ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2023 ފެއްޓުމުގެ ގޮތުން ކުޅެވުނު ޗެރިޓީ ޝީލްޑް މެޗް އެންމެ ފަހުގެ ޗެންޕިއަން ތިމަރަފުށި ބަލިކޮށް ގާފަރުން ކާމިޔާބުކޮށްފިއެވެ. މެޗުން މޮޅުވާ ޓީމަކަށް 25،000 ރުފިޔާގެ ފައިސާގެ އިނާމެއް ހުށަހަޅާފައިވާއިރު، މި ފައިސާ ވަނީ ސްޕެޝަލް އޮލިމްޕިކްސް އަށް ހަދިޔާކޮށްފަ އެވެ.

ހުޅުމާލޭ ރެހެންދި ފުޓްސަލް އެއް ނަންބަރު ދަނޑުގައި ރޭ ގޯލްޑަން ފުޓްސަލް ޗެލެންޖް ފެށުމުގެ ގޮތުން ބޭއްވުނު ކުލަގަދަ ރައްސްމިއްޔާތުގައި މުބާރާތުގެ ލަވަ ހުށަހަޅައިދިނުމުގެ އިތުރުން މުބާރާތުގެ އައު ތަށި ވަނީ ދައްކާލާފައެވެ. ތަށި ދައްކާލީ އެންމެފަހުގެ ޗެމްޕިއަން ތިމަރަފުށީގެ ކެޕްޓަން އިބްރާހީމް ސިނާހް (ސިނާ)އެވެ.

އެންމެ ފަހުގެ ދެ އަަހަރުގެ ޗެންޕިއަން ތިމަރަފުއްޓާއި ވާދަކޮށް އެންމެ ފަހުގެ ރަނަރަޕް ގާފަރު ރޭގެ މެޗު ކާމިޔާބުކުރީ ފަސޭހަކަމާއި އެކު 3-0 ގެ ނަތީއްޖާއަކުންނެވެ. ގާފަރުގެ ފުރަތަމަ ލަނޑު ފުރަތަމަ ހާފުގައި ކާމިޔާބުކޮށްދިނީ އަޒްޔާން އިބްރާހީމެވެ. މިއީ އެޓީމުގެ ކެޕްޓަން ސާމިން މުހައްމަދު ނަސީރު ތަނަވަސްކޮށްދިން ފުރުސަތެއްގައި އަޒްޔާން ކާމިޔާބުކޮށްދިން ލަނޑެކެވެ.

ޗެރިޓީ ޝީލްޑް

ދެވަނަ ހާފުގައި ގާފަރުން އިތުރު ދެ ލަނޑު ކާމިޔާބުކޮށްފައިވާ އިރު މި ދެލަނޑުވެސް ކާމިޔާބުކޮށްދިނީ މިރޭގެ މެޗުގައި މޮޅުކުޅުމެއްދެއްކި އިބްރާހީމް ރިމާހް (ރިމޭ) އެވެ. ގޯލްޑަން ފުޓްސަލް ޗެލެންޖު 2023 މުބާރާތުގެ މެޗުތައް މިއަދު ފެށޭއިރު، މިފަހަރުގެ މުބާރާތުގައި 102 ޓީމު ބައިވެރިވެފައި ވެއެވެ. ފެބުރުއަރީ 05 ފެށިގެން މާރިޗު މަހުގެ 19 ގެ ނިޔަލަށް ކުރިއަށް ގެންދިއުމަށް ރޭވިފައިވާ މި މުބާރާތުގައި މި އަަހަރު 242 މެޗު ކުޅުމަށް ވަނީ ހަމަޖެހިފައެވެ.