އިގިރޭސި ޕްރެމިއާ ލީގުގައި މިރޭ އަމިއްލަ ދަނޑުގައި ވާދަވެރި މެންޗެސްޓަރ ސިޓީ 1-0 ގެ ނަތީއްޖާއަކުން ބަލިކޮށް ޓޮޓެންހަމް އިން ޗެންޕިއަންސް ލީގުގެ އުންމީދު އައުކޮށްފިއެވެ. 

ދެޓީމުގެ ފަރާތުން ވަދަވެރި ކުޅުމެއް ފެނިގެންދިޔަ މިރޭގެ މެޗުގެ ޓޮޓެންހަމް އިން ލީޑު ހޯދީ ފުރަތަމަ ހާފުގެ 15 ވަނަ މިނެޓުގައެވެ. ޑެންމާކުގެ މިޑްފީލްޑަރ ހޯޖްބްޖަރގް ތަނަވަސްކޮށްދިން ފުރުސަތެއްގައި މި ލަނޑު އެޓީމަށް ކާމިޔާބުކޮށްދިނީ އެޓީމުގެ ކެޕްޓަން ހެރީ ކޭން އެވެ. މިއީ މިސީޒަނުގައި ލީގުގައި ހެރީ ކޭން ކާމިޔާބުކުރި 17 ވަނަ ލަނޑެވެ. 

ކްރިސްޓިއަން ގެބްރިއެލް ރޮމޭރޯއަށް ރެފްރީ ރަތްކާޑު ދައްކަނީ

ފުރަތަމަ ހާފުގައި މެންޗެސްޓަރ ސިޓީ ޓީމުން އެންމެ ހުސް ފުރުސަތެއް ލިބުނީ އެޓީމުގެ އަލްޖީރިއާ ފޯވާޑް ރިޔާދު މަހްރޭޒް އަށެވެ. ފުރަތަމަ ހާފުގެ އެންމެ ފަހު މިނެޓުގައި ޓޮޓެންހަމް ޕެނަލްޓީ އޭރިއާތެރެއިން މުޅިން ހުސްކޮށް ހުރެ މަހްރޭޒް ފޮނުވާލި ހަމަލާ އަމާޒުވީ ގޯލުގެ ހުރަސް ދަނޑިއަށެވެ. މިއާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީއްޖާއަކުން ޓޮޓެންހަމް ކުރީގައި އޮވެގެންނެވެ.

މިރޭގެ މެޗުން މޮޅުވެ އެއްވަނާގައި އޮތް އާސެނަލް އާއި ދެމެދުގައިވާ ފަރަގު ދެ ޕޮއިންޓަށް ކުޑަކުރުމުގެ ފުރުސަތު އޮތް ސިޓީއިން ދެވަނަ ހާފުގައި އެޓީމުގެ އެޓޭކުތައް ވަރުގަދަކުރިއެވެ. މިގޮތުން އެޓީމުގެ އާޖެންޓީނާގެ ޒުވާން ފޯވާޑް ޖޫލިއަން އަލްވަރޭޒަށް ވަނީ މި ހާފުގައި ލަނޑުޖަހާނެ ރަގަޅު ދެ ފުރުސަތުލިބި ބޭނުން ނުކުރެވިފައެވެ. ދެވަނަ ހާފުގައި ޓޮޓެންހަމް ޓީމުން އެންމެ ހުސް ފުރުސަތެއް ލިބުނީ އެޓީމުގެ ކެޕްޓަން ހެރީ ކޭން އަށެވެ.

ދެވަނަ ހާފުގެ 70 ވަނަ މިނެޓުގައި މެންޗެސްޓަރ ސިޓީ ޕެނަލްޓީ އެރިއާތެރެއިން އެޓީމުގެ ޑިފެންޑަރެއް ކައިރިން ނައްޓާލުމަށްފަހު ހެރީ ކޭން ފޮނުވާލި ބާރު ހަމަލާ ސިޓީގެ ބުރެޒިލް ގޯލްކީއްޕަރު އެޑަސަން ވަނީ ދިފާއުކޮށްފައެވެ. އަދި މިރޭގެ މެޗު ޓޮޓެންހަމް އިން ނިންމާލީ 10 ކުޅުންތެރިންނާއި އެކުގައެވެ. ދެވަނަ ހާފުގެ 87 ވަނަ މިނެޓުގައި ސިޓީގެ ކުޅުންތެރިއަކަށް ކުރި ފައުލަކާއި ގުޅިގެން މެޗުގެ ރެފްރީ ވަނީ ދެވަނަ ރީނދޫ ކާޑާއެކު ޓޮޓެންހަމްގެ އާޖެންޓީނާ ޑިފެންޑަރ ކްރިސްޓިއަން ގެބްރިއެލް ރޮމޭރޯ ރާތް ކާޑު ދައްކައި ދަނޑުން ފޮނުވާލާފައެވެ.

މިރޭގެ މެޗުން ލިބުނު ތިން ޕޮއިންޓާއި އެކު 22 މެޗުން 39 ޕޮއިންޓް ހަމަކޮށް ޓޮޓެންހަމް އިން ވަނީ ލީގު ތާވަލުގެ ފަސް ވަނައަށް ކުރިއަށްޖެހިލާފައެވެ. މިރޭގެ މެޗުން ބަލިވި މެންޗެސްޓަރ ސިޓީއަށް 21 މެޗުން ލިބުނު 45 ޕޮއިންޓާއިއެކު އެޓީމު އޮތީ ތާވަލުގެ ދެ ވަނައިގައެވެ. ތިން ވަނައިގައި މެންޗެސްޓަރ ޔުނައިޓެޑު އޮތީ 21 މެޗުން 42 ޕޮއިންޓާއި އެކުގައެވެ. އަދި ޗެންޕިއަންސް ލީގުގެ ފަހުޖާގައަށް ވާދަކުރަމުން އަންނަ ނިއުކާސްލް ހަތަރު ވަނައިގައި އޮތީ 21 މެޗުން 40 ޕޮއިންޓު ހަމަކޮށްގެންނެވެ.