލްޑަރ ޗެއިކް ޑޫކޫރޭ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިރޭގެ މެޗުން މޮޅުވެ މެންޗެސްޓަރ ޔުނައިޓެދު ވަގުތީގޮތުން ތިން ވަނައަށްޖެހިލާފައި ވާއިރު 21 މެޗު ކުޅެގެން އެޓީމަށް ލިބިފައި ވަނީ 42 ޕޮއިންޓެވެ. މިރޭ ނިއުކާސަލް އާއި ވެސްޓް ހޭމް ވަދަކުރާ މެޗުން ނިއުކާސަލް މޮޅުވެއްޖެނަމަ އެޓީމަށް އަލުން ޓޭބަލްގެ ތިންވަނަ ލިބޭނެއެވެ. މިރޭގެ މެޗުން ބަލިވި ކްރިސްޓަލް ޕެލަސް މިވަގުތު އޮތީ 21 މެޗުން ލިބުނު 24 ޕޮއިންޓާއި އެކު ތާވަލުގެ 12 ވަނާއިގައެވެ.