ފުރާންސް ލީގުގައި ޓޫލޫސް ލަނޑެއްޖަހައި ލީޑު ހޯދައިފައި ވަނިކޮށް ފަހަތުންއަރާ ދެ ލަނޑު ކާމިޔާބުކޮށް ޕީއެސްޖީ އިން ލީގު ތާވަލުގެ ކުރީގައި 8 ޕޮއިންޓުގެ ލީޑެއްނަގައިފިއެވެ.

އަނިޔާގެ ސަބަބުން ޕީއެސްޖީގެ އެންމެ މުހިންމު ދެ ކުޅުންތެރިންކަމަށްވާ އެމްބާޕޭ އަދި ނޭމާ އާއި ނުލައި ކުޅުނު މިމެޗުގެ ފުރަތަމަ ހާފުގެ 20 ވަނަ މިނެޓުގައި ޓޫލޫސްގެ ނެދަލޭންޑްސް މިޑްފީލްޑަރ ބްރެންކޯ ވެން ޑެން ބޫމެން ވަނީ ލަނޑެއް ކާމިޔާބުކޮށް އެޓީމަށް ލީޑު ހޯދައިދީފައެވެ. މިއީ ޕީއެސްޖީ ޕެނަލްޓީ އޭރިއާ ބޭރުން އެޓީމަށް ލިބުނު ހިލޭޖެހުމަކުން ބޫމެން ކާމިޔާބުކޮށްދިން ލަނޑެކެވެ.

މޮރޮކޯގެ ޑިފެންޑަރ އަޗްރަފް ހަކީމީ

ނަމަވެސް ފުރަތަމަ ހާފު ނިމުމުގެ ކުރިން ޕީއެސްޖީ އިން މެޗުގެ ނަތީއްޖާ އެއްވަރުކުރިއެވެ. މި ލަނޑު ފުރަތަމަ ހާފުގެ 38 ވަނަ މިނެޓުގައި ކާމިޔާބުކޮށްދިނީ މި މެޗުގައި މޮޅުކުޅުމެއްދެއްކި މޮރޮކޯގެ ޑިފެންޑަރ އަޗްރަފް ހަކީމީ އެވެ. މިއީ ސްޕެނިޝް މިޑްފީލްޑަރ ކާލޯސް ސޮލަރ ތަނަވަސްކޮށްދިން ފުރުސަތެއްގައި ހަކިީމީ ކާމިޔާބުކޮށްދިން ލަނޑެކެވެ.

ދެވަނަ ހާފުފެށިގެން 58 ވަނަ މިނެޓުގައި ފުރަތަމަ ފަހަރަށް މިމެޗުގައި ޕީއެސްޖީއަށް ލީޑު ހޯދައިދިނީ ހަކީމީ ތަނަވަސްކޮށްދިން ފުރުސަތެއްގައި އާޖެންޓީނާގެ ކެޕްޓަން ލިއޮނަލް މެސީއެވެ. މިއީ ލީގުގައި މެސީ ކާމިޔާބުކުރި 10 ވަނަ ލަނޑެވެ.

މިރޭގެ މެޗުން ލިބުނު ތިން ޕޮއިންޓާއި އެކު 22 މެޗުން ޕީއެސްޖީއަށް ވަނީ 54 ޕޮއިންޓް ލިބިފައެވެ. ދެވަނާގައި އޮތް މާސޭއަށް 21 މެޗުން ލިބިފައި ވަނީ 46 ޕޮއިންޓެވެ. އަދި މިރޭގެ މެޗުން ބަލިވި ޓޫލޫސް މިވަގުތު އޮތީ 22 މެޗުން ލިބުނު 29 ޕޮއިންޓާއި އެކު ތާވަލުގެ 12 ވަނައިގައެވެ.