ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު އިއްވަވާ ރިޔާސީ ބަޔާނާއި، އެމަނިކުފާނުގެ އަމަލުތަކާއި ދިމާނުވާކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު ވިދާޅުވެއްޖެ އެވެ.
ވަހީދު މިފަދައިން ވިދާޅުވެފައިވަނީ މި އަހަރަށް ރައްޔިތުންގެ މަޖިލިސް ހުޅުވާދެއްވަމުން ރައީސް ޞާލިހު އިއްވެވި ރިޔާސީ ބަޔާނާއި ގުޅިގެން ކުރެއްވި ޓްވީޓެއްގަ އެވެ.
ވަހީދު ވަނީ ރައީސް ޞާލިހު މެނިފެސްޓޯ ތަންފީޒު ކުރައްވަމުން ނުދާކަމަށް ވިދާޅުވެފަ އެވެ. އަދި ކޮންމެ އަހަރެއްގެ ރިޔާސީ ބަޔާނުގައި ގިނަ ކަންތައްތަކެއް ކޮށްދެއްވާނެކަމަށް ވިދާޅުވި ނަމަވެސް އޭގެ އަމަލީ ސިފައެއް ނުފެންނަކަމަށް ވިދާޅުވެފަ އެވެ.
ވަހީދު ވިދާޅުވީ ކޮންމެ އަހަރެއްގެ ރިޔާސީ ބަޔާން އިއްވަވަމުން ރައީސް ޞާލިހު ހައްދަވަނީ އިތުރުފުޅުތަކެއް ކަމަށެވެ. އަދި އެފަދައިން ރައްޔިތުންނަށް އޮޅުވާލާތަން ބައްލަވަން މަޖިލީހުގައި އިންނަވަން އެމަނިކުފާނުގެ ޒަމީރު ގަބޫލު ނުކުރާކަމަށެވެ.
"ކުރައްވާ ވެރިކަމަކާ މެނިފެސްޓޯއަކާ ދިމަލެއް ނުވޭ. ރިޔާސީ ބަޔާންތަކާ އަމަލު ކުރައްވާ ގޮތާ ދިމަލެއް ނުވޭ. އަނެއްކާވެސް އިތުރު އަނދުން އަޅުއްވާ ތަނާ، ރައްޔިތުންގެ މޫނުމަތީ އިތުރު ‘ދޮގުތައް’ ހައްދަވާތަން ބަލަން ގޮސް އަތްޖަހަން އެތާ އިންނަން އަޅުގަނޑުގެ ޒަމީރު ގަބޫލެއް ނުކުރޭ"
މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު
ވަހީދު މިފަދައިން ވިދާޅުވެފައިވާއިރު ރައީސް ޞާލިހުގެ އިސްތިއުފާއަށް ގޮވާލާ މިއަދު އިދިކޮޅުން ދަނީ މުޒާހަރާ ކުރަމުންނެވެ.
ރައީސް ޞާލިހު މިއަދު ރިޔާސީ ބަޔާން އިއްވެވީ މަޖިލީހުގެ މައިނޯރިޓީ ޕާޓީގެ ހުރިހާ މެމްބަރުން މަޖިލީހުން ބޭރުކުރުމަށްފަހު އެ މެމްބަރުންނަށް ނުވަދެވޭގޮތަށް މަޖިލިސް ބަންދުކުރައްވައިގެން ނެވެ.
ރައީސް ޔާމީނުގެ ޒައާމަތުގައި މަޖިލީސް މެމްބަރުންނަށް މަޖިލިސް ކުރާގެއަށް ނުވަދެވޭގޮތަށް ބަންދުކުރިކަން ފާހަގަކޮށް އެމްޑީޕީއިން ވަނީ ބޮޑެތި ފާޑުކިޔުންތަކެއް އަމާޒުކޮށްފަ އެވެ. އަދި މަޖިލީހުގައި މައިނޯރިޓީއަށް ޖާގަ އޮތްކަމަށް އެމްޑީޕީއިން ދަނީ ބުނަމުންނެވެ.
އެހެން ނަމަވެސް މި ދައުރުގެ ފަހު ރިޔާސީ ބަޔާން ރައީސް ޞާލިހު އިއްވާފައިވަނީ ސެކިއުރިޓީ ބޭނުންކޮށް އިދިކޮޅު މެމްބަރުން "ކިހިލީ ޖަހައިގެން" މަޖިލީހުން ބޭރުކުރުމަށް ފަހުގައިކަން ފާހަގަކުރެވެ އެވެ.
Advertisement
This content is created and paid for by advertisers and does not involve Voice Journalists
