އިޒްރާއިލުން ފަލަސްޠީނުގެ ޖެރިކޯ ގައި ހިންގި މިލިޓަރީ ރެއިޑް ގައި ފަލަސްޠީނުގެ 5 މީހެއްގެ ގަޔަށް ބަޑިޖަހައި ޝަހީދު ކޮށްލައިފިއެވެ.

ބާރުގަދަ ހަތިޔާރު ތަކާއި އެކު ހިންގި މި މިލިޓަރީ ރެއިޑް ހިންގާފައިވަނީ ހޯމަވިލޭރޭގެ ދަންވަރުގެ ވަގުތުން ފަށައިގެން އަޤަބަތް ޖަބްރް ރެފިޔުޖީ ކޭމްޕުގައެވެ. ފަލަސްޠީނުގެ ރައްޔިތުން ސިފަކޮށްފައިވާ ގޮތުން އިޒްރާއިލުގެ ސިފައިން ވަނީ ނުރައްކާތެރި ހަތިޔަރާއި އެކު އެސަރައްދު ވަށައިލައިފައެވެ. ޢާންމުންތިބީ ދަތިކުރުމެއްގެ ތެރޭގައެވެ. އެ ހާލަތުގައި އެސަރަހައްދުގެ ރައްޔިތުން ތިބޭތާ ހަފްތާއަކަށް ވުރެ ގިނަ ދުވަސް ވެއްޖެއެވެ. ހޯމަ ވިލޭރޭގެ ދަންވަރުގެ ކުރީ ކޮޅު ފެށި މިލިޓަރީ ރެއިޑް ފަތިސް ވަގުތާއި ހަމައަށް ހުއްޓައިނުލައި ކުރިއަށް ގެންގޮސްފައިވެއެވެ.

ޖެރިކޯގެ ގަވަރނަރ ވިދާޅުވީ ރެއިޑް ގައި ޝަހީދުވީ ތިން މީހެއް ކަމަށާއި ދެން ތިބީ އަނިޔާލިބުނު މީހުން ކަމަށެވެ. ނަމަވެސް އިޒްރާއިލުގެ މިލިޓަރީ އިން ބުނެފައިވަނީ އެމީހުން 7 މީހެއްގެ ގަޔަށް ބަޑިޖަހައި ޝަހީދު ކޮށްލިކަމަށެވެ. އޭގެ ތެރޭގައި ޖެނުއަރީ 28 ވީ ދުވަހު އިޒްރާއިލްގެ ސިފައިނަށް ބަޑިން ހަމަލާދޭން މަސައްކަތް ކުރި ދެ މީހަކު ހިމެނޭ ކަމަށެވެ. އަދި އަނެއް ފަސް މީހުންނަކީ  އެމީހުންގެ އެހީތެރިން ކަމަށެވެ.

Advertisement

28 ޖެނުއަރީގައި ބަޑިން ހަމަލާދިން ކަމަށް އިޒްރާއިލުން ބުނެ ފަލަސްޠީނުގެ ރައްޔިތުން ޝަހީދުކުރަމުން ދާއިރު އެހަމަލާގައި އެއްވެސް މީހަކު މަރުވެފައެއްނުވެއެވެ. އަދި ޒަހަމްވެގެން މީހަކު ހޮސްޕިޓަލަށް ވެސް ގެންގޮސްފައެއް ނުވެއެވެ. ނަމަވެސް އޭގެ ރައްދުގައި އިޒްރާއިލުން ދިން ހަމަލާގައި ފަލަސްޠީނުގެ 10 މީހަކު ވަނީ ޝަހީދުކޮށްލައިފައެވެ.

އިޒްރާއިލުން ހޯމަވިލޭރޭ ޝަހީދުކޮށްލި މީހުންގެ ހަށިތައްވަނީ ފަލަސްޠީނާއި ހަވާލުނުކޮށް ބަހައްޓައިފައެވެ.