ފުވައްމުލަކު ސީޓީގައި މިހާރު ކުރިއަށްދާ އިންޓަރ ސްކޫލް އެތްލެޓިކްސް މުބާރާތުގެ ހޯމަ ދުވަހުގެ ހަވީރު ބޭއްވުނު 19 އަހަރުން ދަށުގެ އަންހެން ހައިޖަމްޕު އިވެންޓުގައި އައްޑޫ ހައި ސްކޫލްގެ ދަރިވަރު އައިޝަތު ޝައިމް އަޒީޒް 27 އަހަރުވީ ޤައުމީ އަންހެން ހައި ޖަމްޕުު ރެކޯޑް މުގުރާލައިފިއެވެ.

1.50 މީޓަރ މަތިން ފުންމައިގެން ޝައިމް ޤައުމީ ރެކޯޑު ހެދިއިރު، ކުރިން މިރެކޯޑް އޮންނަނީ 1996 ވަނަ އަހަރު މާލޭގައި ބޭއްވުނު 04 ވަނަ އިންޓަރ ސްކޫލް އެތްލެޓިކްސް މުބާރާތުގައި 1.47 މީޓަރު މަތިން ފުންމައިގެން ރެކޯޑު ހެދި ރަނާ އަޙްމަދު ޞާދިޤް އަތުގައެވެ. މި ފަހަރުގެ މުބާރާތުގެ 19 އަހަރުން ދަށުގެ އަންހެން ހައިޖަމްޕު އިވެންޓުގައި ފަސް އެތްލީޓުން ބައިވެރިވި އިރު އޭގެތެރެއިން އިވެޓުގެ ފައިނަލް ބުރަށް ކޮލިފައިވީ ޝައިމް އެކަންޏެވެ. 

އައިޝަތު ޝައިމް އަޒީޒް / ފޮޓޯ:ފަލާހް

މުބާރާތުގެ ދެވަނަ ދުވަހުގެ އިވެންޓުތައް ނިމުނު އިރު ދެ އެތްލީޓަކު ވަނީ މުބާރާތުގެ މީޓް ރެކޯޑު ހަދާފައެވެ. މުބާރާތުގެ ފުރަތަމަ ދުވަހު 19 އަހަރުން ދަށުގެ ފިރިހެން ޑިސްކަސް އުކުމުން އެއްވަނަ ހޯދީ 28.92 މީޓަރ ދުރަށް އުކައިގެން ޙުސައިން އުޒައިން ( އެމްޖޭއެސް) އެވެ. އުޒައިން ވަނީ މި އިވެންޓުން މުބާރާތުގެ މީޓް ރެކޯޑް ހަދާފައެވެ. މި އިވެންޓުން ދެވަނަ ހޯދީ 22.91 މީޓަރ ދުރަށް އުކައިގެން އަހުމަދު ސާހިލް ( ގދ.އޭއީސީ) އެވެ. މި އިވެންޓުން ތިންވަނަ ހޯދީ 21.52 މީޓަރ ދުރަށް އުކައިގެން މުހައްމަދު އާއިން ( ޏ.އޭއީސީ ) އެވެ.

19 އަހަރުން ދަށުގެ ފިރިހެން 100 މީޓަރ ދުވުމުން އެއްވަނަ ހޯދީ ގދ. އަތޮޅު ތައުލީމީ މަރުކަޒުގެ ދަރިވަރު އިބްރާހިމް ނާހިލް ނިޒާރު ވަނީ މި އިވެންޓުގެ މީޓް ރެކޯޑު ހަދާފައެވެ. އޭނާ ރޭސް ނިންމީ 11.69 ސިކުންތުން ނެވެ. ކުރިން މިރެކޯޑް އޮތީ ގދ.އަތޮޅު ތައުލީމީ މަރުކަޒުގެ ދަރިވަރު އިބްރާހިމް ފާރިޝްގެ އަތުގައެވެ.