އިގިރޭސި ޕްރެމިއާ ލީގުގައި މިރޭ ރަށުން ބޭރުގައި ވުލްވްސް އާއި ވަދަކޮށް 3-0 ގެ ތަފާތުބޮޑު ނަތީއްޖާއަކުން ބަލިވެ ލިވަޕޫލް ލީގު ތާވަލުގެ 10 ވަނައަށް ވެއްޓިއްޖެއެވެ.

އިގިރޭސި އެފްއޭ ކަޕްގެ ތިން ވަނަ ބުރުގައި މިދެ ޓީމު ވުލްވްސްގެ ދަނޑުގައި ކުޅުނު މެޗުގެ ފަހުވަގުތު ވުލްވްސް އިން ކާމިޔާބުކުރި ލަނޑު ވީއޭއާރު އިން ބެލުމަށް ފަހު އެއީ އެފްސައިޑް ގޯލަކަށް ނިންމުމުން 2-2 ގެ ނަތީއްޖާއަކުން މެޗު އެއްވަރުވުމާއި ގުޅިގެން އެ މެޗުގެ ރީޕްލޭ މެޗެއް ވަނީ ކުޅެވިފައެވެ. ލިވަޕޫލްގެ ދަނޑުގައި ކުޅުނު އެމެޗު 1-0 ގެ ނަތީއްޖާއަކުން ކާމިޔާބުކޮށް މުބާރާތުގެ ހަތަރު ވަނަ ބުރުން ޖާގަހޯދީ ލިވަޕޫލް އެވެ.

ވުލްވްސް ކުޅުންތެރިން ލަނޑުޖެހުމަށް ފަހު އުފާ ފާޅުކުރަނީ

ވުލްވްސްގެ ގޯލް ވީއޭއާރު އިން ކެންސަލް ކުރުމާއި ގުލިގެން ގިނަ ބައެއްގެ ފާޑުކިއުން އިގިރޭސި އެފް އޭއަށް އަމާޒުވެފައި ވާއިރު މިރޭގެ މެޗުގެ ނަތީއްޖާއަކީ ބަދަލުހިފުމެއްކަމަށް ސޯޝަލް މީޑިއާގައި ވުލްވްސް ސަޕޯޓަރުން ސިފަކޮށްފައި ވެއެވެ. 

މިރޭގެ މެޗުގައި ވުލްވްސް އިން ކާމިޔާބުކުރި ފުރަތަމަ ލަނޑަކީ މެޗުގެ ފަސްވަނަ މިނެޓުގައި ލިވަޕޫލުގެ ކެމަރޫން ޑިފެންޑަރު ޖޮއެލް މަޓިޕް ފައިގައިޖެހިފައި ބައިކޮޅަށް ވަން ގޯލެކެވެ. އަދި ފުރަތަމަ ހާފުގެ 12 ވަނަ މިނެޓުގައި ވުލްވްސްގެ ދެވަނަ ލަނޑު ކާމިޔާބުކޮށް އެޓީމުގެ ލީޑު ފުޅާކޮށްދިނީ އިގިރޭސި ޑިފެންޑަރ ކްރެއިގް ޑޯސަން އެވެ. މިއާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީއްޖާއަކުން ވުލްވްސް ކުރީގައި އޮވެގެންނެވެ.

ދެވަނަ ހަފުގައި ލިވަޕޫލުން ބަދަލުތަކެއްގެނެސް ކުޅުން ރަގަޅުކުރި ނަމަވެސް ލަނޑުޖަހާނެ މާ ރަގަޅު ހުސް ފުރުސަތުތަކެއް އެޓީމަށް ތަނަވަސްކުރެވިފައެއް ނުވެއެވެ. މި މެޗުގައި ވުލްވްސް އިން ކާމިޔާބުކުރި ތިންވަނަ ލަނޑު ދެވަނަ ހާފުގެ 71 ވަނަ މިނެޓުގައި ސްޕެނިޝް ފޯވާޑް އެޑަމާ ޓްރައޯރޭ ތަނަވަސްކޮށްދިން ފުރުސަތެއްގައި ކާމިޔާބުކޮށްދިނީ ޕޮޗުގަލްގެ މިޑްފީލްޑަރ ރުބެން ނެވްސް އެވެ.

މިރޭގެ މެޗުން ލިބުނު ތިން ޕޮއިންޓާއި އެކު 21 މެޗުން 20 ޕޮއިންޓް ހަމަކޮށް ވުލްވްސް ވަނީ ޕްރެމިއާ ލީގު ތާވަލުގެ 15 ވަނައަށް ކުރިއަށްޖެހިލާފައެވެ. މިރޭގެ މެޗުން ބަލިވި ލިވަޕޫލް ވަނީ 21 މެޗުން ލިބިފައިވާ 29 ޕޮއިންޓައިއެކު ތާވަލުގެ 10 ވަނައަށް ވެއްޓިފައެވެ.