ޕާކިސްތާންގެ ކުރީގެ ރައީސް ޖެނަރަލް މުޝައްރަފް އުމުރުން 79 އަހަރުގައި އަވަހާރަ ވެއްޖެއެވެ.

މީޑިއާތަކުން ރިޕޯޓުކުރާ ގޮތުގައި މުޝައްރަފު އަވަހާރަވެފައިވަނީ އެމީލޮއިޑިސް ކިޔާ ބައްޔަކަށް ފަރުވާ ހޯއްދަވަމުން ދަނިކޮށް އެމެރިކަން ހޮސްޕިޓަލްގައި މިއަދު ހެދުނުގެ ވަގުތެއްގަ އެވެ.

އެމީލޮއިޑިސް އަކީ ހަށިގަނޑުގައި ހިމެނޭ ޓިޝޫތަކާއި ގުނަވަންތަކުގައި އެބްނޯމަލް ޕްރޮޓީން އެއް އުފެދުމުގެ ސަބަބުން ޖެހޭ ބައްޔެކެވެ. އެ ބަލި ޖެހުމުން ގުނަވަންތައް އާދައިގެމަތިން މަސައްކަތް ކުރަންޖެހޭ ގޮތަށް މަސައްކަތް ކުރުމަށް ހުރަސް އަޅައެވެ. ބޭރުގެ މީޑިއާ ތަކުން ރިޕޯޓް ކޮށްފައިވާ ގޮތުގައި 2019 ވަނަ އަހަރުން ފެށިގެން މުޝައްރަފް އަންނަނީ އެ ބައްޔަށް ފަރުވާ ކުރައްވަމުންނެވެ.

މުޝައްރަފު ދުބާއީގައި ދިރިއުޅުއްވުން ބަދަލު ކުރެއްވީ 2016 ވަނަ އަހަރު އެވެ. އޭނާ ދުބާއީއަށް ދިރިއުޅުން ބަދަލު ކުރީ 2007 ވަނަ އަހަރު އޭނާ ޕާކިސްތާންގެ ވެރިކަމުގައި ހުންނެވިއިރު ގާނޫނު އަސާސީ ސަސްޕެންޑްކޮށް ވެރިކަން ދަމަހައްޓަން ކުރި މަސައްކަތުގެ މައްސަލައިގައި ގައުމަށް ހިޔާނާތްތެރިވުމުގެ ދައުވާ އުފުލުމުންނެވެ.

އުމުރުން 18 އަހަރުގައި ޕާކިސްތާންގެ އަސްކަރިއްޔާ އާއި މުޝައްރަފް ގުޅިވަޑައިގަތީ 1961 ވަނަ އަހަރު އެވެ. 1964 ވަނަ އަހަރު އަސްކަރީ ކޮލެޖަކުން ގްރެޖްއޭޓްވެ ވަޑައިގެން މުޝައްރަފް އައީ އަސްކަރިއްޔާގައި ޕްރޮމޯޝަނަކަށް ފަހު ޕްރޮމޯޝަނެއް ހޯއްދަވަމުންނެވެ.

ބޭނަޒީރު ބުއްޓޫ 1988 އިން 1990 އަށް އަދި 1993 އިން 1995 އަށް ޕާކިސްތާންގެ ބޮޑުވަޒީރުކަން ކުރިއިރު މުޝައްރަފް އަކީ ބޭނަޒީރު ބުއްޓޫ އެންމެ އިތުބާރުކުރި އަސްކަރީ ޖެނެރަލުންގެ ތެރެއިން އެއްބޭފުޅެކެވެ. ބުއްޓޫގެ އެދެމަކަށް މުޝައްރަފް ވަނީ އިސްރާއީލްގެ ޖާސޫސީ އިދާރާ ކަމަށްވާ މޮސާޑް އާއި ބައްދަލުކޮށްފައެވެ. އޭގެފަހުން މޮސާޑާ ޕާކިސްތާންގެ ގުޅުން އަސްކަރީ ގޮތުން ބަދަހިވިއެވެ. ބުއްޓޫގެ ވެރިކަން ވެއްޓުމުގެ ކުރިން މުޝައްރަފަށް އިތުރު ޕްރޮމޯޝަނެއްދީ ލެފްޓިނަންޓް ޖެނެރަލް އަކަށް އޭނާ ހެދިއެވެ. އެއަށްފަހު އައިކޯޕްސް ނަމަކަށް ކިޔާ ލަޝްކަރުގެ އެންމެ އިސްވެރިޔާގެ މަގާމު އޭނާ އަށް ދިނެވެ.

މުޝައްރަފް ޕާކިސްތާނުގެ ވެރިކަން ކުރެއްވީ 2001 ވަނަ އަހަރުން ފެށިގެން 2008 ވަނަ އަހަރާއި ހަމައަށެވެ. 2008 ވަނަ އަހަރު އިތުބާރު ނެތްކަމަށް ފާސް ކޮށް މަޤާމުން ވަކިކޮށްފާނެކަން ޔަޤީންވުމުން އަމިއްލައަށް އިސްތިއުފާދެއްވީއެވެ. އެއަށްފަހު މުޝައްރަފު ދިރިއުޅުއްވަމުން ގެންދެވީ ދުބާއީ އާއި ލަންޑަނުގައެވެ. 

ހަތަރު ތަރީގެ ޖެނެރަލް މުޝައްރަފް 1999 ވަނަ އަހަރު ލޭ އޮހޮރުވުމެއް ނެތް ބަގާވާތަކުން ވެރިކަމާ ހަވާލުވެވަޑައިގަތުމަށް ފަހު ގާތްގަނޑަކަށް 10 ވަރަކަށް އަހަރު ވަންދެން ވެރިކަން ކުރެއްވި އެވެ.