އައްޑޫ ސިޓީގެ މޭޔަރު އަލީ ނިޒާރު ނަންގަވާފައިވާ ލޯނު ދެއްކުމާއި ގުޅިގެން، އޭނާގެ މައްޗަށް ކޮށްފައިވާ ދައުވާ ބާތިލުކޮށްފި އެވެ. 

އައްޑޫ ސިޓީގެ މޭޔަރު ނިޒާރު ނަންގަވާފައިވާ 1.2 މިލިއަން ރުފިޔާގެ ލޯނު ނުދައްކާތީ ބޭންކް އޮފް މޯލްޑިވްސްއިން ވަނީ އޭނާގެ މައްޗަށް ދައުވާކޮށްދިނުމަށް ސިވިލްކޯޓުގައި އެދިފައެވެ. އޭނާގެ މައްޗަށް ދައުވާކޮށްފައިވަނީ ނިމުނު ހަފްތާގަ އެވެ. 

އެހެން ނަމަވެސް އެފަހުން ބޭންކް އޮފް މޯލްޑިންސްއިން ވަނީ ނިޒާރު ނަންގަވާފައިވާ ލޯނު ދައްކާފައިވާކަން ކޯޓަށް އަންގާފަ އެވެ. އެއާއެކު ސިވިލް ކޯޓުން ވަނީ ނިޒާރުގެ މައްޗަށް އުފުލާފައިވާ ދައުވާތައް ބާތިލުކޮށްފަ އެވެ. 

ބޭންކުން ނިޒާރުގެ މައްޗަށް ދައުވާކުރީ ރަހުނު ބަހައްޓައިގެން ނެންގެވި 1،248،000 ރުފީޔާގެ ލޯނު އެއްބަސްވުމާ އެއްގޮތަށް ދައްކާފައި ނުވާތީއެވެ. އަދި ދައުވާކުރީ ލޯނަށް ދައްކަން ޖެހި ނުދެއްކި ބާކީ ހުރި އަދަދާއި ސާވިސް ޗާޖާއި، އިންޓްރެސްޓާއި، ޖޫރިމަނާ ފައިސާ އެކީ އެއް ފަހަރަކާ ނަގައި ދިނުމަށް އެދި އެވެ.

މިއީ ނިޒާރު ރައްޔިތުންގެ މަޖިލީހުގެ މެމްބަރެއްގެ ގޮތުގައި ހުންނެވިއިރު ނަގާފައިވާ ލޯނެއްކަމަށް މައުލޫމާތު ލިބެއެވެ. 

ލޯނު ނެންގެވީ ލޯނާ ގުޅިގެން ހިތަދޫގައި އޮތް ނިޒާރުގެ ހިޔާލާ ކިޔާ ބަންޑާރަ ގޯއްޗާއި އެ ގޯތީގައިވާ އެންމެހައި އިމާރާތްތަކާއި ހިތަދޫގައި ކުރިން އޭނަ ހިންގެވި ކްރެސް ގާޑަން ރެސްޓޯރެންޓްގައިވާ އެންމެހާ މުދާ ބީއެމްއެލްއަށް ރަހުނުކޮށްފަ އެވެ.

ލޯނު ނުދެއްކުމާއި ގުޅިގެން ބެންކުން ނިޒާރުގެ މައްޗަށް ދައުވާކުރި ނަމަވެސް، އޭނާ ނަގާފައިވާ ލޯނު ދައްކާ ޚަލާސްކުރުމާއި ގުޅިގެން އެ މައްސަލަ އިތުރަށް ކުރިއަށް ނުގެންދިއުމަށް ކޯޓުން ވަނީ ނިންމާފަ އެވެ.